21 հոկտեմբեր 2025-ին Մեծի Տանն Կիլիկիոյ կաթողիկոս Արամ Ա. վեհափառ հայրապետը, Քանատայի Հայ դատի յանձնախումբի ներկայացուցիչներուն հետ, Օթթաուա կատարած պաշտօնական այցելութեան ընթացքին հանդիպում մը ունեցաւ Քանատայի վարչապետ Մարք Քառնիի հետ:

Արամ Ա. կաթողիկոսին կ՛ընկերակցէին Քանատայի հայոց թեմի առաջնորդ Բաբգէն արք. Չարեան, ՀՅԴ Բիւրոյի անդամ. Հայ դատի կեդրոնական խորհուրդի անդամ եւ Կիլիկիոյ կաթողիկոսութեան Ազգային ընդհանուր ժողովի պատգամաւոր Րաֆֆի Տօնապետեան եւ Քանատայի Հայ դատի յանձնախումբի ատենապետ Խորէն Տիմիթեան:

Հանդիպման ընթացքին վեհափառ հայրապետը եւ պատուիրակութեան անդամները երախտագիտութիւն յայտնեցին վարչապետին` իր ծառայութեան եւ քանատահայ համայնքին նկատմամբ ցուցաբերած հետաքրքրութեան համար: Քննարկուեցան բազմազան հարցեր` ներառեալ Հայաստանի Հանրապետութեան ինքնիշխանութեան եւ տարածքային ամբողջականութեան պաշտպանութիւնը, արցախահայութեան անվտանգութեան եւ վերադարձի իրաւունքի ապահովման գերխնդիրը, Ազրպէյճանի մէջ կամայականօրէն կալանաւորուած հայ գերիներու ազատ արձակման հրամայականը, ինչպէս նաեւ` Արցախի հայկական մշակութային եւ կրօնական ժառանգութեան պահպանման հրատապ անհրաժեշտութիւնը:

Վեհափառ հայրապետը նաեւ իր դիտարկումները ներկայացուց Միջին Արեւելքի քաղաքական զարգացումներուն վերաբերեալ` անդրադառնալով շրջանի բնակչութեան դիմագրաւած մարտահրաւէրներուն եւ անոնց հետեւանքով ստեղծուած բարդ իրադրութեան: Ան շեշտեց կայունութեան, արդարութեան եւ համագործակցութեան կարեւորութիւնը` միաժամանակ ընդգծելով միջկրօնական երկխօսութեան դերը` իբրեւ խաղաղութեան եւ համակեցութեան կայուն հիմք:

Վարչապետ Քառնին եւ վեհափառ հայրապետը փոխանակեցին միտքեր սոյն հրատապ նիւթերուն շուրջ` վերահաստատելով Քանատայի եւ հայ ժողովուրդի համատեղ յանձնառութիւնը` մարդկային իրաւանց, արդարութեան եւ խաղաղութեան արժէքներուն նկատմամբ: Հանդիպումը նշանաւորեց կարեւոր փուլ մը Քանատայի եւ քանատահայ համայնքին միջեւ շարունակուող երկխօսութեան մէջ` ընդգծելով այն ամուր յարաբերութիւնը, որ հիմնուած է համատեղ արժէքներու եւ փոխադարձ յարգանքի հիման վրայ: