Այսօր՝ մայիսի 31-ին «Հայաստան» դաշինքի ներկայացուցիչներն ու համակիրները Արամ Մանուկյանի արձանի, Սուրբ Աննա եկեղեցու եւ Մատենադարանի հարող տարածքներից երթ իրականացրեցին դեպի Ազատության հրապարակ, որտեղ մեկնարկեց «Հայաստան» դաշինքի անփոփիչ հանրահավաքը:

Ելույթներ ունեցան ՀՅԴ Հայաստանի ԳՄ ներկայացուցիչ Իշխան Սաղաթելյանը, հասարակական գործիչ Արսինե Մինասյանը, «Առաջ» կուսակցության նախագահ Սեւակ խաչատրյանը, «Հայաստան» դաշինքի անդամներ Արծվիկ Մինասյանը, Քրիստինե Վարդանյանը, Աննա Գրիգորյանը, Դաշինքի առաջնորդ, ՀՀ երկրորդ նախագահ Ռոբերտ Քոչարյանը:

«Ձեր պայքարը ոչ թե մեզ իշխանության բերելու համար է, այլ ձեր պայքարով դուք ձեր հայրենիքի, ձեր պետականության և ձեր ինքնության կողքին եք: Ուղիղ մեկ շաբաթից հայը կորոշի իր ճակատագիրը։ Հայ մարդու եւ մեր պետականության ճակատագիրը չի որոշվում ո՛չ Մոսկվայում, ո՛չ՝ Վաշինգտոնում, ո՛չ՝ Բրյուսելում, ո՛չ էլ մեկ այլ մայրաքաղաքում, որոշվում է Հայաստանում: Մենք տեր ենք մեր ճակատագրին: Հունիսի 7-ը պարզապես քվեարկության օր չէ, այլ իշխանափոխության օր է, Նիկոլ Փաշինյանին վռնդելու օր»,-հայտարարեց Իշխան Սաղաթելյանը:

Ցուցադրվեց կարճ տեսանյութ «Հայաստան» դաշինքի եւ քաղաքական միավորների պայքարի անցած ճանապարհից:

Դաշինքի անդամներն իրենց ելույթներում կարեւորեցին ընտրություններին քաղաքացիների ակտիվ մասնակցությունը՝ նշելով, որ երկիրը կանգնած է կարևոր ընտրության առջեւ եւ սա առաջին հերթին ինքնության պահպանման պայքար է:

Ռոբերտ Քոչարյանը եզրափակիչ ելույթում մասնավորապես ասաց. «Մեր հետագա քայլերի բանաձևը շատ պարզ է՝ չկա Նիկոլը պաշտոնին՝ չկան խնդիրներ Հայաստանում: Չկա Նիկոլը՝ չկա ճգնաժամ, չկա Նիկոլը՝ չկա աղքատություն, չկա Նիկոլը՝ չկա պատերազմ, չկա Նիկոլը՝ չկա ազգային նվաստացում, չկա Նիկոլը՝ չկա 300 հազար ադրբեջանցիների վերադարձ; Բոլոր առկա խնդիրները լուծելի են, ես գիտեմ՝ ինչպես դա անել, և մենք դա կանենք: Մենք արդյունավետ կառավարման հարուստ փորձ ունենք: Հունիսի 7-ին ժողովուրդը պետք է գնա ընտրության և ընտրի Հայաստանը, փորձը, պատասխանատվությունը»:

Հանրահավաքի ավարտից հետո մեկնարկեց պայքարի եւ իրազեկման երթ՝ Երեւանի կենտրոնով:

Տեսանյութն՝ այստեղ