Հոկտեմբերի 9ին, Գլենդելի «Ֆընիշիա» ճաշասրահում հաւաքուել էին «Մենք ենք Գիւմրին»` ԱՄՆ Արեւմտեան ափում ստեղծուած հեղինակաւոր ու ամենաարդիւնաւէտ ծրագրերից մէկի հիմնադիրներն ու աջակիցները, աւելի քան 120 անհատներ, ամէնամեայ դրամահաւաք ձեռնարկի շրջանակներում` նշելու ծրագրի ձեռքբերումներն ու ներդրում ունենալու ապագայ նախաձեռնութիւններում: 35 հազար դոլարի նուիրատուութեամբ, նրանք եւս մէկ անգամ հաւաստիացրեցին, որ հաւատում են «Մենք ենք Գիւմրիի» կենսական առաքելութեանը:

Ձեռնարկին ներկայ էին Հայ Յեղափոխական Դաշնակցութեան Բիւրոյի ներկայացուցիչ Տարօն Տէր Խաչատուրեանը, ՀՅԴ Արեւմտեան Ամերիկայի Կենտրոնական կոմիտէի ներկայացուցիչ Կարօ Մատէնլեանն ու տարբեր կոմիտէներից ընկերներ, Հայ Դատի Արեւմտեան Ամերիկայի յանձնախմբի ատենապետ Օշին Յարութիւնեանը, Հայ Մշակութային Հիմնարկութեան, Հայ Երիտասարդաց Դաշնակցութեան Կենրոնական վարչութեան, քոյր կազմակերպութիւնների ներկայացուցիչներ:

Գիւմրեցի հարիւրաւոր պատանիներ ու երիտասարդներ, ինը տարի շարունակ, ամէն օր, հնարաւորութիւն են ունեցել եւ ունեն անվճար գիտելիքներ ստանալու` յաճախելով Գիւմրիի «Շիրվանեան» երիտասարդական կենտրոնում անգլերէնի, մաթեմատիկայի, ռուսերէնի, հայոց լեզուի եւ գրականութեան, համակարգչային դասընթացների, ինչպէս նաեւ` նկարչութեան, ազգային պարի, կիթառի, հոգեբանութեան, թատերական ու սկաուտական խմբակներ: Բարձրագոյն ուսումնական հաստատութիւններում սովորող աւելի քան երկու տասնեակ ուսանողներ էլ հնարաւորութիւն են ստացել բարձրագոյն կրթութիւն ստանալ` ստանալով կրթաթոշակներ եւ դարձել են առաջնորդներ ու կամաւոր կերպով իրենց փորձն ու գիտելիքները փոխանցել կրտսեր սերնդին` ձեւաւորելով համայնք, որ պատրաստակամ է աջակցելու հայրենակիցներին: Իսկ ամէնամեայ ամառային ճամբարն առիթ է գիւմրեցի աւելի քան 250 պատանիների` ստանալու ամենատարբեր գիտելիքներ ու հմտութիւններ, ծանօթանալու միմեանց ու ստեղծելու ընկերային նոր շրջանակներ: Այս ամէնը հնարաւոր է դարձել «Մենք ենք Գիւմրին» ծրագրի շրջանակներում, որ ստեղծուեց տարիներ առաջ Լոս Անջելեսում, Հայ Յեղափոխական Դաշնակցութեան ջանքերով, ու զարգացաւ բազում աջակիցների շնորհիւ, ովքեր համախմբուեցին` յանուն հայրենիքում երիտասարդ սերնդի բարօրութեան ու զարգացման:

««Մենք ենք Գիւմրին» ծրագիրը ինը տարի է, որ կրթական ու մշակութային տարաբնոյթ ծրագրերով ներդրում է ունեցել հազարաւոր գիւմրեցի պատանիների կեանքում: Մեր ծրագրերը շարունակաբար համալրւում են: Այսօր ուրախ ենք արձանագրելու, որ Մինա Շիրվանեանի անուան կրթաթոշակի դափնեկիրների թիւը 2025-2026 ուսումնական տարուայ համար դարձաւ 25, ինչը համարում ենք աննախադէպ ձեռքբերում: Միաժամանակ, ստեղծուեց Կրթաթոշակառու Շրջանաւարտների Խորհուրդ, որը, ի թիւս այլ գործառոյթների նաեւ կը զարգացնի բարեգործութիւնն ու մենթորութիւնը` ծառայելով համայնքին», «Ասպարէզ»ի հետ զրոյցում նշեց «Մենք ենք Գիւմրին» յանձնախմբի անդամ Շանթ Պապուճեանը:

«Մենք ենք Գիւմրին» յանձնախմբի անդամ Նազելի Խոդաբախշը (առջեւը), հանդիսավար Կասիա Պաղտասարեանը եւ Դիջէյ Գրեգը (աջին)
Ձեռնարկի ընթացքում ցուցադրուած տեսանիւթերը լաւագոյն վկայութիւնն էին, թէ ինչպէս է «Մենք ենք Գիւմրին», որ իրականացւում է ծրագրի յաջողուած ձեռքբերումներից մէկը համարուող «Շիրվանեան» Երիտասարդական կենտրոնում, վերափոխել բազմաթիւ պատանիների կեանքը. արտադպրոցական ծրագրերից, կրթաթոշակներից ու բարեգործական նախաձեռնութիւններից օգտուած երիտասարդները տարբեր տեսանիւթերում պատմում էին իրենց ձեռքբերումների մասին:

«Ազգի կառուցմանն ուղղուած այս ծրագիրը համայնքի կողմից նախաձեռնութեան փայլուն օրինակ է: «Մենք ենք Գիւմրին», Հայ Երիտասարդաց Դաշնակցութեան Օրենջ Քաունթիի մասնաճիւղի առաջարկն էր, որի շուրջ երիտասարդները տարիներ աշխատեցին: Այնուհետեւ, ծրագիրը նրանք ներկայացրեցին ՀՅԴ Օրենջ Քաունթիի կոմիտէին, որն աջակցեց առաջարկին եւ ներկայացրեց ՀՅԴ Արեւմտեան Ամերիկայի Կենտրոնական կոմիտէին, որն էլ յանձն առաւ ծրագիրը եւ Բիւրոյի հովանաւորութեամբ, մեծ խանդավառութեամբ ծրագիրը մեկնարկեց: «Մենք ենք Գիւմրին» ՀՅԴ այն նախաձեռնութիւններից է, որ լաւագոյնս ներկայացնում է կուսակցութեան գործելաոճը, թէ ինչպէս ՀԵԴ երիտասարդների շրջանում ստեղծուած գաղափարը հաստատուելով իրականութիւն դարձաւ, եւ կը ցանկանայի ընդգծել ընկերուհի Հրաչէ Նովրուզեանին, ով իր ընկերների հետ միասնաբար, հետեւողականօրէն հետամուտ եղաւ կայացմանը: Ծրագիրը զարգացաւ ու արդիւնքներ սկսեց ցուցաբերել կարճ ժամանակում շնորհիւ հիմնադիրների ու աջակիցների, որոնց թւում էին Նշան Փիրումեանը, Աւետիք Իզմիրլեանը, Արթօ Քէօլէեանը, Շանթ Պապուճեանը եւ շատ ընկերներ ու նուիրեալներ: Այս ծրագրի միջոցով, ապահով ու ստեղծագործ միջավայր է ապահովւում` ազգային կրթութեան համար, ինչը հսկայական դրական ազդեցութիւն է ունենում ոչ միայն կենտրոն յաճախողների, նաեւ` նրանց ընտանիքների եւ շրջապատի կեանքում: Ծրագիրը բազմաթիւ յաջողութիւններ է արձանագրել, եւ անդրադառնալով ձեռքբերումներին, օրինակ, այսօր ուրախ ենք նշելու, որ մեր կրթաթոշակների թիւը հասաւ 25ի», իր խօսքում նշեց ձեռնարկի բանախօսը` ՀՅԴ Արեւմտեան Ամերիկայի Կենտրոնական կոմիտէի ներկայացուցիչ Կարօ Մատէնլեանը: Նա երախտագիտութիւն յայտնեց ներկաներին, որոնցից իւրաքանչիւրը շարունակաբար մասնակցութիւն է ունեցել «Մենք ենք Գիւմրին» ծրագրի կայացման ու զարգացման գործում:

Հանդիսավարներ Կասիա Պաղտասարեանն ու Նազելի Խոդաբախշն էլ իրենց խօսքում ընդգծեցին «Մենք ենք Գիւմրին» ծրագրի աշխատանքների կարեւորութիւնը, որն ուղղուած է հայրենիքում երիտասարդների կեանքի բարելաւմանը, նրանց կրթութեանն ու ներգրաւման հասարակական կեանքում, յիշատակեցին առանցքային նշանակութիւն ունեցած «Շիրվանեան» Երիտասարդական կենտրոնի հիմնադրման գլխաւոր աջակիցներ Յակոբ եւ Մինա Շիրվանեաններին, եւ նրանց գործը շարունակող Ալիս եւ Վահիկ Պետրոսեաններին: «Այս երեկոյ իւրաքանչիւր ներդրում խորհրդանշում է մեծ աւանդ Գիւմրու երիտասարդ մտքերի կրթութեան եւ հզօրացման գործում», նշեցին նրանք` պարբերաբար հաղորդելով բարերարների մասին, ովքեր ձեռնարկի ընթացքում իրենց նուիրատուութիւններով ապահովեցին ծրագրի ապագայ յաջողութիւնները:

«Մենք ենք Գիւմրին» ծրագրի դրամահաւաք ձեռնարկն անցաւ ջերմ միջավայրում, որտեղ ներկաները` նաեւ ուրախութեամբ ականատես եղան իրենց ներդրումների արդիւնքներին:

ՆԱՆԷ ԱՒԱԳԵԱՆ