Չի կարելի լռել Հայաստանում տեղի ունեցող գործընթացների վերաբերյալ, այլապես այդ լռության գինը մեր երկրում քաղբանտարկյալների թվի ավելացումն է դառնալու։ Այս նպատակով այսօր, հոկտեմբերի 29-ն Ազգային ժողովի մոտ տեղի ունեցավ բողոքի ակցիա՝ ի պաշտպանություն Հայաստանի քաղբանտարկյալների և Բաքվում պատանդառված հայ գերիների։

Ակցիային մասնակցում էին ՀՀԿ, ՀՅԴ  երիտասարդական և ուսանողական կառույցների, այլ քաղաքական ուժերի,  հասարակական միավորումների երիտասարդներ։

Նշենք, որ ԱԺ-ում այդ պահին ընթանում էր Եվրանեսթի խորհրդարանական վեհաժողովի լիագումար նիստը, եւ ակցիայի մասնակիցները փորձում էին իրենց ձայնը լսելի դարձնել եվրոպացի խորհրդարանականների համար։

«Մեր կոչն է միջազգային հանրությանը, որպեսզի երկակի ստանդարտներ չկիրառի և կոնկրետ պատժամիջոցներ կիրառի իշխանական այն ներկայացուցիչների նկատմամբ, ովքեր ուղղորդում են դատական համակարգը սմս հաղորդագրություններով և ԱԺ այն դահլիճում, որ դուք հիմա գտնվում եք: Այդ մարդն ամիսներ առաջ ասել է, որ ընդդիմախոսների տեղը ԱԱԾ պադվալներում է։ Դուք պետք է հասկանաք, որ չեք կարող պաշտպանել մի իշխանության, որն ամեն օր գործում է օրենքից դուրս»,- ակցիայի ժամանակ հայտարարեց «Հայաստան» խմբակցության պատգամավոր Գառնիկ Դանիելյանը՝ դիմելով եվրոպացի խորհրդարանականներին։

«Մենք տեսնում ենք Բաքվում պահվող մեր ռազմաքաղաքական ղեկավարության և այլ գերեվարված անձանց խոշտանգումներ և տեսնում ենք ձեր լռությունը, որն անթույլատրելի է։ Միջազգային հանրությունը հստակ գնահատականներ պետք է տա, դուք նրա համար եք, որպեսզի պաշտպանեք Հայաստանում ժողովրդավարությունը, ոչ թե Նիկոլ Փաշինյանին»:

Ակցիային մասնակցում էին նաև ՀՅԴ «Նիկոլ Աղբալյան» ուսանողական միության երիտասարդները։

ՀՅԴ «Նիկոլ Աղբալյան» ուսանողական միության վարչության ատենապետ Միրո Սարգսյանը անգլերեն ելույթով դիմեց եվրոպացի խորհրդարանականներին.

«Եվրանեսթի խորհրդարանական վեհաժողովի հարգարժան պատվիրակներ,

Այսօր դուք հավաքվել եք այստեղ՝ քննարկելու Արևելյան գործընկերության տարածաշրջանին և դրանից դուրս վերաբերող կարևորագույն հարցեր։ Այս բողոքի ակցիայի միջոցով մենք ցանկանում ենք ձեր ուշադրությունը հրավիրել մի քանի հրատապ՝ թե՛ ներքին, թե՛ արտաքին հարցերի վրա։

Եվրամիությունը չի կարող հանդուրժել էթնիկ զտումները, հայկական մշակութային ժառանգության ոչնչացումը, պատանդների խոշտանգումները, արցախցների վերադարձի իրավունքի մերժումը, ՀՀ ինքնիշխան տարածքի օկուպացիան, մարդու իրավունքների զանգվածային խախտումները և այլ հանցագործություններ, որոնք կատարվել են Ադրբեջանի՝ որպես տարածաշրջանում Արևելյան գործընկերության անդամ  երկրի կողմից։

Եվրամիության գործադիր մարմինները՝ հիմնականում Եվրոպական Հանձնաժողովը և Եվրոպական Խորհուրդը, պետք է ձեռնարկեն անհրաժեշտ քայլեր՝ իրենց գործողություններն ու քաղաքականությունը համապատասխանեցնելու Եվրախորհրդարանի կողմից ընդունված բանաձևերին։ Եվրոպական արժեքները չեն կարող տեղի տալ նավթով հարուստ ավտոկրատիաների տնտեսական շահերին։

Պատմությունը, հատկապես վերջին շրջանում, ապացուցել է, որ անպատժելիությունը հանգեցնում է, հատկապես մարդկության դեմ, նոր հանցագործությունների։

Հարգելի՛ պատվիրակներ, մենք նաև կոչ ենք անում  ուշադրություն դարձնել Հայաստանի ներքին զարգացումներին, մասնավորապես՝ օրենքի գերակայության խնդրին, քաղաքական ազատ կամարտահայտման նկատմամբ հարգանքին ու  դատական համակարգի անկախությանը։ Քաղաքական հետապնդումները, քաղբանտարկյալների գոյությունը, ինչպես նաև Հայ Առաքելական Եկեղեցու վրա հարձակումները չեն կարող ընդունելի լինել ձեր կողմից։

Այսօր Հայաստանում ժողովրդավարության իմիտացիա է։ Քաղբանտարկյալների այս պաստառները, որ տեսնում եք, այդ իմիտացիայի կենդանի ապացույցն են»։

ՀՅԴ  ՆԱՈւՄ անդամ Լիլիթ Գևորգյանը լրագրողների հետ զրույցում նշեց, որ Հայաստանի Հանրապետությունում ընդհանրապես չկա ժողովրդավարություն և խոսքի ազատություն:

Իր հերթին ՀՅԴ  ՆԱՈւՄ անդամ Արամ Արշակյանն էլ ասաց, որ հետապնդումներն ու դատապարտությունները չեն կարող ազդել իրենց վրա, իրենք երկրի հետ կապված ունեն իրենց հստակ նպատակները, տեսլականը:

Տեսանյութն՝ այստեղ