Հոկտեմբերի 30-ին Հրապարակ TV-ի Հինգշաբթի հաղորդաշարի հյուրն էր ՀՅԴ Հայաստանի Գերագույն մարմնի անդամ, ՀՀ ԱԺ «Հայաստան» խմբակցության պատգամավոր, տնտեսագետ Թադևոս Ավետիսյանը:

Անդրադարձ է կատարվել այս օրերին Ազգային ժողովում ընթացող 2026 թ. բյուջեի նախագծի քննարկումներին, երկրի համար այդ կարևոր փաստաթղթի հետ կապված՝ իշխանությունների կամայական և պոպուլիստական մոտեցումներին, ընդդիմության քննադատություններն ու առաջարկություններն անտեսելու կեցվածքին:

Ըստ Թադևոս Ավետիսյանի՝ 2021 թվականին ընտրողի քվեն ստանալու նպատակով իշխանության տված խոստումները՝ մարդկանց կենսամակարդակը բարձրացնելու, սոցիալական առավել խոցելի խմբերի կյանքը թեթևացնելու մասին, ոչ միայն չեն կատարվել, այլև տեղի է ունեցել ճիշտ հակառակը՝ սոցիալապես խոցելի խմբերը՝ աշխատող աղքատները, թոշակառուները, նպաստառուներն սկսել են ավելի վատ ապրել, քան մինչև 2018 թ. իշխանափոխությունը: Թոշակների և նվազագույն աշխատավարձի որոշակի ավելացումը համեմատելի չէ ապրանքների տասնյակ տոկոսներով թանկացման և նվազագույն սպառողական զամբյուղի ներկա թվային արտահայտության հետ:

Անդրադարձ է կատարվել նաև պաշտպանության և հարակից ոլորտների համար նախատեսված ծախսերի կրճատմանը, ինչն, ըստ տնտեսագետի, տրամաբանական չէ, քանի դեռ չեն լուծվել մեր անվտանգության հետ կապված հիմնախնդիրները, քանի դեռ կայուն խաղաղության մասին խոսելը խիստ ժամանակավրեպ է: Նրա խոսքով՝ սա ոչ թե խաղաղություն է, այլ անվերջանալի զիջումների գնով պահպանվող հրադադար, որ կարող է խախտվել Ադրբեջանի նոր պահանջներին ընդդիմանալու առաջին իսկ փորձի դեպքում:

Մանրամասները՝ տեսանյութում