Հալեպում տիրող իրավիճակի, հայ համայնքի մասին «Հրապարակը» զրուցել է «Գանձասար» շաբաթաթերթի խմբագիր Զարմիկ Պողիկյանի հետ:

-Ի՞նչ իրավիճակ է Հալեպում հիմա:

-Այս քանի ժամը հանդարտ իրավիճակ է, առավոտյան 10.30-ի կողմերը ռուսական և սիրիական օդուժը հրթիռակոծեցին Հալեպի գնացքի կայարանին կից գտնվող պետական պահեստը, նյութական վնասներ է հասցվել: Հիմնականում գիշերներն են բախումները լինում և նման դեպքերում պարեկային ժամ են հայտարարում: Ցերեկը, հիմա էլ խաղաղ է իրավիճակը, օրվա մեջ գրեթե բոլոր ժամերին էլեկտրաէներգիա է լինում:

-Հալեպահայերն ահազանգում էին, որ հացի և ջրի խնդիր կա:

-Հացի մատակարարում արվեց, հայտարարություն դրեցինք, որ «Արամ Մանուկյան» ժողովրդական տուն ներկայանան և մեր շտապ օգնության մարմինը հաց է մատակարարում: «Սուրիահայ օգնության խաչի» կենտրոնը թե դեղատուն ունի, թե մարդկանց նպաստ է բաժանում, այդ կենտրոնը բաց է և պատրաստ է ժողվորդին դեղորայք տրամադրել, նաև անմիջական բուժման կարիք ունեցող մարդկանց մեր հայ բժիշկները պատրաստ են տեղում օգնել: Այսինքն, մեր Առաջնորդարանը և տեղական միությունները, «Արամ Մանուկյան» ժողովրդական տունը նեցուկ են կանգնած` ինչի անհրաժեշտություն ունեն, կապի մեջ կմնա մարդկանց հետ՝ հիմա հաց է տրամադրում ու դեղորայք:

-Հալեպ մտած զինյալները Առաջնորդարանից կամ հայ համայնքի տեղական ներկայացուցիչներից որևէ մեկի հետ հանդիպե՞լ են, այդ մասին որևէ տեղեկատվություն ունե՞ք: Որ, օրինակ, երաշխավորեին քրիստոնյա հայերի անվտանգությունը:

-Չեմ կարծում, թե պաշտոնական հանդիպումներ եղած լինեն, բայց ընդհանրապես ժողովրդի հանդեպ դրական վերաբերմունք ունեն, ժողովրդին փորձում են չվնասել: Փողոցում մարդկանց չեն մոտենում, նեղություն չեն տալիս ընդհանրապես: Իրենց գործը զուտ զինվորական գործ է, այսինքն, ժողովրդի հետ բախում չեն ունենում ուղղակի: Ժողովրդի հետ, որ փողոցներում խոսում են:

-Լուրեր են տարածվում, որ Հալեպի Նոր գյուղ կոչվող հայկական թաղամասում տներ են թալանվել: Նման լուրեր Ձեզ հասե՞լ են, հայերի հետ նման միջադեպեր եղե՞լ են, թե ոչ:

-Մեր հայկական շրջաններում չեն եղել, այլ շրջաններից տեղյակ չեմ, սակայն հայկական հատվածներում, մեր միությունների կենտրոններում մեր տղաները ներկա են, այսինքն, ժողովուրդը, եթե ինչ-որ բանի կարիք ունենան, կհասնեն օգնության, կհսկեն, բայց մեր շրջաններում նման բան չի եղել:

-Քաղաքի ներսում հանգիստ կարո՞ղ եք տեղաշարժվել:

-Այո, բայց որոշակի ժամերին. ընդհանրապես օրվա մեջ պարեկային ժամեր են հայտարարվում, ցերեկը մարդիկ, ովքեր ինչ-որ բանի կարիք ունեն, իջնում են վաճառատներ, անմիջապես վերցնում են ու երկար չեն մնում փողոցներում, որովհետև ապահով չէ: Տակավին պատերազմական վիճակ է քաղաքում, ինչ-որ կարիք ունենալու դեպքում, արագ ապահովում ենք ու վերադառնում ենք տները:

-Ուսման պրոցեսն էլ բնականաբար ընդհատված է:

-Ամեն բան տակավին ընդհատված վիճակի մեջ է՝ դպրոցներ, համալսարաններ, հաստատություններ, միայն հիվանդանոցներն են բաց և խանութները, որոնք սնունդ են մատակարարում, այսինքն, ոմանք իրենց արհեստանոցները բացել են, բայց տակավին, քաղաքի մեջ զգուշություն ենք ցուցաբերում:

-Հայտնի՞ է, քանի հայ կա հիմա Հալեպում:

-Ոչ, հայտնի չէ, քանի որ վերջերս մարդահամար չի եղել, հստակ չէ` որքան մնացին: Անձեր եղան, ովքեր իրենց միջոցներով դուրս եկան քաղաքից, բայց հստակ թվեր չկան: Արդեն ճանփան փակվել է, միայն մեկ օր է հնարավոր եղել դուրս գալ քաղաքից ու այլ նահանգ տեղափոխվել:

-Հալեպից դուրս գալը փաստորեն արդեն անհնա՞ր է:

-Այո, անհնար է: Չգիտենք առաջիկա օրերին ինչ կլինի անշուշտ, բայց այս պահին վիճակն այս է:

-Առավոտյան ասացին, որ Հալեպում նաև ջրի խնդիր կա:

-Այո, այդ խնդիրը լուծվում է, բնակարաններում արդեն ջուր են տվել, ժամեր կան, որ ջուրը քիչ է լինում, սակայն այդ հարցը լուծվել է, տագնապ չկա: Պահեր են լինում, երբ կապի դուրս գալ չեմ կարողանում, օրինակ, առավոտյան ավիահարվածը մեզ շատ մոտ էր, նյութական վնասներ ունեցանք ու երկար ժամանակ չէի կարողանում կապի դուրս գալ: Աղոթեցեք մեզ համար:

Հայկա Ալոյան