ՀՅԴ Հայասատնի ԳՄ ներկայացուցիչ «Հայաստան» խմբակցության պատգամավոր Իշխան Սաղաթելյանը անդրադարձել է Նիկոլ Փաշինյանի այն հայտարարությանը, որ եթե ինքը չվերընտրվի, ապա նոր պատերազմ կլինի.

«Այսօր Նիկոլ Փաշինյանը հայտարարել է՝ եթե առաջիկա ընտրություններին ինքը չընտրվի, տեղի կունենա պատերազմ, նույնիսկ ամիս-ամսաթիվ է հնչեցրել. այս մարդուն թվում է, որ ինքը տարիներ շարունակ, եթե կարողացել է խաբել և Ալիևով վախեցնել մարդկանց, վերարտադրվել, այս անգամ ևս կստացվի։

Այս նույն տեքստերը 2021 թվականի ընտրություններին Նիկոլ Փաշինյանը ևս ասել է, և իր հիմնական խաղաթուղթը նաև դա էր, որ փորձում էր օգտագործել 21 թվականին, խաբելով մարդկանց, որ եթե ինչ եղել, եղել է, եթե ես գամ, այլևս կլինի խաղաղություն։ Իրականում ի՞նչ տեղի ունեցավ. 21 թվականին իր վերարտադրությունից հետո տեղի է ունեցել երկու պատերազմ։ 2022 թվականին Ադրբեջանը լայնածավալ հարձակում է իրականացրել Հայաստանի վրա, ունեցել ենք 200-ից ավելի զոհ, շուրջ 240 կիլոմետր տարածք օկուպացվել է Ադրբեջանի կողմից, մեր համար կարևոր ռազմավարական նշանակություն ունեցող բարձրունքներ և դիրքեր հայտնվել են Ադրբեջանի հսկողության տակ։ Դրանից մեկ տարի հետո՝ 2023 թվականի սեպտեմբերին տեղի է ունեցել Արցախում էթնիկ զտում, հայաթափում, հարյուրավոր զոհեր։

2024 թվականին այս նույն տեքստով Նիկոլ Փաշինյանը սպառնացել է մեր ժողովրդին, ասելով եթե Տավուշի հատվածում այդ զիջումները չանենք, տեղի կունենա պատերազմ, և այո, կարևոր ռազմավարական նշանակություն ունեցող տարածքներ հանձնել է Ադրբեջանը և այսօր էլ փորձում է վախեցնել Ալիևով և պատերազմով մեր ժողովրդին։

Փորձում է ինքը ներկայանալ խաղաղության երաշխավոր, բայց ըստ էության ինքը պատերազմի, պարտության երաշխավորն է։ Ուրեմն լսի Նիկոլ Փաշինյան, պարտության, պատերազմի, դավաճանության, հայրենիք հանձնելու, նվաստացման, զոհերի և ողբերգության խորհրդանիշն ես անձամբ դու և որևէ իրավունք չունես ընտրություններին մասնակցող այլ ուժերին մեղադրելու, պատերազմ բերելու կամ իբր դու խաղաղություն ես ձեռք բերել, մենք էլ գալիս ենք պատերազմ բերենք։ Պատերազմի ու պարտության խորհրդանիշը անձամբ դու ես և Հայաստանի տարածքային ամբողջականությունը ապահովելու ինքնիշխանությունը վերականգնելու, Հայաստանի քաղաքացիների անվտանգությունը ապահովելու համար քեզ և քո վերարտադրությունը առաջիկա ընտրություններին պետք է կանխվի, քանի որ դու անձամբ ազգային անվտանգության սպառնալիք ես»։

Մանրամասները՝ տեսանյութում