«Հայաստան» դաշինքն այսօր դիմել է Սահմանադրական դատարան՝ պահանջելով անվավեր ճանաչել հունիսի 7-ի խորհրդարանական ընտրությունները։

Դաշինքի դիմումը ՍԴ են ներկայացրել փաստաբաններ Հովհաննես Խուդոյանը, Տաթևիկ Սողոյանը, «Հայաստան» խմբակցության քարտուղար Արծվիկ Մինասյանը։

Հովհաննես Խուդոյանը լրագրողների հետ զրույցում հայտնել է, որ Սահմանադրական դատարան ներկայացված դիմումի հիմքում դրվել են այնպիսի էական հանգամանքներ ու փաստարկներ, որոնք իրենց ամբողջության մեջ ցույց են տալիս՝ ընտրությունները թափանցիկ չեն եղել և ընթացել են համակարգային խախտումներով։

Փաստաբանը չի բացառել որ իրենք ևս, ինչպես «Ուժեղ Հայաստան»-ը, կմիջնորդեն, որ ՍԴ որոշ դատավորներ չմասնակցեն դիմումների քննությանը, քանի որ փոխկապակցված են ՔՊ-ի հետ։

Արծվիկ Մինասյանի խոսքով՝ իշխանությունը ինքը ոչ միայն գործադրել է ողջ վարչական ռեսուրսը, հանրության պատկանող ֆինանսական միջոցները ոչ միայն ընտրակաշառքի տեսքով տվել է ընտրողներին, նաև գործադրել է իր ամբողջ, այսպես կոչված, լիազորությունները բռնության ենթարկելու քաղաքացիներին։

«Մի մոռացեք, որ այս քարոզարշավի ընթացքում նաև մարդ է մահացել քրեակատարողական հիմնարկում, մի մոռացեք, որ այս իշխանությունը Հայաստանում երբևէ եղած ամենախայտառակ ընտրություններն անցկացրած իշխանությունն է։ Հիմա իրենք, բնական է, բարձրաձայնում են, թե իբր ընդդիմադիրները ընտրակաշառքով են ընտրվել։ Ավելին Նիկոլ Փաշինյանը հիմա էլ հրահրում է քաղաքացիական բախումներ, քաղաքացիական բախումների անոնս է անում»,- ասել է Արծվիկ Մինասյանը։

Նշենք, որ Հունիսի 7-ի խորհրդարանական ընտրությունները անվավեր ճանաչելու պահանջով Սահմանադրական դատարան են դիմել «Ուժեղ Հայաստան»-ը, «Միասնության թևեր»-ը և ԲՀԿ-ն։

Տեսանյութն՝ այստեղ