Այսօր՝ հունիսի 7-ին «Հայաստան» դաշինքի ներկայացուցիչներ Իշխան Սաղաթելյանը, Արծվիկ Մինասյանը, Արթուր Խաչատրյանը և Ագնեսա Խամոյանը հանդես են եկել մամուլի ասուլիսով։ Նրանք անդրադարձել են վաղ առավոտից ՔՊ ընտրախախտումներին, վարչական ռեսուրսի շահագործմանը և իրավապահների տեռորին:

«Ընտրությունները սկսելուց առաջ և այսօր՝ ողջ օրվա ընթացքում, գործող վարչախումբը լայնածավալ ռեպրեսիաներ է սկսել ընդդիմադիր քաղաքական միավորների, նաև «Հայաստան» դաշինքի նախընտրական շտաբների պատասխանտուների, ակտիվի, համակիրների նկատմամբ»,- հայտարարել է ՀՅԴ Հայաստանի ԳՄ ներկայացուցիչ Իշխան Սաղաթելյանը։

Նա նշել է, որ առավոտից մարդկանց տարբեր պատրվակներով, կեղծ ձայնագրություններով տանում են հարցաքննության, որոշներին բաց են թողում, որոշներին փորձում մեղադրանք առաջադրել։

«Նպատակն է՝ կազմալուծել, սահմանափակել, խոչընդոտել մեր շտաբների գործունեությունը»,- ասել է Իշխան Սաղաթելյանը։

Նա նշել է, որ տեղամասերում ամբողջական վարչական ռեսուրս կիրառելով՝ փորձում են ուղղորդումներ իրականացնել, վախեցնել, ազդեցության ունենալ մարդկանց ազատ կամարտահայտման վրա։

Արձանագրվել են «կարուսելի» դեպքեր, երբ ընտրողները տեղամաս են մուտք գործել արդեն պատրաստված քվեաթերթիկներով և ծրարներով։

Սաղաթելյանի խոսքով՝ որոշ դեպքերում քվեախցիկներում հայտնաբերված ծրարները, ինչպես նաև տեղամասերից դուրս բերված քվեաթերթիկները կարող են վկայել կազմակերպված խախտումների մասին։ Նա նշել է, որ որոշ քաղաքացիներ ընդդիմադիր ուժերի քվեաթերթիկները դուրս են բերել ընտրատեղամասերից՝ իշխանության ներկայացուցիչներին ցույց տալու համար, թե կատարել են իրենց տրված ցուցումները։

Իշխան Սաղաթելյանը ընդգծել է, որ, չնայած արձանագրված խախտումներին և ճնշումներին, ընտրողների ակտիվ մասնակցությունը, իր կարծիքով, ցույց է տալիս, որ իշխանությունները չեն կարող միայն վարչական լծակների միջոցով ապահովել իրենց վերարտադրությունը։ Նա բարձր է գնահատել քաղաքացիների մասնակցության մակարդակը՝ այն համարելով կարևոր և անհրաժեշտ։

Արծվիկ Մինասյանի խոսքով՝ ոստիկանությունը, ոստիկանության անձնագրային բաժիններն են բազմաթիվ խոչընդոտներ ստեղծել, հատկապես այն քաղաքացիների համար, ովքեր Հայաստանի Հանրապետության քաղաքացի լինելով հանդերձ չունեն հաշվառման կոնկրետ հասցե, և նրանց կամ չեն տրամադրում անհրաժեշտ տեղեկանքը, ձգձգում են, կամ ուղղորդում են, որ գնան դատարաններ։

«Այստեղ գալիս է նաև դատարանների գործողությունները կամ անգործությունը, երբ դատարանները պարզապես կամ հրաժարվում են ընդունել նման դիմումները, կամ փորձում են տարբեր պատրվակներով ձգձգել։ Մյուս կարևոր խնդիրը, խոշոր մասշտաբի խնդիրը, արցախահայերի հարցն է, որ այդպես էլ հստակ ու ռեալ խոչընդոտներ ստեղծեցին արցախցիների քվեարկության հարցով»,-նշել է նա։

Արծվիկ Մինասյանը դիմել է միջազգային դիտորդներին և հիշեցրել, որ իրենց նախազգուշացրել էին ենթադրվող խախտումների մասին, որոնք նրանք պետք է արձանագրեն։

Ագնեսա Խամոյանն առաջարկել է քաղաքացիներին չվիճել, երբ փորձում են իրենց ուղղորդել, բայց հիշել, որ խցիկում իրենք մենակ են, և ոչ ոք չի կարող վերահսկել, այնտեղ ոչ ոստիկանություն կա, ոչ տեսախցիկներ, դուք պարտավոր չեք որևէ մեկին հաշվետու լինել։

Մանրամասները՝ տեսանյութում