ՍԴՀԿ-ի, ՀՅԴ-ի եւ ՌԱԿ-ի Լիբանանի մարմիններու ներկայացուցիչներու հերթական հանդիպումը տեղի ունեցաւ ուրբաթ, 13 դեկտեմբեր 2024-ին, «Թէքէեան» կեդրոնին մէջ։

Հայ քաղաքական կուսակցութիւններու ներկայացուցիչները ողջունեցին Լիբանանի մէջ զինադուլի հաստատումը եւ շեշտեցին, որ պատերազմի ընթացքին կուսակցութիւններու համատեղ խորհրդակցական հանդիպումներով ճշդուած աշխատանքի ուղեցոյցին հիման վրայ հայ յարանուանական եւ բարեսիրական միութիւններու համակարգուած օժանդակութեան աշխատանքները եղած են արդիւնաւէտ։ Այդ աշխատանքները համարժէք արձագանգ գտած են հայկական թաղամասերու եւ շրջաններու մերձակայքը հաստատուած գաղթականները ներկայացնող մարմիններու կողմէ։

Ապա ժողովը յատուկ օրակարգով քննարկեց Սուրիոյ վերջին իրադարձութիւնները, արձանագրեց անոնց շատ արագ ընթացքին հետեւանքով ստեղծուած նոր իրավիճակը եւ անոր ներքեւ Հալէպի, Դամասկոսի, հիւսիսային շրջանի եւ Քեսապի հայութեան վերաբերող հարցերը։

Միջին Արեւելքի մէջ ընթացող ռազմաքաղաքական գործընթացի վերլուծումը կատարելով՝ կուսակցութիւններու ներկայացուցիչները մտահոգութիւն յայտնեցին թրքական դերակատարութեան ծաւալման, անոր ազդեցութեան գօտիներու ընդարձակման առումներով։ Լուսարձակի տակ առնուեցան Թուրքիոյ եւ Իսրայէլի շահերու համընկնումի բազմաթիւ երեւոյթներ եւ իրադարձութիւններ։

Վերադառնալով լիբանանեան օրակարգին՝ հայ քաղաքական կուսակցութիւններու ներկայացուցիչները հաստատեցին, որ 9 յունուարը պէտք է դառնայ հանրապետութեան նախագահի ընտրութեան օր։ Քննարկելով Միջին Արեւելքի իրադարձութիւններու հաւանական ազդեցութիւնները Լիբանանի վրայ՝ ժողովը վերստին ընդգծեց հայ քաղաքական-հասարակական դաշտին մէջ նոր իրավիճակներու կողմէ ստեղծուած մարտահրաւէրները միասնական ճիգերով եւ համակարգուած աշխատանքով դիմակայելու հրամայականները։