«Անցնող օրերին, երբ որ իմ դաշնակցական ընկերները կամ ընդդիմության ներկայացուցիչները այս ամբիոնից խոսում էին հայկական շահի մասին, իշխանության որոշ պատգամավորներ շատ հետևողական, մեղադրական տոնով հարցադրում են հնչեցնում, թե ինչու չեք ասում «Հայաստանի Հանրապետության շահ» և օգտագործում եք «հայկական շահ»:

Առաջին տպավորությամբ ՔՊ-ին իր ձեռագրին բնորոշ տպավորություն է, որ փորձում է այստեղ ևս գտնել հակադրություն, հակասություն, պառակտում, բայց իրականության մեջ հարցն ունի շատ խորքային արմատներ:

Հարցը հետևյալն է. Հայաստանի Հանրապետությունը, եթե չպետք է առաջնորդվի հայկական շահով, ինչո՞վ պետք է առաջնորդվի: Հայաստանի Հանրապետության և հայկական շահը փոխլրացնող, միմյանց այդ կենսական նշանակությամբ փոխկապակցված և նույնական շահերն են: Լավ իմացեք՝ երբ որ Հայաստանից հանում եք հայկական շահը, դա այլևս հայկական պետություն չէ:

Հետևաբար, այո՛, Հայաստանի Հանրապետությունը պետք է առաջնորդվի հայկական շահերով և համայն հայության շահերով: Բայց խնդիրը հետևյալն է. որտե՞ղից է գալիս այս խոսույթը, այս ամեն ինչի խորքը որտե՞ղ է: Այս ամեն ինչի խորքը «իրական Հայաստանը» կամ այսպես կոչված չորրորդ հանրապետության մոդելն է:

Ի՞նչ եք ասում դուք: Դուք ասում եք, որ մենք պետք է ունենանք նոր սահմանադրություն, և այդ սահմանադրության տերը պետք է լինի Հայաստանի Հանրապետության քաղաքացին, մտներիդ մեջ ունենալով… դե, հիմնադիրն էլ հավանաբար դուք եք: Բայց ամբողջ պրոբլեմը նա է, որ չորրորդ հանրապետության հիմնադիրը դուք չեք, չորրորդ հանրապետության ճարտարապետը Թուրքիան է, կոնստրուկտորը՝ Ադրբեջանը, նույնիսկ դիզայներական գործերը ձեզ հանձնարարված չեն, դրանով զբաղվում են եվրոպական որոշ պետություններ: Դուք այդ պրոյեկտի մեջ փիար մասնագետներն եք և սեյլս մենեջերները. փաթեթավորեք այդ գաղափարը և վաճառեք մեր ժողովրդին:

Եվ հենց այստեղից է գալիս ձեր վերաբերմունքը հայկական հարցերին, Սփյուռքին, Հայ Դատին, ազգային կազմակերպություններին և հայկական շահով առաջնորդվող մարդկանց»,- այս մասին ԱԺ իր ելույթում ասաց ՀՅդ Հայաստանի ԳՄ ներկայացուցիչ, «Հայաստան» խմբակցության պատգամավոր Իշխան Սաղաթելյանը։

Մանրամասն՝ տեսանյութում