Հ.Յ.Դ. Արեւելեան Ա․Մ․Ն․-ի 126-րդ Շրջանային Ժողովը տեղի ունեցաւ Մարտ 13-էն 15, Փրաւիտընսի մէջ, մասնակցութեամբ շրջաններու ներկայացուցիչներուն, Հ․Յ․Դ․ Բիւրոյի ներկայացուցիչին եւ հրաւիրուած ընկերներու։

Մանրամասնօրէն քննելէ ետք, օրակարգի վրայ տեղադրուած ազգային եւ համայնքային հարցերը, ժողովը որդեգրեց յառաջիկայ երկու տարիներու ռազմավարական ուղղութիւնը:

Շրջանային ժողովը հրապարակեց հետեւեալ յայտարարութիւնը․-

Հ.Յ.Դ. Արեւելեան Ա․Մ․Ն․-ի 126-րդ Շրջանային Ժողովը կը վերահաստատէ իր անվերապահ յանձնառութիւնը՝ Հայաստանի ապահովութեան եւ գերիշխանութեան պահպանման, ինչպէս նաեւ Արցախի ազատագրման։ Հիմնուելով մեր ազգային արժէքներուն եւ Միացեալ Նահանգներու Արեւելեան Շրջանի հայութեան հայեացքներուն վրայ, ամրօրէն կը պաշտպանենք մեր հայրենիք՝ Հայաստանի երկարատեւ կեանքն ու գոյատեւումը։ Ճակատագրական այս օրերուն ամբողջովին կը մերժուի հայրենի հողի, ապահովութեան եւ գերիշխանութեան անձնատուութեան Նիկոլ Փաշինեանի քաղաքականութիւնը։

Անոր նորագոյն հաւանութիւնը՝ անձնատուր ըլլալու Ատրպէյճանի պարտադրած պայմաններուն, ինչպէս նաեւ՝ Արցախի ժողովուրդին վերադարձի իրաւունքէն հրաժարումը, պատերազմական հայ գերիներու հայրենադարձութեան անտեսումը եւ հայկական տարածքներու գրաւման բնականոնացումը, մեր ազգային շահերուն նկատմամբ անընդունելի դաւաճանութիւններ են։

Նպատակադրային վերանորոգ յանձնառութիւն ունինք մեր յատուկ ուշադրութեան առարկան դարձնելու հայկական ծագումով ամերիկացի երիտասարդութիւնը, քաջալերելով մեր սփիւռքեան ինքնութիւնը եւ վերւտին ձեւաւորելով համայնքային մեր հաստատութիւնները՝ նոր հանգրուանին մարտահրաւէրները դիմագրաւելու նպատակով։ Արդիւնաւորելու համար մեր դերակատարութիւնը, պիտի ընդլայնենք եւ արդիականացնենք մեր մամուլը՝ հասանելի դառնալու համար բազում հարթակներու, ապահովելով դիւրահաս, ուժական, փոխազդեցիկ եւ բարձրորակ լրատուութիւն եւ առարկայական վերլուծում, ինչպէս նաեւ՝ խմբագրական հայեացք, աճող համաշխարհային ակնդիրներու եւ ընթերցողներու համար։

Իբրեւ մէկ բաժինը այս վերանորոգ տեսլականին՝ առաւել պիտի ամրապնդենք Ամերիկայի Հայ Դատի յանձնախումբին գործունէութիւնը, տեղական, նահանգային եւ ազգային մակարդակներու վրայ, հաստատելու համար անոր դերակատարութիւնը՝ իբրեւ հայկական եւ դաշնակից ամերիկացիներու միացեալ ձայնը՝ արդարութեան, ապահովութեան եւ մեր հայրենիքին աւելի ուժեղ ապագային համար։

Շրջանային ժողովը իր աշխատանքները եզրափակեց Կեդրոնական Կոմիտէի ընտրութեամբ, որ կը բաղկանայ հետեւեալ 7 անդամներէ.-

Անի Չաղլասեան ((Ներկայացուցիչ – Նիւ Ճըրզի)

Սօսի Պուրուճեան (Ռիչմընտ – Վըրճինիա)

Յովիկ Չարշաֆեան (Վուստըր – Մասաչուսէց)

Ծովինար Համագործեան (Տիթրոյթ – Միշիկըն)

Սթիւ Մեսրոպեան (Փրաւիտընս – Ռոտ Այլընտ)

Արա Նազարեան (Պոսթըն – Մասաչուսէց)

Կարօ Թաշեան (Փրաւիտընս – Ռոտ Այլընտ)