Հայ քաղաքական կուսակցութիւններու համահայկական եւ լիբանանեան մարմիններու ներկայացուցիչները գումարեցին յատուկ նիստ, որ տեղի ունեցաւ երկուշաբթի, 6 յուլիս, 2026-ին, «Թէքէեան» կեդրոնին մէջ։

Ժողովականները հանգամանօրէն քննարկեցին տարածաշրջանային, լիբանանեան, հայաստանեան եւ համայնքային խնդիրներ, որոնց ուղղութեամբ ճշդեցին նաեւ ուղենշային կէտեր։

Ա․ Լիբանանեան քաղաքական եւ հասարակական դաշտը կը դիմագրաւէ հերթական դժուար փուլ՝ իսրայէլեան շարունակուող յարձակումներու, դիւրաբեկ հրադադարի, Լիբանան-Իսրայէլ համաձայնութեան ընդառաջ ընթացող բանակցութիւններու առումներով։ Այս փուլին կը բացակայի քաղաքական եւ հասարակական դաշտին մէջ համալիբանանեան դիրքորոշումը։ Կուսակցութիւններու ներկայացուցիչները՝ շեշտը դնելով ներլիբանանեան պառակտուածութեան ժխտական հետեւանքներուն վրայ, ընդգծեցին առաջնահերթ սկզբունքներուն կառչած մնալու անհրաժեշտութիւնը՝ զինադադարի յարգում, գերիշխանութեան եւ տարածքային ամբողջականութեան անզիջելիութիւն։ Այս զգայուն իրավիճակին մէջ հրամայական նկատուեցաւ ծայրայեղութիւններէ հեռու մնալը, ներլիբանանեան դաշտին մէջ բոլոր տեսակի սադրանքները մերժելը եւ բաժանարար գիծերը չխորացնելը՝ թէ՛ պետական եւ թէ՛ քաղաքացիական-հասարակական շրջանակներուն մէջ։

Բ․ Լիբանանեան ճակատը նկատելով տարածաշրջանին մէջ զարգացող իրադարձութիւններու կարեւորագոյն հատուածը, ժողովականները լուսարձակի տակ առին Անգարայի նկրտումները՝ իրավիճակէն օգտուելով ազդեցութեան գօտիներ նուաճելու նպատակով։ Անկախ հռետորաբանական մակարդակի վրայ արձանագրուող Իսրայէլ-Թուրքիա լարուածութենէն, արձանագրուեցան այն փաստերը, որոնք շրջանին մէջ երկու երկիրներու զուգահեռ թափանցումներու եւ զինուորական առկայութիւններու մասին կը վկայեն։ Առ այդ, կուսակցութիւնները իրենց քաղաքական դիրքորոշումներուն ընթացքին նկատի կ՛ունենան այս միտումները՝ զանոնք արծարծելով իրենց քաղաքական-յարաբերական հանդիպումներուն։

Գ․Իսրայէլի գործադիր իշխանութեան կողմէ Հայոց ցեղասպանութեան ճանաչումի հանգամանքները քննարկելով, ժողովը հաստատեց անոր ընտրուած պահու քաղաքական մղումները, Իսրայէլ-Թուրքիա լարուող յարաբերութիւններու խորապատկերին վրայ։ Այդ հանգամանքներուն կը ներառուի Իսրայէլի ներգրաւումը արցախեան պատերազմին, Ազրպէյճանի հետ զարգացող թէ՛ տնտեսական եւ թէ՛ ռազմական մարզերու մէջ համագործակցութիւնը։

Ե․Հայ քաղաքական կուսակցութիւնները անդրադարձ կատարեցին նաեւ հայաստանեան իրադարձութիւններուն եւ ընդգծեցին, որ անկախ այնտեղ արձանագրուող իրադարձութիւններու նկատմամբ կուսակցութիւններու որդեգրած դիրքորոշումներէն, համահայկական հարցերու եւ առաջնային օրակարգերու շուրջ անխախտ կը մնան միջկուսակցական միացեալ կեցուածքները՝ Ցեղասպանութեան միջազգային ճանաչման, Արցախի ժողովուրդի իրաւունքներու վերականգնման, Պաքուի մէջ անօրինաբար պահուող ռազմագերիներու ազատ արձակման պահանջներու եւ համապատասխան աշխատանքներու ուղղութեամբ։ Օրակարգի այս կէտի քննարկումով շեշտուեցաւ համահայկական օրակարգերու շուրջ Սփիւռքի այլ շրջաններու մէջ եւս հանդիպումներու ձեռնարկելու եւ համակարգուած աշխատելու հրամայականը։

Հայ քաղաքական կուսակցութիւններու ներկայացուցիչները պիտի շարունակեն գումարել նիստեր, քննարկելով տարածաշրջանային, լիբանանեան, համասփիւռքեան-համահայկական օրակարգի կէտեր։