Այսօր՝ մայիսի 9-ին, հաղթանակի օրվա առթիվ Եռաբլուր են այցելել «Հայաստան» դաշինքի անդամները, հարգանքի տուրք մատուցել արցախյան պատերազմների նահատակների հիշատակին:

Հայաստանի գործող իշխանությունը նպատակաուղղված կերպով արժեզրկում է ազգային պատմության հերոսական էջերն ու մարտական հաղթանակները՝ սեփական անկարողությունն ու միակողմանի զիջումների քաղաքականությունն արդարացնելու համար. լրագրողների հետ զրույցում ասել է ՀՀ պաշտպանության նախկին նախարար, «Հայաստան» խմբակցության ղեկավար Սեյրան Օհանյանը։

Նա մասնավորապես նշել է, որ եթե նախկինում մայիսի 9-ը փառապանծ եռատոն էր, ապա այսօր, «ապաշնորհ կառավարիչների» գործողությունների պատճառով, հայ ժողովուրդն ստիպված է այդ օրը դիմավորել խորը կսկիծով՝ Արցախի կորստի և Ադրբեջանի իրականացրած էթնիկ զտումների ֆոնին։

Անդրադառնալով Նիկոլ Փաշինյանի վերջերս արած հայտարարությանը, թե Ղարաբաղյան շարժումն իբր «ճակատագրական սխալ» էր, Օհանյանն ընդգծել է, որ նման խոսքեր կարող է ասել միայն այն մարդը, ով ստի հիմքի վրա է կառուցել իր կառավարման սկզբունքը։

Օհանյանի խոսքով՝ Փաշինյանը ոչ միայն պարտության, պատերազմի, այլեւ հայ ժողովրդի նսեմացման խորհրդանիշն է. «Այսօր պահն է, որ հայ ժողովուրդը գիտակցի, որ այս իշխանությունների ապիկար եւ Արցախի նկատմամբ դավաճանական կեցվածքի շնորհիվ գնում ենք ողբերգական ճանապարհով: Այդ ճանապարհը պետք է արգելափակվի, այս նսեմացման եւ զրոյին տանելու ընթացքը պետք է կանգնեցվի: Ժողովուրդը պետք է մերժի»:

Եռաբլուրում էին նաեւ Արցախի քաղաքական ղեկավարության ներկայացուցիչները:

Լրագրողների հետ զրույցում Արցախի նախագահ Սամել Շահրամանյանը ասել է. Խաղաղությանը դեմ չենք, ցանկացած գործողության, որ տարածաշրջանում, մեր հարևանների հետ խաղաղություն կհաստատի, կողմ ենք:

«Այլ հարց է, թե ինչ որակի խաղաղություն ենք ուզում ունենալ, ի՞նչ գնով, ի՞նչի հաշվին։ Սա ընտրության հարց է։ Երբ մեր հայրենիքի մի մասը կորցրել ենք, Հայաստանի տարածքների մի մասը կորցրել ենք, կան անհետ կորածներ ու Բաքվում պահվող գերիներ, ինչպե՞ս կարելի է սա արժանապատիվ խաղաղություն համարել»,- նշել է նա։

Մանրամասները՝ տեսանյութում