Այսօր՝ մայիսի 8-ին Էջմիածնից՝ հայության հոգևոր կենտրոնից մեկնարկեց «Հայաստան» դաշինքի նախընտրական քարոզարշավը: Տեղի ունեցավ հանրահավաք, որի ժամանակ ներկայացվեց Դաշինքի ծրագիրը:

«Հայաստան» դաշինքը եկել է՝ պայքարը մինչև վերջ հասցնելու և Հայոց պատմության այս ամոթալի էջը վերջնականապես շրջելու. քարոզարշավի մեկնարկին հայտարարեց ՀՅԴ անդամ Սևակ Նազարյանը։

Ելույթներով հանդես եկան՝ ՀՅԴ Հայաստանի ԳՄ ներկայացուցիչ ԱԺ «Հայաստան» խմբակցության պատգամավոր Իշխան Սաղաթելյանը, «Առաջ» կուսակցության ղեկավար Սևակ Խաչատրյանը, ՀՅԴ Հայաստանի Գերագույն մարմնի անդամ, ԱԺ «Հայաստան» խմբակցության պատգամավոր Քրիստինե Վարդանյանը, Հ ԱԺ «Հայաստան» խմբակցության պատգամավոր Աննա Գրիգորյանը, ՀՀ երկրորդ նախագահ Ռոբերտ Քոչարյանը:

«Մենք մեր երթը սկսում ենք Էջմիածնից և դա պատահական չէ։ Դա իր մեջ ունի խորհուրդ, ունի բովանդակություն, ունի իմաստ»,- հայտարարեց Իշխան Սաղաթելյանը։ «Այսօր մեր ինքնությունը վտանգի տակ է։ Եվ այդ ինքնության կրողը, պահպանողըը՝ Հայ Առաքելական Սուրբ եկեղեցին, վտանգված է և թիրախի տակ։ Այսօր Հայաստանի տարածքային ամբողջականությունը խաթարված է, ինքնիշխանությունը՝ վտանգված, հանձնված օտարներին, որոնք Հայաստանի վարչախմբի հետ պայքարում են մեր ինքնության դեմ։ «Հայաստան» դաշինքը մեր ժողովրդին ներկայանում է ծրագրով, թիմով, երկիրը այս իրավիճակից դուրս բերելու համար»,- նշեց Իշխան Սաղաթելյանը։

Սևակ Խաչատրյանը դիմելով ներկաներին ասաց. «Հպարտ եմ, որ «Հայաստան» դաշինքի ընտրարշավը սկսվել է հենց համայն հայության հոգևոր կենտրոն Էջմիածնից, իմ հարազատ քաղաքից: Ամիսներ առաջ մեր թիմը Վաղարշապատի ընտրություններում էջմիածնեցիների, վաղարշապացիների կողմից ստացավ ավելի քան 10․000 քվե և ես գիտեմ, որ դրանք քվեներ չէին ուղղակի կապված միայն համայնքի հետ: Այդ քվեները մարդկանց պահանջն էր, իսկ պահանջը մեկն էր՝ ազատվել այսօրվա իշխանություններից, երկրում հաստատել բարոյական և իրական սիրո մթնոլորտ, որտեղ եղբայրը եղբոր հետ թշնամի չի լինելու, որտեղ քաղաքական հայացքների համար մարդկանց և իրենց հարազատներին աշխատանքից չեն ազատելու»:

Անդրադառնալով քարոզարշավի մեկնարկի թվականին Քրիստինե Վարդանյանն ասաց. «Այսօր մայիսի 8-ն է։ Ուղիղ ութ տարի առաջ հենց այս օրը մեզ խոստացան դրախտային երկիր, բայց մեզ առաջնորդեցին դեպի դժոխքի դռները։ Խոստացան թռիչքային տնտեսություն, բայց բերեցին թռիչքային թանկացումներ և կրկնապատկված պետական պարտք»:

Աննա Գրիգորյանն էլ իր խոսքում նշեց. «Միասին փակելու ենք փաշինյանական պատերազմի, պարտությունների և նվաստացման էջը և հեռացնելու ենք այս վախկոտ, Ալիևի խամաճիկ իշխանություններին»։

Եզրափակիչ ելույթով հանդես եկավ Դաշինքի առաջնորդ Ռոբերտ Քոչարյանը: Նա խոսեց առաջիկա ընտրությունների առանձնահատկությունների մասին, նշելով, որ Հայաստանի պատմության մեջ չի եղել այնպիսի ընտրություն, որ պայքարը լիներ ինքնության, եկեղեցու և ազգային արժեքների համար:

«Հետևել եմ բոլոր ընտրություններին, մի մասին մասնակցել եմ անմիջական, չեմ հիշում ու չի եղել, որ ընտրությունները լինեն ինքնության, եկեղեցու ու ազգային արժեքների համար, չի եղել ՀՀ պատմության մեջ նման բան: Չեմ հիշում, որ ընտրությունների հիմնական խոսույթը լիներ պատերազմ, թե խաղաղություն: Սա յուրահատուկ է, այս երևույթը բերել են այս իշխանությունները՝ տարանջատելով մեր ժողովրդին, մեր լեռներն ու պատմությունը: Այս մարդիկ մեր ժողովրդին իրար դեմ լարելու ու պատմությունը բաժանելու համար պետք է պատասխան տան: Այսօր իշխանությունների հիմնական նախընտրական խոստումը պատերազմն է, որովհետև ուրիշ ասելիք չունեն»,- ասաց Ռոթբերտ Քոչայանը

Նա անդադարձավ նաեւ տնտեսական մի շարք խնդիրների, որոնք կարող են լուծվել եւ երկրի համար առաջընթաց ապահովել Դաշինքի հաղթանակով:

Ռոբերտ Քոչարյանը ներկայացրեց Հայաստանի անվտանգության մոդելը՝ ժամանակակից ու մարտունակ բանակ, ուժեղ առաջնորդ, հզոր դաշնակից:

«Ուրիշ մոդելներ մարդկությունը դեռ չի հորինել: Մեզ սպառնում են պատերազմով, բայց կա մի պարզ ճշմարտություն՝ պատերազմը սկսվում է այն ժամանակ, երբ ագրեսորը վստահ է, որ իր հաղթանակի հավանականությունը չափազանց մեծ է: Այլ պարագայում ոչ մի երկիր պատերազմ չի սկսում: Մենք ձգտում ենք խաղաղության, բայց այն պետք է լինի երաշխավորված: Չի կարող անվանվել խաղաղություն մի իրավիճակ, երբ ամեն ինչ կախված է մի մարդու քմահաճույքից, սա խաղաղություն չէ, սա նվաստացում է: Մենք դա թույլ չենք տալու»,- ասաց Դաշինքի առաջնորդը:

Հանրահավաքն ավարտվեց երթով՝ դեպի Մայր Աթոռ Սուրբ Էջմիածին:

Մանրամասները՝ տեսանյութում

https://youtu.be/KNCg9oLtMeQ