ՈՒԱՇԻՆԿԹԸՆ.- Ամերիկայի Հայ Դատի յանձնախումբը դատապարտեց Թրամփի վարչակազմին կողմէ տրուած ազդանշանը՝ Պաքուի դէմ պատժամիջոցներ հաստատող որոշումը շրջանցելու կապակցութեամբ, որ ճամբայ պիտի հարթէ Պաքուին ամերիկեան օժանդակութեանց շարունակութեան:

«Նախագահ Թրամփ կը շարունակէ անտեսել «Նախ Ամերիկան» (America First) խոստումը՝ կանաչ լոյս վառելով Ատրպէյճանին տրամադրուող արտաքին օժանդակութեանց առջեւ եւ ամերիկացի տուրք վճարողներուն դրամները նուիրելով քարիւղով հարուստ ցեղասպան բռնապետութեան մը: Վարչակարգ մը, որ հայ պատանդներ կը պահէ, հայկական տարածքներ կը գրաւէ, քրիստոնէական եկեղեցիներ կը քանդէ եւ կ՛արգիլէ գաղթականներու Արցախ վերադարձը», նշեց Ամերիկայի Հայ Դատի յանձնախումբի գործադիր վարիչ Արամ Համբարեան:

«Ատրպէյճանի իշխող Ալիեւ ընտանիքը, որուն հարստութիւնը տասնեակ միլիառաւոր տոլարներու կը հասնի, ո՛չ պէտք ունի, ո՛չ ալ արժանի է ամերիկացի ժողովուրդի առատաձեռնութեան», եզրափակեց Համբարեան:

Հայ Դատը կը զօրակցի ARMENIA Security Partnership Act (H.R. 6840) բանաձեւին, որ ներկայացուած է քոնկրեսականներ Կաս Պիլիրաքիսի (Հ․, Ֆլորիտա) եւ Ֆրենք Փալոնի (Դ․, Նիւ Ճըրզի) կողմէ: Անիկա կ՛արգիլէ նախագահին շրջանցել նշեալ պատժամիջոցները մինչեւ այն ատեն, որ Ատրպէյճան դուրս չէ բերած իր ուժերը հայկական տարածքներէն, ազատ չէ արձակած բոլոր հայ պատանդները, դադրեցուցած չէ Հայաստանի նկատմամբ թշնամանքը եւ չէ ճանչցած Արցախէն բռնի տեղահանուած հայերու վերադարձի իրաւունքը:

Ամերիկահայերը կրնան այցելել կայքը՝ յորդորելու իրենց քոնկրեսականները՝ դառնալ H.R.6840-ի համահովանաւոր: