Օգտուելով ՀՅԴ «Զաւարեան ուսանողական միութեան անդամներ Բագրատ Գրիգորեանի եւ Շէրիլին Տիրացուեանի Օսլոյի մէջ նորվեկիական Երիտասարդ քրիստոնեայ դեմոկրատներ կուսակցութեան կազմակերպած ուսումնական այցելութեան ծրագիրի մասնակցութեան առիթէն, ՀՅԴ Լիբանանի Հայ դատի մարմինը նամակ մը յղեց Նորվեկիոյ խորհրդարանի եւ Պահպանողական կուսակցութեան անդամ Ամալի Կունուֆսենին:

Նամակը կ՛անդրադառնար Արցախի հայ ժողովուրդի միջազգային օրէնքով ամրագրուած տունդարձի իրաւունքին, Պաքուի մէջ պահուող հայ պատանդներու ազատ արձակման, Հայաստանի Հանրապետութենէն տարածքներ բռնագրաւած ազրպէյճանական ուժերու հեռացման եւ Արցախի մէջ հայկական ազգային ու քրիստոնէական ժառանգութեան դէմ գործուող մշակութային ցեղասպանութեան դադրեցման` Հայաստանի եւ Ազրպէյճանի միջեւ արդար, համապարփակ եւ տեւական խաղաղութեան համար խիստ կարեւոր հարցերուն:

ՀՅԴ Լիբանանի Հայ դատի մարմինը երեսփոխան Կունուֆսենին, անոր կուսակցութեան եւ Նորվեկիոյ խորհրդարանին կոչ ուղղեց` գործնական աշխատանք տանելու` իսկական խաղաղութեան եւ արդար ու համապարփակ համաձայնութեան համար կենսական եղող նշեալ մարդկային իրաւանց կարեւոր հարցերու լուծման համար: