Այսօր՝ հունիսի 5-ին Երևանի «Դինամո» մարզադահլիճում տեղի ունեցավ «Հայաստան» դաշինքի ամփոփիչ հանդիպումն ընտրողների հետ:

Միջոցառումը մեկնարկեց Հայաստանի Հանրապետության օրհներգով:

Ելույթ ունեցողները շնորհակալություն հայտնեցին Դաշինքի աջակիցներին ու համակիրներին մեկ ամիս շարունակ իրենց հետ լինելու, իրենց ոգեւորելու համար: Նրանք առաջիկա ընտրությունները կարեւորեցին Հայաստանի լինել- չլինելու, ապագա ունենալ- չունենալու տեսանկյունից՝ նշելով որ լիահույսն են իրենց հաղթանակի հարցում:

Դաշինքի առաջնորդ, ՀՀ երկրորդ նախագահ Ռոբերտ Քոչարյանը եզրափակիչ ելույթում մասնավորապես ասաց. «Մեր ժողովուրդը չի՛ ուզում, որ իրեն կառավարի Ալիևի ծառան: Այն մարդը, որը բերել է արցախյան պատերազմ, կորուստ՝ սարսափելի հետևանքներով, իրավունք չունի նույնիսկ «խաղաղություն» բառն օգտագործել։ Նիկոլ Փաշինյանը ֆեյքային խաղաղություն է, ֆեյքային իշխանություն է և ֆեյքային բովանդակություն է: Մենք ձգտում ենք խաղաղության և հասնելու ենք դրան. մենք հասնելու ենք կայուն, արժանապատիվ խաղաղությանը։ Հայաստանում չկա ոչ մեկը, ով ունի իմ փորձը անվտանգային հարցերում, պետական կառավարման հարցերում, նաև՝ խոշոր բիզնեսում պաշտոնաթողությունից հետո աշխատելու հարցում: Այդ համակցված փորձը ունիկալ է, և ես պատրաստ եմ ամբողջությամբ նվիրել այդ փորձը, իմ ժամանակը, իմ ներվերը, իմ ամեն ինչը մեր երկրի հաջողությանը: Եվ այդ փորձին գումարենք այն թիմը, որը մենք ունենք՝ խելոք, կիրթ, համարձակ թիմ, որը պատրաստ է արհեստավարժորեն շարժել երկիրը առաջ»:

Ամփոփիչ հանդիպմանը ելույթներով հանդես եկան «Հայաստան» դաշինքի անդամ, ՀՅԴ Հայաստանի ԳՄ ներկայացուցիչ Իշխան Սաղաթելյանը, Դաշինքի անդամներ՝ Աննա Գրիգորյանը, Լեւոն Քոչարյանը, Քրիստնե Վարդանյանը:

Մանրամասները՝ տեսանյութում