Հայաստանում մարդու իրավունքների, քաղաքական և իրավական համակարգերի վիճակը խիստ մտահոգիչ է։ Հասարակությունն ամեն օր բախվում է նոր խնդիրների, որոնք վկայում են մարդու իրավունքների և արժանապատվության նկատմամբ վերաբերմունքի վատթարացման մասին. այսօր` օգոստոսի 28-ին «Այլընտրանքային նախագծեր» խմբի կազմակերպած «Հայաստան 2026․ իրավունքի վախճանը» խորագրով փորձագիտական քննարկման ժամանակ ասել է ՀՅԴ Բյուրոյի անդամ, ՀՀ ԱԺ պատգամավոր, Մարդու իրավունքների պաշտպանության և հանրային հարցերի հանձնաժողովի նախագահ Լիլիթ Գալստյանը նշելով, որ երկրում միաժամանակ նկատվում է քաղաքական, սոցիալական և իրավական համակարգերի շարունակական թուլացում։

Անդրադառնալով միջազգային իրավապաշտպան կառույցների գնահատականներին՝ Լիլիթ Գալստայնը նշել է, որ դրանց հրապարակած զեկույցներն ու գնահատականները ևս մտահոգիչ պատկեր են ներկայացնում Հայաստանի վերաբերյալ։ Նրա խոսքով՝ միջազգային գնահատականների համադրությունը ցույց է տալիս, որ Հայաստանը շարունակում է դասվել հիբրիդային և կիսաազատ պետությունների շարքին։

Գալստյանի խոսքով՝ սոցիալական և քաղաքացիական իրավունքների համադրությամբ Հայաստանը շարունակում է զբաղեցնել 54-րդ հորիզոնականը։ Նա ընդգծել է, որ այդ ցուցանիշը նույնն է, ինչ նախկին իշխանությունների կառավարման տարիներին, և այդ հանգամանքը հակասում է իշխանությունների՝ նախկին և ներկա իրավիճակների միջև էական տարբերության մասին հայտարարություններին։

Բանախոսը նաև պնդել է, որ Հայաստանում իշխանության կենտրոնացման գործընթացը հասել է այնպիսի մակարդակի, երբ համակարգը, իր բնորոշմամբ, աստիճանաբար վերածվում է մեկ անձի շուրջ կենտրոնացած կառավարման մոդելի։

Լիլիթ Գալստյանի գնահատմամբ՝ երկրում արդեն իսկ խաթարվել է սահմանադրական կարգը։ Նա այդ պնդումը կապել է առաջին հերթին իշխանության տարբեր ճյուղերի միջև տարանջատման և փոխզսպման սկզբունքների թուլացման հետ։

Ըստ նրա՝ պետական համակարգի բնականոն գործունեության համար անհրաժեշտ է իշխանության ճյուղերի իրական անկախություն, մինչդեռ Հայաստանում այդ սկզբունքի պահպանումը լուրջ խնդիրների առաջ է կանգնած։

Մանրամասները՝ տեսանյութում