Մենք Ֆրանսիայում աշխատանքներ ենք տարել, քաջալերել ենք Ֆրանսիայի բոլոր կառավարություններին, որպեսզի Հայաստանի ու Ֆրանսիայի միջև կապերը սերտանան՝ դիվանագիտական, առևտրական, իսկ 2020–ի պատերչազմից հետո սեղանին դրեցինք ռազմական ոլորտում հարաբերությունների հարցը։ Այս մասին NEWS.am–ի հետ զրույցում նշեց ՀՅԴ Բյուրոյի անդամ, Ֆրանսիայի հայկական կազմակերպությունների համակարգող խորհրդի համանախագահ Մուրադ Փափազյանը, ով Երևան է ժամանել Ֆրանսիայի նախագահ Էմանուել Մակրոնի գլխավորած պատվիրակության կազմում։

Նրա խոսքով, իրենք գործել են, որպեսզի Հայաստանն ու Ֆրանսիան նոր ձևաչափով աշխուժացնեն իրենց հարաբերությունների ռազմական ոլորտում. «Նախագահ Մակրոնի մոտ մի քանի անգամ բարձրացրեցինք այդ անհրաժեշտությունը, որ Հայաստանն ու Ֆրանսիան ռազմական հարաբերություններ ունենան։ Նախգահ Մակրոնը լսեց մեզ, ընդհանրապես, մեզ լսում է, որովհետեւ մեր կապերը շատ ջերմ ու մտերմիկ են։ Մենք հպարտ ենք, որ Ֆրանսիան այսպիսի քայլեր է կատարում՝ զորավիգ կանգնելու Հայաստանի պետականությանը և պատրաստելու համար ապագան»,–ասաց Փափազյանը։

Անդրադառնալով Հայաստան–Ֆրանսիա ռազմավարական համագործակցության ստորագրվող փաստաթղթին, նա նշեց, որ նախ տնտեսական ոլորտում կապերը պետք է ամրանան, նաև պետք է շարունակվի ռազմական աջակցությունը. «Ֆրանսիայի կողմից կա այդ կամքը, որ շարունակեն զարգացնել, ավելի սերտ հարաբերություններ մշակվեն Հայաստանի հետ։ Հայաստանն ու Ֆրանսիան նոր մակարդակի են բերում իրենց հարաբերությունները։ Ռազմական ոլորտում ևս նոր մակարդակի կհասնեն հարաբերությունները»։

Հարցին՝ արդյոք Ֆրանսիան ցանկություն ունի մասնակցել TRIPP նախագծին, Փափազյանը պատասխանեց. «Ֆրանսիան, անշուշտ, ցանկանում է դերակատարում ունենալ տարածաշրջանում, մասնավորապես, որպեսզի Հայաստանը մենակ կլինի։ Ֆրանսիան իր քայլերով օրինակ է, և քաջալերում է այլ եվրոպական պետությունների, որ նրանք էլ իրենց մասնակցությունը բերեն և զարգացնեն իրենց հարաբերությունները Հայաստանի հետ։

Բոլոր միջազգային գագաթնաժողովներում Ֆրանսիան զորավիգ է կանգնել Հայաստանին, նա այդ գագաթնաժողովներում ներկայանում էր որպես Հայաստանի փաստաբան, Հայաստանի գլխավոր զորակցություն ցուցաբերող պետություն»։

Ինչ վերաբերում է նրան, որ նաև Մակրոնի մասնակցությամբ է տեղի ունեցել 2022–ի հոկտեմբերին Պրագայի գագաթնաժողովը, որտեղ Հայաստանի ղեկավարը ճանաչեց Ադրբեջանի տարածքային ամբողջականությունը, ներառյալ Արցախը, Մուրադ Փափազյանն ասաց. «Նախագահ Մակրոնը հերքում է իր դերակատարումը այդ որոշման հարցում։ Ես կարծում եմ՝ Նիկոլ Փաշինյանը Մակրոնի կարիքը չունի որպեսզի իր դիրքորոշումն ունենա Արցախի վերաբերյալ։ Ֆրանսիան չի քաջալերել Հայաստանին, որ Հայաստանի կառավարությունը ճանաչի Արցախը Ադրբեջանի մաս։ Սա Ալիև–Փաշինյան հարաբերությունների արդյունքն է։ Մակրոնը կապ չունի այս պատմության հետ։ Այդտեղ կար նաև Հայաստանի սահմանների հարցը, որ Ադրբեջանը պետարազմական գործողությունների չգնա։ Մակրոնի հիմնական մտահոգությունը այն էր, որ Հայաստանը կարողանա ապահովել իր անվտանգությունը»։

Մենք միշտ բարձրացնում ենք ապահով գետնի վրա արցախցիների վերադարձի հարցը. Այս հարցում Ֆրանսիան դիրքորոշում չի հայտնում հիմա, բայց ուզում եմ հիշեցնել, որ երբ տեղի ունեցավ Արցախում էթնիկ զտումը, Ֆրանսիայի ԱԳ նախարարը գրավոր հայտարարեց, որ մենք պաշտպանում ենք արցախցիների վերադարձը Արցախ. ասաց Մուրադ Փափազյանը:

«Կարծում եմ՝ նախագահ Մակրոնը հանգրվան առ հանգրվան է ուզում առաջ ընթանալ։ Սա կախված է նաև նրանից, թե ինչպիսին է Հայաստանի դիրքորոշումը այս հարցի շուրջը։ Եթե Հայաստանը կառավարությունը բոլորովին հրաժարվել է այս հարցը սեղանի վրա դնելուց, Մակրոնը Պապից ավելի կաթոլիկ չի լինելու։ Եթե մենք շարունակենք ճնշում բանեցնել և ՀՀ կառավարությունն էլ իր հերթին սեղանին դնի այս հարցը, Մակրոնը կարող է նկատի առնել մեր տեսակետը»,–ասաց նա։

Անդրադառնալով նրան, որ նախօրեին տեղի ունեցավ Եվրոպական քաղաքական համայնքի գագաթնաժողովը, ինչը ընկալվում է որպես սատարում Նիկոլ Փաշինյանին առաջիկա ընտրություններում, Մուրադ Փափազյանն ասաց. «Այստեղ երկու ուղերձ կա. առաջինը, որ եվրոպացիները համախմբվեն Հայաստանի շուրջ, ինչը Մակրոնի ծրագիրն է, որ Հայաստանը այդկերպ կարողանա ապահովել իր անվտանգությունը և իր տնտեսական զարգացումը։ Երկրորդն այն է, որ մենք ճիշտ չենք համարում, որ այդպիսի միջազգային գագաթնաժողով տեղի ունենա ընտրություններից մեկ ամիս առաջ։ Սա ուղղակի կամ անուղղակի կոչ է ի նպաստ Նիկոլ Փաշինյանի։ Սա ճիշտ չէ։ Միջազգային օրենքները թույլ չեն տալիս, որ օտար ուժերը ներդրում ունենան որևէ երկրի ներքին կյանքին»։ Հարցին՝ ինչիպի՞ն էր Ֆրանսիայի նախագահի արձագանքը իր այդ մտահոգությանը, Փափազյանը պատասխանեց. «Հասկացավ։ Ուղղակի չպատասխանեց»։

Մանրանասները՝ տեսանյութում