Տեղի ունեցաւ Հ.Մ.Ա.Կ.-ի 80-ամեակին նւիրւած հանդիսաւոր ամփոփիչ միջոցառումը

«ԱԼԻՔ», Կ. Դ. – Երէկ՝ դեկտեմբերի 6-ին, 50-ամեայ «Արարատ» մարզաւանը հիւրընկալեց կազմակերպութեան հիմնադրման ու գործունէութեան 80-ամեակի առիթով կազմակերպւած գեղարւեստական գլխաւոր միջոցառումները:

Երեկոյեան նախ մարզաւանի «Խաժակ Արզումանեան» ցուցասրահում բացումը կատարւեց մի իւրայատուկ ցուցահանդէսի, որտեղ ցուցադրւած բոլոր իրերն ու լուսանկարները հանդիսատեսին մտովի տեղափոխում էին կազմակերպութեան անցեալ 80 տարիների անցած ուղին:

Ապա «Սասունցի Դաւիթ» մարզադահլիճում տեղի ունեցաւ, իր տեսակի մէջ եզակի կազմակերպութեան 80-ամեակին նւիրւած միջոցառումների աւարտական ձեռնարկը՝ զուգորդւած գեղարւեստական կատարումներիով, արտայայտութիւններով եւ ուղերձների ընթերցմամբ:

Միջոցառումը, որի գեղարւեստական ղեկավարն էր Սեդրակ Գոջամանեանը մեկնարկեց կազմակերպութեան նոր սերնդի երաժշտական կատարումով, ղեկավար Արմէն Ասատրեանի, որից յետոյ Արփի Սիմրոջեանի ղեկավարութեամբ «Արարատ» երգչախումբը կատարեց կազմակերպութեան հիմնը: Հանդիսատեսը դիտեց կազմակերպութեան հիմնադիր անդամ Յասմիկ Յարութիւնեանի ողջոյնի խօսքը: Միջոցառումը իրարայաջորդ տեսաժապաւէննրով, հաղորդավարների ներկայացրած պատմական տւեալներով եւ միաժամանակ «Արարատ» պարախմբի, եւ երգչախմբի կատարումներով հանդիսատեսին ծանօթացնում էր Իրանում տիրող ժամանակի պատմական իրադարձութիւններին, որոնք Թեհրանի հայկական համայնքի ազգային, մտաւորական ու գաղափարական ոգով տոգորւած անձանց մղեցին հիմքը դնելու «Արարատ» միութեանը, որը 20 տարի անց վերածւեց կազմակերպութեան:

Միջոցառմանը իրենց խօսքերը փոխանցեցին Հ. Մ. «Արարատ» կազմակերպութեան կենտրոնական վարչութեան նախագահ Սոֆի Ջաղարբէգեանը, ՀՄԸՄ-ի Կենտրոնական վարչութեան ներկայացուցիչ Սանդրա Վարդանեանը, ՀՅԴ Բիւրոյի «Դրօշակ» պարբերականի գլխաւոր խմբագիր, «Համազգային» Հայ կրթական եւ մշակութային միութեան Կենտրոնական վարչութեան անդամ Արտաշէս Շահբազեանը, «ԱԼԻՔ» օրաթերթի գլխաւոր խմբագիր Արամ Շահնազարեանը, իսկ Թեհրանի հայոց թեմի առաջնորդ Տ. Սեպուհ արք. Սարգսեանի պատգամը ընթերցեց Տ. Արիստակէս քհնյ. Շահմիրեանը: Ընթերցւեց նաեւ Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվրեդեանի ուղերձը:

Վերջում կազմակերպութեան սկաուտները շքերթով եւ դրօշակագարդով մուտք գործեցին մարզադահլիճ եւ ուխտեցին հաւատարիմ մնալ ազգին, հայրենիքին եւ կազմակերպութեան ազգային ոգով տոգորւած նպատակներին ու գաղափարին:

Հանդիսութեանը ներկայ էին՝ ՀՅԴ Բիւրոյի անդամ Վիգէն Բաղումեանը, Իրանի Իսլ. խորհրդարանում իրանահայ զոյգ պատգամաւորները, Իրանում ՀՀ դեսպանութեան դիւանագիտական ներկայացուցիչները, Թ. Հ. Թ. Պատգամաւորական ժողովի ատենապետ Սուրիկ Աբնուսեանը, Թ. Հ. Թ. Թեմական խորհրդի ատենապետ Վարուժ Յովհաննիսեանը, «ԱԼԻՔ» հաստատութեան ներկայացուցիչներ Սեւան Դանիէլեանը, Հայ Աւետարանական եկեղեցու հոգեւոր հովիւ Միշէլ Աղամալեանը, Սպահանի հայոց թեմից ժամանած ազգային իշխանութեան, Հայ Դատի յանձնախմբի եւ Հ. Մ. «Արարատ» միութեան ներկայացուցիչները, Թեհրանից ազգային մարմինների ու միութիւնների ներկայացուցիչներ, արարատականներ եւ հայրենակիցներ: