Մայիսի 28-ին, Առաջին Հանրապետության օրվա առիթով, Սարդարապատ էին այցելել «Հայաստան» դաշինքի անդամները, ՀՀ երկրորդ նախագահ, Դաշինքի առաջնորդ Ռոբերտ Քոչարյանի գլխավորությամբ:

Միջոցառումը մեկնարկեց տերունական աղոթքով, Արթուր Խաչենցի կատարմամբ հնչեց «Գինի լից» երգը:

Ելույթներ ունեցան ՀՅԴ Բյուրոյի ներկայացուցիչ Արմեն Ռուստամյանը, Ֆրանսահայ հասարակական գործիչ Մելիք Գարագավորյանը, Աննա Հարությունյանը, ՀՅԴ Հայաստանի ԳՄ ներկայացուցիչ Իշխան Սաղաթելյանը, Դաշինքի առաջնորդ Ռոբերտ Քոչարյանը:

Արմեն Ռուստամյանը Դաշնակցության անունից ներկաներին շնորհավորեց Մայիսի 28-ի՝ Հայաստանի առաջին հանրապետության օրվա առթիվ:

«Այս օրը մեզ համար միշտ եղել է սրբազան։ Այն ունի մեծ խորհուրդ, որն առաջին հերթին կապված է նրա հետ,թե որքանով ենք կարևորում մեր ինքնությունը, անկախությունն ու պետականությունը», -իր ելույթում ասաց Արմեն Ռուստամյանը՝ մեջբերելով մեծանուն բանաստեղծ Պարույր Սևակի խոսքը. «Սերունդներ, ձեզ ճանաչե՛ք Սարդարապատից»։

«1918-ին չկար պետություն, բայց կար համախմբված հայություն։ Կար ինքնությունը պահպանելուն նվիրված հայություն։ Այդ հավաքական ուժը՝ պետություն չունենալով, կարողացավ երեք ճակատով կանգնեցնել թշնամուն՝ Բաշ Ապարանում, Ղարաքիլիսայում և Սարդարապատում»,- նշեց նա:

«Պատմությունը ցույց տվեց, որ թշնամուն կարելի էր կանգնեցնել դատարկ ձեռքերով, եթե ունես պայքարի ոգի ու հասկանում ես, որ գոյությունդ անիմաստ է դառնում, եթե ինքնությունից հեռացել ու հրաժարվել ես։ Ինչ ունենք այսօր, ունենք մի վիճակ, երբ մեր աչքի առաջ նորից տեղի ունեցավ ցեղասպանություն. հայաթափվեց Արցախը, կորցրինք մեր հայրենիքի մի մասը և տարածքներ ունենք կորցրած արդեն ՀՀ-ից, ու այն պատճառով, որ մեր ուժի աղբյուրներից հեռացանք։ Սա ակնհայտ ցույց է տալիս, որ ունենալով նույնիսկ երկու պետություն՝ չունեինք այնպիսի ղեկավարություն, որ հասկանար ինքնության կարևորությունը։ Պետության, պետականության ու իրական ինքնիշխանություն ունենալու կարևորությունը հասկանար։ Մեզ առաջնորդեցին մարդիկ, որոնք մեզ տարան ինքնակործանման ճանապարհով։ Պետականություն ունենալու պարագայում առաջին անգամ մեր պատմության մեջ տեսանք ցեղասպանություն»,- ասաց Արմեն Ռուստամյանը։

«Հայ և հաղթանակ բառերը դարձել են այս իշխանությունների համար մերժելի, վախենում են դրանից։ Այս մարդիկ ապացուցում են մեզ, որ պարտությունը մեզ հաջողություն է բերել։ Մեզ ասում են՝ Արցախում պարտվել ենք մտածված, որ պահպանենք ՀՀ անկախությունը։ Սրանից ավել ինքնախոստովանություն, որ իսկապես կապ չունի այս մարդը մեր սերնդի հետ, կապ չունի այս մարդը մեր Սարդարապատի, Ղարաքիլիսայի ու Բաշ Ապարանի հերոսների հետ, չկա»,- ասաց ՀՅԴ Բյուրոյի ներկայացուցիչը։

«Սփյուռքը կմիանա համընդհանուր այս պայքարին՝ ամեն գնով հեռացնելու թրքամետ վարչախմբին: Սփյուռքը միանում է այս պայքարին, որովհետեւ Հայաստանի Հանրապետության շարունակությունն է: Սփյուռքը հայության անբաժանելի մասն է: Սփյուռքը անքակտելի է հայրենիքից »,- հայտարարեց Մելիք Գարագավորյանը:

Իշխան Սաղաթելյանն իր ելույթում նշեց, որ պետության հիմքը թշնամու երաշխիքներն ու ողորմածությունը չեն, այլ սեփական ուժն ու արժանապատվությունը: Նա հիշեցրեց Հայոց պատմությունը փոխած փառահեղ հաղթանակների մասին, երբ պատերազմի պայմաններում հայ ժողովուրդը մնաց միայնակ՝ դեմ առ դեմ իրեն ոչնչացնել ցանկացող թշնամու հետ։ Սակայն կար հաղթելու անկոտրում կամք։

«Այսօր մեզ փորձում են համոզել, որ միակ ճանապարհը զիջելն ու ծնկի գալն է, առաջ է մղվում այն կեղծ թեզը, որ թշնամու ցանկությունները բավարարելով՝ կարելի է ապրել խաղաղ ու երջանիկ»,- ասաց նա։

Եզրափակիչ ելույթով հանդես եկավ Դաշինքի առաջնորդ Ռոբերտ Քոչարյանը: «Սարդարապատը մեր պատմության պարզապես հերոսական էջը չէ, Սարդարապատը հիշեցնում է՝ ինչ կարող է անել հայ ժողովուրդը, երբ վտանգված է պետականությունը և երբ միասնական են։ 108 տարի առաջ մեր ժողովուրդը կանգնեց ընտրության առաջ և ընտրեց պետությունն ու պայքարը։ Այսօր իրավիճակն այլ է, բայց վտանգը նույնքան իրական»,- ասաց նա:

Վերջին տարիներին Հայաստանը թուլացել է, այն թուլացրել են ներսից, պառակտել են․ «Մարդիկ հոգնել են ստից, ատելությունից, անպատասխանատվությունից, հավերժ խոստումներից, քաոսից, հոգնել են պարտություններից, բոլորս ենք հոգնել։ Պետությունը չի պահպանվում ինքն իրենով, պետությունը պահում են մարդիկ՝ իրենց կամքով ու պատասխանատվությամբ և որոշմամբ։ Հունիսի 7-ին սովորական ու հերթական ընտրություն չէ, սա ընտրություն է՝ կկարողանա՞նք նույն պատասխանատվությամբ պահպանել մեր պետականությունը, թե՞ թույլ կտանք վերջնականապես քայքայել այն»,- նշեց Դաշինքի առաջնորդը:

«Ոչ ոք ձեզանից զոհաբերություններ չի պահանջում, ինչպես 108 տարի առաջ։ Ընդամենը սթափ որոշում։ Մենք պարտավոր ենք ինքներս մեզ հարց տալ՝ ինչպիսի՞ երկրում ենք ուզում ապրել և ի՞նչ երկիր ենք թողնելու երեխաներին։ Ուժեղ, հայկական, ինքնիշխա՞ն, թե՞ տարածք, որի ճակատագիրը որոշում են ուրիշները։

Մեր ժողովուրդը 108 տարի առաջ ապացուցեց, որ կարող է պահպանել և փրկել պետականությունը։ Վստահ եմ՝ կկարողանա նաև հիմա»,- ընդգծեց Ռոբերտ Քոչարյանը։

Տեսանյութն՝ այստեղ