Այսօր՝ նոյեմբերի 20-ին, Գլխավոր դատախազության առջեւ տեղի ունեցավ բողոքի ակցիա՝ ի պաշտպանություն բոլոր քաղբանտարկյալների:

Ակցիան ընթանում էր՝ «Ազատություն քաղբանտարկյալներին», «Դեմ ենք բռնապետությանը», «ՀՀ իշխանությունը ժողովրդավարությանն ու ազատ խոսքի թշնամիներն» պաստառներով եւ կարգախոսներով:

Բողոքի ակցիային ընդառաջ մեծ թվով ոստիկաններ էին բերվել դատախազության մոտ:

«Իրենց խիղճն ու հոգին Նիկոլին հանձնած դատախազների, քննիչների, դտավորների վրա հույս չենք դնում, որովհետև իրենք ապացուցել են, որ դատաիրավական համակարգը Նիկոլ Փաշինյանի ձեռքում դարձել է բութ գործիք՝ երկրում մեկ անձի իշխանություն հաստատելու, երկրում բռնաճնշումներ գործադրելու, կեղծ շինծու մեղադրանքներով մարդկանց կալանքի տանելու համար». ակցիայից առաջ, լրագրողների հետ զրույցում ասաց ՀՅԴ Հայաստանի Գերագույն մարմնի ներկայացուցիչ, ԱԺ «Հայաստան» խմբակցության պատգամավոր Իշխան Սաղաթելյանը։

Իշխան Սաղաթելյան խոսքով՝ իրենք այն կարծիքին են, որ եթե Նիկոլ Փաշինյանը կարողանա ամեն անգամ մարսել հերթական ձերբակալությունը, բռնաճնշումը, ինքը կանգ չի առնելու և շարունակելու է.«Հետևաբար, այս իշխանությունների բռնություններին պետք է հակազդել ժողովրդի կամքով։ Երկրում կան 5 տասնյակից ավելի քաղբանտարկյալներ, ովքեր այսօր գտնվում են անազատության մեջ բացառապես նրա համար, որ ունեն սեփական տեսակետ, պայքարում են հայկական ինքնության համար և հաշտ չեն այսօրվա իշխանության վարած այս հակահայ քաղաքականության հետ»։

Ըստ ՀՅԴ անդամ, ՀՀ ԱԺ «Հայաստան» խմբակցության պատգամավոր Գառնիկ Դանիելյանի՝ «Իրավական ամբողջ համակարգը ուշադրության տակ է, և շատ քիչ դատավորներ կան, որոնք պատրաստ են անկախ որոշումներ կայացնել:Դա չի նշանակում, որ չպետք է պայքարենք և այս ակցիան էլ դրա առհավատչյան է, որ մեր հասարակության տարբեր շերտերից պետք է միավորվեն այն մարդիկ, որոնք այս ընթացքում «ծառերի հետևից» խոսում էին անարդարության մասին։ Սա լավագույն շանսն է։ Պետք է ժողովրդական ճնշում լինի, և այս իշխանությունը հասկանա, որ ինքը չի որոշելու մեր ժողովրդի ապագան»:

ՀՅԴ անդամ, ՀՀ ԱԺ «Հայաստան» խմբակցության քարտուղար Արծվիկ Մինասյանն իր ելույթում ասաց` դատախազության դիմաց ենք, քանի որ այս մարմինն է խախտում մայր օրենքը՝ Սահմանադրությունը։

«ՀՀ Սահմանադրությամբ գլխավոր դատախազությունն այն միակ ու բարձրագույն մարմինն է, որը պետության անունից քրեական հետապնդման բացառիկ լիազորությամբ է օժտված, որը պարտավոր է հետևել իրականացվող պատժի և հարկադրանքի միջոցների օրինականությանը»,– ասաց նա։

Դիմելով դատախազներին` Արծվիկ Մինասյանը հորդորեց կատարել իրենց մասնագիտական պարտականությունը և ՀՀ Սահմանադրությունն անշեղորեն կատարելու երդումը։

Նա տեղակացրեց, որ շրջանառության մեջ են դրել «ՀՀ–ում քաղբանտարկյալների և նրանց իրավունքների պաշտպանության մասին» ԱԺ հայտարարության նախագիծ, որի շրջանակում նոյեմբերի 26–ին լինելու են լսումներ։ Լսումներին հրավիրել են նաև միջազգային կառույցների ներկայացուցիչների, որպեսզի նրանց տեղեկացնեն, թե ինչ է կատարվում ՀՀ–ում։ Նամակ- հրավերը փոխանցվեց նաև գլխավոր դատախազություն։

Բողոքի ակցիայից հետո երթը շարժվեց դեպի Շենգավիթի ընդհանուր իրավասության դատարան, որտեղ տեղի էր ունենում Բագրատ սրբազանի և 18 արդարների դատավարությունը։

Ակցիայի մասնակիցները երթի ընթացքում վանկարկում էին՝ ազատություն քաղբանտարկյալներին:

Ընդհանուր իրավասության դատարանի առջեւ ՀՅԴ Հայաստանի ԳՄ անդամ, ԱԺ «Հայաստան» խմբակցությանն անդամ Գեղամ Մանուկյանը հայտարարեց. «Այս տարիների պայքարում մեր քաղաքական բանտարկյալները եկան ողջ աշխարհին ցույց տալու, որ հայ հասարակությունը չի համակերպվել ուրացման, զիջման, դավաճանության, պարտության, այն քաղաքականության հետ, որ վարում է այս իշխանությունը։ Նրանք եկան, որպեսզի մեր բոլորի՝ մեր ժողովրդի, այս սերնդի ճակատից փորձեն մաքրել այն խարանը, որ տարիներ հետո դնելու էին ապագա սերունդները, թե մենք համակերպվեցինք այս ամենին»:

«Թեև ակցիայի մասնակիցները կրկնում են «Ազատություն քաղբանտարկյալնեևրին», բայց դա չի նշանակում լոկ բանտից դուրս գալու ազատություն, այլ արդարություն, իրավունքների վերականգնում, քաղաքական հետապնդումերի վերացում»,- ասաց նա։

«Մեր հայրենակիցները եկել են այստեղ, որ այս իրավապահների դեմքով բոլոր իրավապահներին, դատախազներին, ԱԱԾ քննչական մարմինների ներկայացուցիչներին զգուշացնեն ևս մեկ անգամ, որ այն անօրինականությունները որ կատարվել են այսօր, երեկ, չի ներվելու ոչ մեկին։ Դիմում գրելով, ծառայությունից դուրս գալով, հաջորդ օրը չքմեղանալով, որևէ մեկը չի արդարացվելու։ Դրա համար պահանջը մեկն է՝ դադարեցնել անօրինականությունների կատարումը»,-ասաց Գեղամ Մանուկյանը։

Ընդհանուր իրավասության դատարանի առջեւ ելույթ ունեցան նաեւ ՀՅԴ անդամ, ՀՀ ԱԺ «Հայաստան» խմբակցության պատգամավոր Գառնիկ Դանիելյանը, «Մեր ձևով» շարժման անդամ Արթուր Միքայելյանը, ՀՀԿ փոխնախագահ Արմեն Աշոտյանը:

Տեսանյութն՝ այստեղ