ՀՅԴ Լիբանանի Կեդրոնական կոմիտէի եւ հայկական երեսփոխանական պլոքի ներկայացուցիչ Յակոբ Բագրատունի, ընկերակցութեամբ երեսփոխան Յակոբ Թերզեանի եւ ՀՅԴ Թրիփոլիի շրջանի պատասխանատու ընկերներու, այցելեց Թրիփոլիի միւթֆի շէյխ Մոհամետ Իմամի:

Հանդիպումի ընթացքին արծարծուեցան տեղական եւ շրջանային վերջին իրադարձութիւնները, ինչպէս նաեւ Թրիփոլիի եւ հիւսիսային Լիբանանի մէջ այդ իրադարձութեանց նկատմամբ արձանագրուող անդրադարձները:

Թրիփոլիի միւֆթին անհրաժեշտ նկատեց նախ եւ առաջ վերադարձնել Լիբանանի ներքին միութիւնը, պետութեան հանդէպ հաւատարմութեան ամրապնդումը եւ Լիբանանի տարբեր համայնքներու միջեւ համակեցութեան պահպանումը:

Միաժամանակ ան շեշտեց, որ Թրիփոլին ներկայ փուլին լաւագոյն փաստը կու տայ ազգային միասնութեան: Ան յոյս յայտնեց, որ Սուրիա ժողովուրդին կամքը արտայայտող պետութեան հաստատումով կարենայ պահպանել իր միութիւնը, հողային ամբողջականութիւնը եւ արաբական դերակատարութիւնը:

Երեսփոխան Բագրատունի հաստատեց, որ անհրաժեշտ է ճիգերու առաւելագոյն լարում` ամրացնելու Լիբանանի դիմադրականութիւնը ներքին եւ արտաքին փոփոխութիւններու ժխտական անդրադարձները վնասազերծելու, խնայելու համար երկրին անկումը: Ան հրամայական նկատեց ներկայ փուլին բոլորուիլ պետականութեան վերադարձի գաղափարին շուրջ` սկսելով հանրապետութեան նախագահի ընտրութեամբ եւ աստիճանաբար ձգտիլ կառոյցներու ու հաստատութիւններու վերականգնումին` միշտ յարգելով իւրայատկութիւնները, համերաշխութիւնն ու փոխադարձ յարգանքը` ի խնդիր երկրի եւ լիբանանցի ժողովուրդի միասնականութեան: