Ես ծնվել եմ Հայաստանից դուրս հակառակ իմ կամքի, որովհետև հայրենիքիցս հեռացած մեծ մայր և մեծ պապ եմ ունեցել, նրանք ցեղասպանության են ենթարկվել ու ես նրանցից եմ լսել, թե ինչ է եղել իրականում։ Ես Սփյուռքում եմ, որովհետև Ցեղասպանություն է եղել, մենք մեր կամքով չենք հայտնվել Սփյուռքում։ Այս մասին «Փաստինֆո»-ի հետ զրույցում ասաց ՀՅԴ Արևմտյան Եվրոպայի Կենտրոնական կոմիտեի ներկայացուցիչ Հրաչ Վարժապետյանը։

«Իմ հորական կողմը Էրզրումից է, իսկ մայրական կողմը՝ Կիլիկիայից, ես 2 կողմով եմ Ցեղսպանության հետնորդ ու բոլոր պատմությունները նրանցից եմ լսել և որևէ մեկը, որևէ Փաշինյան, չի կարող այդ տրամաբանությունը և իրականությունը դուրս բերել։ Ես իրական պատմությունը գիտեմ իմ մեծ հորից ու մեծ մորից, ոչ թե պատմաբաններից ։ Ընդ որում՝ պատմաբաններն էլ հաստատել են այդ պատմությունը»,- նշել է սփյուռքահայ գործիչը։

Վարժապետյանի գնահատմամբ՝ Ցեղասպանության շուրջ Փաշինյանի պնդումները ծիծաղելի են, որովհետև առաջին հերթին իր բարեկամ-պետությունները, որոնք ճանաչել են Ցեղասպանությունը խորհրդարանաների մակարդակով, անգամ ժխտման համար քրեական պատիժ են նախատեսում, ինչպես Շվեյցարիայում։ «Շվեյցարիայում այդ հայտարարությունն անելը պատահական չէր, այլ շատ մտածված։ Հենց Շվեյցարիայում Ցեղասպանության ժխտումը քրեականացված է, սա թրքահաճո քաղաքականություն է։ Այսօր ավելի քան 40 պետություն ճանաչել է Հայոց Ցեղասպանությունը, ստացվում է Փաշինյանի համար այս ամենն անիմաստ բաներ են։

Ինչ մնում է մեզ, ապա մենք Շիրազ ունենք, Չարենցը, Էմինը, որ գրել են այդ մասին, ոչի՞նչ են, մեր մեծերը, որ զոհ գնացին ցեղասպանությանը ՝ Դանիել Վարուժան, Սիամանթոն, այս բոլորը ոչի՞նչ են։ Այդ հայտարարությունը, թե պետք է հասկանալ, թե ինչ է տեղի ունեցել՝ միայն թուրքական քաղաքականության թեզ է, որ 35 տարի է, ինչ փորձում են առաջ մղել, թե Ցեղասպանության հարցը պատմաբանների քննելիք հարցն է։ Նման հայտարարությունը ոչ այլ ինչ է՝ քան դավաճանություն»,- նշել է Վարժապետյանն ու ավելացրել. «պատկերացրեք, եթե Իսրայելում փորձեր ժխտել հոլոքոստը, նա անմիջապես դատարանում կհայտնվեր, նա պետական դավաճան կհամարվեր, իսկ մեր մոտ այս ամենը շարունակվում է, սա իրապես զզվելի է»։

Գործիչը վստահեցրեց, որ Ցեղասպանության չճանաչման գործընթացը շարունակելու են ՝ հակառակ Փաշինյանի, մինչև որ Թուրքիան ինքը չկճանաչի Ցեղասպանությունը»։

Անդրադառնալով իրական Հայաստանի մասին Փաշինյանի թեզերին՝ Վարժապետյանն ասաց, որ իր համար այլևս զարմանալի չէ Նիկոլ Փաշինյանի որևէ հայտարարություն, որովհետև նա հետզհետե խորացնում է ապազգային քաղաքականության հիմքերը սասանելու իր քաղաքականությունը՝ ջուր լցնելով մեր թշնամու ջրաղացին։ Նրա գնահատմամբ՝ Փաշինյանի «գաղափարախոսությունը» ապազգային է ու էությամբ հակասում է անգամ Հայաստանում ընդունված Հայոց Ցեղասպանության 100-ամյակի առիթով ընդունված հռչակագրի էությանն ու բովանդակությանը։

«Նա ասում է, որ իրական Հայաստանն այսօրվա Հայաստանն է, բայց մեր ազգային գաղափարախոսության մեջ հայրենիքը ամբողջական Հայաստանն է ՝ այդ թվում բռնագրավված Արևմտյան Հայաստանը, Արևելյան Հայաստանը՝ Կարսով, Արդահանով ու Վանով։ Սևրի դաշնագրով Հայաստանը 160 000 քկմ տարածքով Հայաստան է, որն էլ մեր համար ամբողջական Հայաստանն է՝ բռնագրավված Թուրքիայի կողմից։ Այն Թուրքիայի, որ Փաշինյանը շարունակում է հայտարարել հարևան։ Մեզ համար Թուրքիան թշնամի է։ Մեր ընկալմամբ՝ իրական ու պատմական Հայաստանի մեջ տարանջատում դնելն ապազգային է, հայրենքը մեզ համար ամբողջական Հայաստանն է, իսկ ներկա Հայաստանը ամբողջական Հայաստանի կորիզն է, ներկա Հայաստանն է, որ պետք է ընդլայնի իր սահմանները։ Ներկան կորիզն է միայն»,- նշեց պարոն Վարժապետյանը։

Փաշինյանը նշում է, որ այդ ամբողջական Հայաստանի մասի խոսույթներով վտանգում ենք այսօրվա Հայաստանի Հանրապետությունը, ինչին արձագանքելով Վարժապետյանը նշեց․ «Մինչև 2018 թ-ը ինչպե՞ս էր Հայաստանը կարողանում գոյատևել։ Հակառակը, Հայաստանը հաղթած էր, Հայաստանը ազատագրած էր Արցախը, որն ինքը եկավ ու հանձնեց, իսկ այդ սպառնալիքները ժողովրդին շարունակ վախեցնելու համար են՝ իր աթոռը պահելու համար։ Նա պարզապես չունի ներկա Հայաստանը կառավարելու ու պահպանելու քաջություն, այլ հակառակը՝ հանձնել է Արցախը, հանձնել է Հայաստանի 200 քկմ տարածքը, և դեռ պատրաստ է զիջելու այլ հողատարածքներ, այդ թվում՝ Սյունիքի այսպես կոչված՝ միջանցքը, որն էլ կվերջնականացնի իր կապիտուլյացիան։ Եթե չի կարողանում կառավարել՝ թող հեռանա, և թողնի, որ ազգն իր ճակատագիրը որոշի»։

Վարժապետյանի դիտարկմամբ՝ այս հայտարարություններով Փաշինյանը անջրպետ է առաջացնում Սփյուռքի ու Հայաստանի միջև։ «Պետք է նշել, որ այդ խրամատը նա առաջացրել է իր պաշտոնավարման առաջին օրն իսկ, երբ վերացրեց Սփյուռքի նախարարությունը, սա արդեն նշանակում էր, որ նպատակը Հայաստանի և Սփյուռքի միջև սեպ խրելն ու այդ սեպը հետզհետե խորացնելն էր։ Սա թուրքական քաղաքականության ջրաղացին ջուր լցնելն է։ Թուրքիան միշտ է Սփյուռքը դիտարկել է որպես մեծագույն խոչընդոտ, բայց այս մարդը այստեղ էլ չի հաջողելու, մեզ համար նման վիհեր գոյություն չունեն, ինչպես որ ինքը կփորձի առաջացնել»։

Նա ընդգծեց, որ Փաշինյանը այլևս Սփյուռքի որևէ համայնքում ընկալում ու աջակցություն չունի։ «Բոլոր տեղերում պատկերը նույնն է, ինչ Գերմանիայում։ Վերջերս Ֆրանսիայում էլ եղավ նույնը, ինչ Գերմանիայում, այնտեղ չկային հայ համայնքը ներկայացնող խոշորագույն կազմակերպությունները և բոլոր տեսակի կազմակերպությունները բացակա էին։ Այսուհետև՝ Նիկոլ Փաշինյանը Սփյուռքի մեջ կհարաբերվի միայն անհատների հետ, որոնց մեջքին չկան կազմակերպություններ, ավանդական կուսակցություններ, չկա պատմություն, չկա կառույց։
Բացառապես անհատներ են, բայց այդ անհատները չեն Սփյուռքը»,- եզրափակեց նա։