ՀՅԴ Բյուրոյի ներկայացուցիչ, ԱԺ «Հայաստան» խմբակցության պատգամավոր Արմեն Ռուստամյանի ելույթը Սարդարապատում՝ Առաջին Հանրապետության օրվան նվիրված միջոցառմանը.

««Այս օրը մեզ համար միշտ եղել է սրբազան։ Այն ունի մեծ խորհուրդ, որն առաջին հերթին կապված է նրա հետ, թե որքանով ենք կարևորում մեր ինքնությունը, անկախությունն ու պետականությունը»,-հայտարարեց Արմեն Ռուստամյանը՝ մեջբերելով մեծանուն բանաստեղծ Պարույր Սևակի խոսքը. «Սերունդներ, ձեզ ճանաչե՛ք Սարդարապատից»։

«1918-ին չկար պետություն, բայց կար համախմբված հայություն։ Կար ինքնությունը պահպանելուն նվիրված հայություն։ Այդ հավաքական ուժը՝ պետություն չունենալով, կարողացավ երեք ճակատով կանգնեցնել թշնամուն՝ Բաշ Ապարանում, Ղարաքիլիսայում և Սարդարապատում»,- նշեց նա:

«Պատմությունը ցույց տվեց, որ թշնամուն կարելի էր կանգնեցնել դատարկ ձեռքերով, եթե ունես պայքարի ոգի ու հասկանում ես, որ գոյությունդ անիմաստ է դառնում, եթե ինքնությունից հեռացել ու հրաժարվել ես։ Ինչ ունենք այսօր, ունենք մի վիճակ, երբ մեր աչքի առաջ նորից տեղի ունեցավ ցեղասպանություն. հայաթափվեց Արցախը, կորցրինք մեր հայրենիքի մի մասը և տարածքներ ունենք կորցրած արդեն ՀՀ-ից, ու այն պատճառով, որ մեր ուժի աղբյուրներից հեռացանք։ Սա ակնհայտ ցույց է տալիս, որ ունենալով նույնիսկ երկու պետություն՝ չունեինք այնպիսի ղեկավարություն, որ հասկանար ինքնության կարևորությունը։ Պետության, պետականության ու իրական ինքնիշխանություն ունենալու կարևորությունը հասկանար։ Մեզ առաջնորդեցին մարդիկ, որոնք մեզ տարան ինքնակործանման ճանապարհով։ Պետականություն ունենալու պարագայում առաջին անգամ մեր պատմության մեջ տեսանք ցեղասպանություն»,- ասաց Արմեն Ռուստամյանը։

«Հայ և հաղթանակ բառերը դարձել են այս իշխանությունների համար մերժելի, վախենում են դրանից։ Այս մարդիկ ապացուցում են մեզ, որ պարտությունը մեզ հաջողություն է բերել։ Մեզ ասում են՝ Արցախում պարտվել ենք մտածված, որ պահպանենք ՀՀ անկախությունը։ Սրանից ավել ինքնախոստովանություն, որ իսկապես կապ չունի այս մարդը մեր սերնդի հետ, կապ չունի այս մարդը մեր Սարդարապատի, Ղարաքիլիսայի ու Բաշ Ապարանի հերոսների հետ, չկա»,- ասաց ՀՅԴ Բյուրոյի ներկայացուցիչը։

«Եթե ուզում ենք պահել մեր ինքությունը, եթե ուզում ենք այս պարտության էջը փակել, որ հաղթանակի բերկրանքը մեր տուն մտնի՝ պետք է ազատվենք այս պարտություն բերած եւ պարտություն քարոզող իշխանություններից: Վսատհ եմ, որ դա մենք անելու ենք, որովհետեւ հայի ոգին կենդանի է: Հայ քրիստոնյան մնալու համար պայքարել ենք դարերով, հիմա էլ պետք է պայքարենք ու այդ կտռիվը տանք հունիսի 7-ին՝ արժանապատվորեն, ցույց տալով, որ մենք հուսալքված չենք, հուսախաբված չենք»,- շեշտեց Արմեն Ռուստամյանը:

Խոսքն ուղղելով դաշնակցական ընկերներին նա ասաց. «Առաջին հանրապետության հիմնադիրները մեր կուսակցական ընկերներն էին: Նրանց հոգիները սավառնում են երկնքում եւ հետեւում մեզ: Մենք պետք է մեր հերոս նախնիների արժանի հետեւորդը լինենք, հավատարիմ մեր երդմանը՝ անգամ կյանքի գնով ծառայել հայրենիքին ու հայությանը: Այսօր դրա ժամանակն է: Մեզ նոր հաղթանակներ ու հաջողություններ եմ մաղթում»:

Ելույթն ամբողջությամբ՝ տեսանյութում