Ապրիլի 9-ին Հրապարակ TV-ի Հինգշաբթի հաղորդաշարի հյուրն էր ՀՅԴ Հայ Դատի կենտրոնական գրասենյակի հատուկ ծրագրերի պատասխանատու, քաղաքական գիտությունների թեկնածու Գևորգ Ղուկասյանը:

Անդրադարձ է կատարվել Հայաստանի վերանկախացմանը հաջորդած տասնամյակներին Հայ դատի գործունեության առաջնահերթություններին, ՀՀ իշխանությունների վարած քաղաքականության արդյունքում Հայաստանի և հայ ժողովրդի առջև ծառացած նոր մարտահրավերներին, Հայաստան – Սփյուռք կապերի վերաիմաստավորման և հետագա ամրապնդման անհրաժեշտությանը:

Խոսելով միջազգային հարթակներում Արցախյան հիմնախնդրի շարունակական արծարծումների մասին՝ Գևորգ Ղուկասյանը մասնավորապես նշել է, որ չնայած խնդիրը մոռացության տալու, Արցախ բառից հրաժարվելու ՀՀ իշխանությունների քաղաքականությանը, Արցախի և արցախցիների իրավունքներին առնչվող հարցերը Հայ դատի գրասենյակների անդուլ աշխատանքի շնորհիվ շարունակում են մնալ տարբեր կառավարությունների, խորհրդարանների, միջազգային կազմակերպությունների, հայտնի քաղաքական գործիչների ուշադրության կենտրոնում: Քիչ չեն նաև արցախահայության վերադարձի և իրենց հայրենիքում ինքնորոշվելու միջազգային իրավունքի մասին խորհրդարանական և անգամ կառավարական մակարդակներով ընդունված բանաձևերն ու հայտարարությունները:

Գևորգ Ղուկասյանն անդրադարձել է նաև ՀՀ իշխանությունների կողմից հրապարակ բերված խաղաղության կեղծ օրակարգին, հայ-թուրքական հարաբերությունների այսպես կոչված կարգավորման հերթական գործընթացի տապալմանը: «Եվ այնպես չէ, որ սա միայն մենք ենք նկատում: Մեր միջազգային գործընկերներն էլ տեսնում են, որ այն խաղաղությունը, ինչի մասին խոսում են ՀՀ իշխանությունները, իրականում խաղաղություն չէ, որ Ադրբեջանն այդ «գործընթացի» մեջ անընդհատ նորանոր անընդունելի պահանջներ է ներկայացնում Հայաստանին, որոնք հաջորդիվ դառնում են Թուրքիայի հերթական նախապակման՝ հայ-թուրքական սահմանի բացման համար»,- նշել է Գևորգ Ղուկասյանը:

Մանրամասները՝ տեսանյութում