Փետրվարի 19-ին Հայաստանի կինոգործիչների միության տանը (Կինոյի տուն) տեղի ունեցավ ՀՅԴ Բյուրոյի անդամ, Գերմանիայի Դաշնային Հանրապետությունում ՀՀ արտակարգ և լիազոր դեսպան, մտավորական, պատմաբան, քաղաքական գործիչ Վահան Հովհաննիսյանի 70-ամյակին նվիրված հուշ-երեկոն։ Երեկոյի ժամանակ ներկայացվեց «Ձեր՝ Վահանը» ֆիլմը:

«Ես շատ երկար մտածում էի, ինչպես ներկայացնել Վահան Հովհաննիսյանին։ Շատ մեծ պատիվ էր ու պարտավորություն՝ ներկայացնել իմ ընկերոջն այնպես, որ որպես արժեք մնա սերունդների համար»,- տեսաուղերձում նշեց TV 5 հեռուստաընկերության գործադիր տնօրեն Հարություն Հարությունյանը, ով Հայաստանում չլինելու պատճառով, ներկա չէր երեկոյին:

«Վահան Հովհաննիսյանն ինձ համար ավագ, մեծ ընկեր էր, երևի իմ բախտն է, որ արժանացա նրա մասին ֆիլմ նկարելու պատվին»,- ասաց Հարություն Հարությունյանը։

Վահան Հովհաննիսյանի կերպարը մարմնավորել է Պարույր Սանթրոսյանը, ֆիլմում կան արխիվային բացառիկ կադրեր։ Ռեժիսորը Մարիամ Եգորյանն է, սցենարի հեղինակը՝ Լևոն Գալստյանը։

Ֆիլմի ցուցադրությունից հետո Վահան Հովհաննիսյանի կուսակցական ընկերներ՝ ՀՅԴ Բյուրոյի երկարամյա ներկայացուցիչ Հրանտ Մարգարյանը, ՀՅԴ Բյուրոյի ներկայացուցիչ Արմեն Ռուստամյանը, ՀՅԴ Հայաստանի Գերագույն մարմնի անդամ, ԱԺ պատգամավոր Գեղամ Մանուկյանը, ՀՀԿ փոխնախագահ Արմեն Աշոտյանը, ինչպես նաեւ Վահան Հովհաննիսյանի քույրը՝ Վիկտորիա Հովհաննիսյանը հուշեր պատմեցին Վահան Հովհաննիսյանի մասին՝ նրա պատանեկան տարիներից մինչեւ արցախյան ազատագրական շարժումը եւ բուռն քաղաքական գործունեության տարիները:

Վահան Հովհաննիսյանի հիշատակին նվիրված երեկոյի ընթացքում ծածանվեց այն նույն դրոշը, որը ՀՅԴ-ականների նկատմամբ հարուցված ապօրինի քրեական գործի դատավարության ժամանակ՝ 12.12.1997 թ․-ին, դատարանի դահլիճում ծածանել էին Վահան Հովհաննիսյանը և ներկայումս ՀՅԴ Բյուրոյի ներկայացուցիչ Արմեն Ռուստամյանը՝ ի նշան ազատության։

Խորհրդանշական է, որ նույնիսկ դատարանի դահլիճում նրանք կարողացել են դրոշը դուրս բերել վանդակից և ծածանել այն վանդակից դուրս՝ որպես հիշեցում, որ ազատության խորհրդանիշ դրոշը երբեք չի կարող գտնվել ազատությունը սահմանափակող վանդակի ներսում։

«Թող այս դրոշը ձեզ ուժ և կորով տա ճիշտ այնպես, ինչպես դժվար պահին ուժ տվեց ինձ և իմ ընկերներին»:

Վահան Հովհաննիսյան
12.12.1997

Միջոցառման ավարտին հանդես եկավ ՀՀ վաստակավոր արտիստ Շուշան Պետրոսյանը՝ «Երազի իմ երկիր հայրենի» երգի կատարմամբ:

Նշենք, որ մինչ ֆիլմի ցուցադրումը բազմաթիվ հյուրեր լրագրողների հետ զրույցներում պատմել են Վահան Հովհաննիսյանի հետ ունեցած իրենց շփումների եւ հանդիպումների մասին:

Նրանց թվում էին՝ ՀՅԴ Բյուրոյի նախկին ներկայացուցիչ Հակոբ Տեր-Խաչատուրյանը,  ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը, մշակույթի նախկին նախարար Ռոլանդ Շառոյանը, ՀՀԿ անդամ, պաշտպանության նախկին փոխնախարար Արտակ Զաքարյանը, ՀՀԿ անդամ Սամվել Նիկոյանը, ՀՀԿ անդամ, ԱԺ նախկին պատգամավոր Մարգարիտ Եսայանը եւ ուրիշներ:

Մանրամասները՝ Երկիր Մեդիայի ռեպորտաժում