Օգտուելով ՀՅԴ «Զաւարեան» ուսանողական միութեան ատենապետ Սամ Կարապետեանի Նորվեկիոյ արտաքին գործոց նախարարութեան` Նորվեկիոյ մէջ կազմակերպած ծրագիրին մասնակցութեան առիթէն, ՀՅԴ Լիբանանի Հայ դատի մարմինը նամակ մը յղեց Նորվեկիոյ խորհրդարանի արտաքին յարաբերութիւններու յանձնախումբի եւ Նորվեկիական Քրիստոնէական-ժողովրդավարական կուսակցութեան անդամ Եոնաս Սայետին:

Հայ դատի մարմինը նորվեկիացի երեսփոխանին ուշադրութեան յանձնեց, որ 8 օգոստոսին Ուաշինկթընի մէջ նախաստորագրուած Հայաստան-Ազրպէյճան համաձայնագիրին իբրեւ նպատակ կը նշուի «արդար, համապարփակ եւ տեւական խաղաղութիւն»-ը, սակայն նշեալ համաձայնագիրը ո՛չ արդար է, ո՛չ ալ համապարփակ, որովհետեւ կ՛անտեսէ իսկական խաղաղութեան համար խիստ կարեւոր հարցեր` Արցախի հայ ժողովուրդի միջազգային օրէնքով ամրագրուած տունդարձի իրաւունքը, Պաքուի մէջ պահուող հայ պատանդներու ազատ արձակումը, Հայաստանի Հանրապետութենէն տարածքներ բռնագրաւած ազրպէյճանական ուժերու հեռացումը եւ Արցախի մէջ հայկական ազգային ու քրիստոնէական ժառանգութեան դէմ գործուող մշակութային ցեղասպանութեան դադրեցումը:

ՀՅԴ Լիբանանի Հայ դատի մարմինը երեսփոխան Սայետին, անոր կուսակցութեան եւ Նորվեկիոյ խորհրդարանին կոչ ուղղեց` գործնական աշխատանք տանելու` իսկական խաղաղութեան եւ «արդար ու համապարփակ» համաձայնութեան մը համար կենսական եղող նշեալ մարդկային իրաւանց կարեւոր հարցերու լուծման համար:

Նամակին կողքին նորվեկիացի երեսփոխանին յանձնուեցաւ Համազգայինի Հայաստանի եւ Արցախի գրասենեակներու նախաձեռնութեամբ եւ Համազգայինի Կեդրոնական վարչութեան աջակցութեամբ հրատարակուած «Արցախ. Վտանգուած Ժառանգութիւն» եռալեզու պատկերագիրքի առաջին հատորէն օրինակ մը: