Այսօր՝ մայիսի 4-ին տեղի ունեցավ ԱԺ «Հայաստան» դաշինքի կողմից կազմակերպված այո՝ ժողովրդավարությանը, ոչ՝ երեսպաշտությանը բողոքի ցույցը:

Դաշինքի ներկայացուցիչներն ու նրանց աջակիցները նախ հավաքվել են Մերգելյան ինստիտուտի այգում, ապա երթով շարժվել դեպի Կարեն Դեմիրճյանի անվան մարզահամերգային համալիր, որտեղ անցկացվում է Եվրոպական քաղաքական համայնքի 8-րդ գագաթնաժողովը։

«Եվրոպան չպետք է լռի», «Ազատություն Բաքվում պահվող գերիներին», «Ազատություն քաղբանտարկյալներին», – վանկարկում էին երթի մասնակիցները:

Լրագրողների հետ զրույցում ՀՅԴ անդամ, «Հայաստան» խմբակցության պատգամավոր Արթուր Խաչատրյանը նշել է, որ երկրում կան տասնյակ քաղբանտարկյալներ, ովքեր ձերբակալվել են շինծու մեղադրանքներով, մինչդեռ իշխանության կողմնակիցների կատարած ծանր հանցագործությունները մնում են անպատիժ։ Եվրոպացի բարձրաստիճան պաշտոնյաներին կոչ ենք անում աչք չփակելՀայաստանում դեմոկրատիայի հետընթացին եւ արդեն անթաքույց միահեծան բռնապետության հաստատմանը: Եթե Եվրոպան իրական բարեկամ է, ապա չի կարող աչք փակել այս ամենի վրա:

Նրա խոսքով՝ իրականության հետ աղերս չունի այն, որ ՀՀ իշխանությունը փորձում է պետությունը ներկայացնել որպես ժողովրդավարության ջատագով, իսկ ընդդիմությանը՝ ռուսական ազդեցության գործակալ։

Արթուր Խաչատրյանը նաև շեշտել է, որ Բաքվի բանտերում շարունակում են մնալ տասնյակ հայ գերիներ, և անհրաժեշտ է օր առաջ հասնել նրանց ազատ արձակմանը։

Անդրադառնալով Ադրբեջանի նախագահ Իլհամ Ալիևի այսօրվա հայտարարություններին, Արթուր Խաչատրյանն ասել է. Ալիևն այս հարթակն օգտագործեց իր թեզերն առաջ տանելու, պատերազմական հանցագործություններն ու Արցախի բռնազավթումն արդարացնելու, հայկական իրականությունն ու պատմությունը ևս մեկ անգամ աղճատելու համար։ Աա հերթական անգամ ցույց է տալիս այդ պետության թշնամական դիրքորոշումը:

Երթի մասնակիցները Մարզահամերգային համալիրի մոտ ուղերձներ հղեցին ԵՄ ներկայացուցիչներին՝ հայերեն եւ անգլերեն լեզուներով:

Մանրանասները՝ տեսանյութում