Հայոց ցեղասպանության միջազգային ճանաչման գործընթացը հնարավոր չէ կասեցնել. օգոստոսի 14-ին ԱԺ-ում լրագրողների հետ զրույցում ասել է ՀՅԴ Հայաստանի ԳՄ անդամ, «Հայաստան» խմբակցության պատգամավոր Գեղամ Մանուկյանը:

«Մեր խնդիրն է, որ նույնիսկ հանրաքվեի չհասցնենք այն խայտառակ նախագիծը, որն Ադրբեջանի ու Թուրքիայի պահանջով ձևակերպում են այս իշխանությունները։ Արարատ Միրզոյանը կասի, Փաշինյանը կասի, կելնեն վերև, կիջնեն վար՝ Հայոց ցեղասպանության միջազգային ճանաչման գործընթացը հնարավոր չէ կասեցնել։ Իրենք չունեն թուրքական այն միլիարդավոր դոլարները, որն անցնող տասնամյակներին Թուրքիան ծախսում էր, միշտ ձախողում էր»,- ասել է նա։

Մանուկյանի պնդմամբ՝ Հայոց ցեղասպանության միջազգային ճանաչումը եղել է մեր ժողովրդի ամբողջ գործունեության հիմքերից մեկը։

«Ի վերջո, պետք է գիտակցենք, որ միայն ՀՀ-ի իրենց պատկերացրած հպարտ քաղաքացիներով չէ, որ հաստատվում է Հայոց ցեղասպանությունը, և ամբողջական հայությունն ամբողջական սփյուռքի իրավունքների հարց է, արդարության վերատիրացման հարց է։ Միաժամանակ իշխանությունների այն չքմեղանքը, թե ամեն երկիր իր շահով է առաջնորդվում, այդ տրամաբանության շրջանակներում ՀՀ-ն որևէ միջպետական հարաբերություն չպետք է հաստատի, քանի որ ցանկացած պետություն որևէ համագործակցություն Հայաստանի հետ իրականացնում է՝ հաշվի առնելով նաև իր շահերը, որը նաև ձեռնտու է լինում ՀՀ-ին։ Իսկ Հայոց ցեղասպանության միջազգային ճանաչումը իրականում միայն հայ ժողովրդինը չէ, ՀՀ-ինը չէ, դա համամարդկային խնդիր է, որովհետև 20-րդ դարի առաջին ցեղասպանությունն է, որի ուսումնասիրությունը նաև հիմք է դրել Լեմկինի կողմից «ցեղասպանություն» բառի ու տերմինի հասկացության ամրագրմանը, և այս առումով ցանկացած երկրում սա նաև սեփական օրակարգ է»,- ասել է նա։

Գեղամ Մանուկյանը հավելել է, որ այն խուսանավումը, որն այս իշխանություններն իրականացնում են Հայոց ցեղասպանության միջազգային ճանաչման հետ կապված, որևէ կերպ համադրելի չէ նախորդ տասնամյակներում Հայոց ցեղասպանության միջազգային ճանաչման այն մեծ հաղթարշավի հետ, որն իրականացվում էր ՀՀ արտաքին քաղաքականության և Հայ Դատի գրասենյակների հանձնախմբերի՝ Դաշնակցության համահայկական կառույցի ջանքերով։

Մանրամասն՝ տեսանյութում