Այսօր՝ սեպտեմբերի 2-ին, լրանում է Արցախի Հանրապետության անկախության հռչակման 35-ամյակը։

Այդ առիթով բազմաթիվ հասարակական-քաղաքական գործիչներ, Արցախի քաղաքական ղեկավարության ներկայացուցիչներ այցելել են Եռաբլուր պանթեոն՝ ծաղիկներ խոնարհել «Արցախի կանչը» հուշակոթողին։

«Երբ սեպտեմբերի 2-ին արցախահայությունը որոշեց տեր կանգնել իր իրավունքներին, իր քաղաքական հեռանկարին, իր ներկային: Ցավոք սրտի մեր պատմության ամենահիշարժան, ամենաերևելի, ամենաարժանապատիվ օրերից մեկը այսօր մթագնած է։ Մթագնած է օրվա քաղաքական իշխանության վարած անհավասարակշիռ արտաքին քաղաքականության և նույնքան անհավասարակշիռ ներքին քաղաքականության արդյունքում։ Բայց, այնուամենայնիվ, ես ուզում եմ լավատես լինել ու պատահական չէ, որ մենք, հակառակ այս մեծ անարդարությանը, այսօր էլ գտնվում ենք Եռաբլուրում, ուր հանգչում են արցախյան ազատամարտի և մեր բոլորի հավաքական արժանապատվության և իրավունքների պայքարի համար նահատակված մեր հերոսները»,- լրագրողների հետ զրույցում ասաց ՀՅԴ Բյուրոյի անդամ, ԱԺ «Հայաստան» խմբակցության պատգամավոր Լիլիթ Գալստյանը:

Նրա խոսքով՝ սեպտեմբերի 2-ը պիտի արժևորենք, որովհետև մեր երկարատև պատմության մեջ արժանապատիվ օրերից մեկն էր՝ Արցախի ինքնորոշման, ինքնորոշված ապրելու, արցախահայության իրավունքների, արժանապատվության պաշտպանության, պետականության գիտակցման օր արցախցիների և մեզ համար։

ՀՅԴ Հայաստանի ԳՄ ներկայացուցիչ, «Հայաստան» խմբակցության պատգամավոր Իշխան Սաղաթելյանը լրագրողների հետ զրույցում ասաց. «Արցախը հայկական է, և Նիկոլ Փաշինյանն այս իմաստով այն մարդը չէ, որ պետք է որոշի՝ Արցախը հայկական է, թե հայկական չէ։ Բնականաբար, նա շարունակում է սպասարկել Թուրքիայի և Ադրբեջանի վարած քաղաքականությունն ու նրանց շահերը Հայաստանում, բայց, միևնույն է, ասել եմ ու շարունակելու եմ պնդել, որ Արցախը հայկական է»:

Նա նշեց, որ բոլոր միջազգային հանդիպումներում ՀՅԴ-ն իր Հայ դատի կառույցներով Արցախի հարցը բարձրաձայնում է, բայց հարցն առաջ չի գնում, հարցը շատ դժվար է միջազգային օրակարգում պահել, քանի որ դրա թիկունքում չկա պետություն։ Ու ոչ միայն չկա պետություն, այլ պետությունը դրա դեմ է աշխատում։ «Մենք ամեն ինչ անում ենք հարցն օրակարգում պահելու համար, բայց մշտապես հանդիպում ենք ոչ միայն Թուրքիայի եւ Ադրբեջանի կառավարությունների, այլ նաեւ Հայաստանի կառավարության հակահայ քաղաքականությանը»,- ասաց Իշխան Սաղաթելյանը:

Արցախի Հանրապետության Ազգային ժողովի նախագահի պարտականությունները կատարող Գագիկ Բաղունցը լրագողներին փոխանցեց, որ Արցախի Հանրապետության ներկայացուցչությունում բազմաթիվ հանդիպումներ ու լսումներ են կազմակերպվել։ «Փորձում ենք բոլոր այն ուժերի հետ համատեղ, որոնք մտահոգված են թե՛ Արցախի ճակատագրով, թե՛ անմիջապես արցախահայության խնդիրներով, մշակել մի քաղաքականություն, որը թույլ չի տա մոռացության տալ Արցախը»,- նշեց նա:

ՀՅԴ Հայաստանի ԳՄ անդամ Գառնիկ Դանիելյանն իր խոսքում ընդգծեց. «Հերթական անգամ գալիս ենք մեր հարգանքի տուրքը մատուցելու, այդ հիշողությունը վառ պահելու, հիշատակը մեր զոհված տղերքի: Խունկ ու խոնարհում բոլոր այն տղաների հիշատակին, որ իրենց կյանքը նվիրել են հանուն հայրենիքի։ Ամոթով ենք գալիս, ես քիչ առաջ էլ ասացի, որովհետև դեռևս ասելու բան չունենք իրենց, բայց ես հույս ու հավատ ունեմ, որ մի օր իրենց շիրիմներին կգանք, կայցելենք լավ նորությունով, լավ բան կասենք իրենց։ Ո՛չ Նիկոլ Փաշինյանը, ո՛չ որևէ իշխանություն չեն կարող փակել Արցախի էջը։ Իրենց քաղաքական էջը ինչ-որ մի ժամանակ, ինչ-որ մի պահի փակվելու է, բայց Արցախինը՝ ոչ»:

ԱՀ ԱԺ պատգամավոր Վահրամ Բալայանն էլ լրագրողների հետ զրույցում նշեց. «Մենք պայքարում ենք Արցախի ժողովրդի հիմնարար իրավունքների պաշտպանության համար: Արցախահայերը պետք է հնարավորություն ունենան վերադառնալու հայրենի օջախներ»:

մանրամասները՝ տեսանյութում