Aravot.am-ի հետ զրույցում ՀՅԴ Բյուրոյի անդամ, ԱԺ «Հայաստան» խմբակցության պատգամավոր Լիլիթ Գալստյանը նշեց, որ Բարձրագույն կրթության և գիտության մասին ՀՀ օրենքի 26-րդ հոդվածի 7-րդ կետով. «Բուհի և դրա կառուցվածքային միավորների կառավարման մարմիններում, ինչպես նաև ակադեմիական միավորների ղեկավար պաշտոններում արգելվում է որևէ կուսակցության անդամ հանդիսացող կամ հանրային պաշտոններ կամ հանրային ծառայության պաշտոններ զբաղեցնող անձանց ներգրավումը։ Նշված հանգամանքի առաջացումը հիմք է բուհի նշված պաշտոններից անձի ազատման համար՝ տվյալ պաշտոնում նշանակելու կամ առաջադրելու իրավասություն ունեցող մարմնի կողմից՝ հանգամանքի առաջացման մասին իրազեկվելու պահից»։

Իսկ 28-րդ հոդվածի 12-րդ կետի համաձայն. «Հոգաբարձուների խորհրդի անդամ չի կարող լինել այն անձը, որը կուսակցության անդամ է կամ զբաղեցնում է հանրային պաշտոններ կամ հանրային ծառայության պաշտոններ»։ Պատգամավորի խոսքով՝ նույն օրենքի 31-րդ հոդվածի 6-րդ կետի համաձայն՝ հանրային բուհի ռեկտորն իր առաջադրման ժամանակ և պաշտոնավարման ընթացքում չի կարող լինել որևէ կուսակցության անդամ, պարտավոր է դրսևորել քաղաքական զսպվածություն և չեզոքություն։ «Քանի որ մեր օրերում խայտառակորեն ոտնահարված են բոլոր օրենքներն ու բարեվարքության կանոնները, իսկ լրբախոսությունը, ատելության խոսքը, բռնության կոչերը համատարած են իշխող քաղաքական խմբի կողմից, ռեկտորն էլ իրեն թույլ է տվել սանձարձակություններ, որովհետև գիտի, որ Հայաստանում չկա պատժելիություն, և կա սելեկտիվ արդարադատություն։

Մենք տեսնում ենք, որ համատարած չարաշահվում է վարչական ռեսուրսը ու կրթական բաղադրիչը։ Եթե նման վարքագիծ դրսևորեր որևէ ընդդիմադիր քաղաքական ուժի ներկայացուցիչ, հաստատ հիմա արդարության մահակը իջել էր նրա գլխին։ Սա է ամբողջ Հայաստանի «ժողովրդավարության» պատկերը։ Վարչապետն էլ աջ ու ձախ հանձնարարություններ է տալիս իր արձակուրդում եղած ժամանակ, ամեն ինչ անում են, որովհետև կա ամենաթողություն և իշխանությունը ամեն գնով պահելու մարմաջ։ Ի դեպ, արդյոք համատեղելի՞ են բուհի կառավարման խորհրդի նախագահի պաշտոնն ու Սուրեն Պապիկյանի այս քարոզչությունը»։

Լիլիթ Գալստյանը նաև փաստեց, որ օրենքի 26-րդ հոդվածի 7-րդ կետով՝ բուհի և դրա կառուցվածքային միավորների կառավարման մարմիններում, ինչպես նաև ակադեմիական միավորների ղեկավար պաշտոններում արգելվում է որևէ կուսակցության անդամ հանդիսացող կամ հանրային պաշտոններ կամ հանրային ծառայության պաշտոններ զբաղեցնող անձանց ներգրավումը, սակայն Սուրեն Պապիկյանը ՔՊ վարչության անդամ է, ինչը ևս օրենքի խախտում է. «Ըստ էության՝ բուհի կառավարման խորհրդի նախագահը քաղաքական քարոզարշավի մեջ է, ինչն արգելված է օրենքով։ Եվ սա այն քաղաքական ուժն է, որն իշխանության էր եկել կրթական համակարգը չքաղաքականացնելու խոստումով, բայց մենք գիտենք, որ բուհերի կառավարման խորհուրդներն օկուպացված են իրենց սիրելիներով, և իշխող չափանիշը հավատարմությունն է։ Ես գիտեմ նաև, որ շատ դեկանների ուղղակի հետապնդում են կուսակցական պատկանելության համար, եթե նույնիսկ հրապարակային քարոզչական գործունեություն չեն իրականացնում։ Մենք գործ ունենք կրկնակի ստանդարտների, վարչական ռեսուրսների օգտագործման, նախընտրական խոստումների և կեղծ իրականության բախման հետ»։