Ըստ նրա` նախկին իշխանական ձևաչափերը վերադարձնելու որևէ հնարավորություն և շանս չկա: «Մեզ համար դա իսկապես անցյալ է: Սակայն պետք է նաև անցյալի դասերը լավ սերտենք, որպեսզի կարողանանք ներկայի և ապագա հարաբերությունները` երկրի ներսում և սահմաններից դուրս, կառուցել ճշմարիտ նպատակների շուրջ: Իսկ այդպիսի ճշմարիտ նպատակները, միանշանակ, կառուցված են մեր ազգային, պետական ուղեգիծը պահպանելու վրա: Դա Արցախյան ազատագրական պայքարի արդյունքում ազատագրված Հայրենիքն է, որ պետք է ապագա սերունդներին թողնենք ավելի պաշտպանված և ավելի ընդլայնված, քան մենք ենք ժառանգել սովետական ժամանակաշրջանից, դա մեր մշակույթն է, մեր դպրոցն է, մեր կրթությունը, մեր լեզուն, մեր եկեղեցին: Այս ամենը, ի վերջո, մեր ազգային ողնաշարն է: Այս ազգային ողնաշարին վնասող ցանկացած գործողություն, այդ թվում` անցյալում վնասած գործողություն, պետք է բացառենք: Մերժելի են բոլոր բացասական դրսևորումները, որոնք եղել են անցյալում»,- նշել է Մինասյանը:

Ըստ նրա` այնուամենայնիվ, պետք է արժանին մատուցել և շնորհակալություն հայտնել այն անձանց ու քաղաքական ուժերին, որոնց հետ ՀՅԴ-ն համագործակցել է իր անցած ճանապարի ընթացքում: «Նշածս հարցերում մենք նրանց հետ կարողացել ենք ունենալ ձեռքբերումներ` նախևառաջ հայ-թուրքական հարաբերությունների շրջանակներում, Արցախի միջազգային ճանաչման հարցում: Սա նաև հնարավորություն է, որ մենք պարզ ճակատով նայենք մեր անցյալին և վստահաբար` մեր ապագային: Մենք ուրացող չենք, բայց, նաև մեր սխալները գիտակցելով ըմբռնելով, թերությունները ընկալելով հանդերձ, երբեք գլուխներս չենք կախում, որովհետև, անգամ եթե որևէ տեղ թերացել ենք, եղել է ոչ թե կանխամտածված ` այս կամ այն խմբի շահի հետևանք, այլ հայ ժողովրդի պահանջին համահունչ առաջ գնալու գործողություն»,- ասել է Մինասյանը` հավելելով. «Ես կարծում եմ` նա, ով իր անցյալն ուրանում է, ապագա չի կարող ունենալ: Սա վերաբերում է նաև մի քաղաքական ուժի, որը 128 տարվա պատմություն ունի»:

ֆեյսբուքյան օգտատերերից մեկը Արծվիկ Մինասյանի` անշարժ գույք ունենալ-չունենալու մասին հարց է հնչեցրել:

«Արծվիկ Մինասյանը եղել է ԱԺ միակ պատգամավորը, որը Երևանում վարձով է ապրել և Ազգային ժողովից փող ստացել: Նա հիմա տուն ունի՞, թե՞ ոչ» հարցին ի պատասխան` Մինասյանն ասել է. «Ես հիմա տուն ունեմ, և այդ տան համար այն ժամանակ ես բաժանորդագրվել եմ «Երիտասարդ ընտանիքներին` բնակարան» ծրագրով` որպես համալսարանական դասախոս: Իհարկե, մինչև հիմա հիփոթեքային վարկ ենք վճարում, բայց կյանքն է այդպիսին»:

Հաղորդավար Արթուր Մկրտչյանի հումորային դիտարկմանը, թե դղյակներ դեռ չի՞ հասցրել կառուցել, Մինասյանը կատակով պատասխանել է. «Ուր էր` այդպիսի բան լիներ, մենք էլ նվիրեինք Հայաստանի Հանրապետությանը»:

Նախկին իշխանությունների օրոք ՀՅԴ-ն հազարավոր երիտասարդների հետ մասնակցեց «Դեմ եմ» շարժման ակցիաներին` ուղղված պարտադիր կուտակային կենսաթոշակային համակարգի դեմ: ՀՅԴ-ն անգամ Սահմանադրական դատարանում այդ բողոքը վիճարկեց, իսկ հետագայում նոր իշխանությունը, որը նույնպես դեմ էր այդ համակարգին, դեռևս անորոշ ժամանակով կրկին հաստատեց պարտադիր կուտակային համակարգը:

«Իբրև Դաշնակցություն և սոցիալիստական հայացքներով քաղաքական ուժ` մենք չէինք կարող անտարբեր մնալ մի այնպիսի վատ և որևէ քաղաքացու լավ բան չխոստացող համակարգի նկատմամբ, ինչպիսին պարտադիր կուտակայինն էր», Արծվիկ Մինասյանը` պատասխանելով «զիջե՞լ է այդ հարցում իր դիրքերը» հարցին:

Եվս մեկ անգամ շնորհակալություն հայտնելով օրենսդրական այդ փաթեթի դեմ բողոքող երիտասարդներին` Մինասյանը հիշեցրել է ՍԴ-ում այդ հարցով իրենց ունեցած հաղթանակի մասին:

«Հետագայում այն ժամանակվա կառավարությունն ամբողջությամբ չիրացրեց ՍԴ-ի որոշումները: Բայց ամենակարևոր, սկզբունքային հարցերից մեկը նաև այն էր, որ, որպես սերունդների համերաշխություն երաշխավորող երկիր, մենք պետք է կարողանանք ապահովել բոլոր սերունդների համագործակցությունն ու համերաշխությունը: Յուրաքանչյուր սերունդ իր հաջորդ սերնդի համար պետք է ստեղծի անհրաժեշտ հիմքեր, պետք է կարողանա նաև հոգ տանել այդ ամենի մասին»,- ասել է Մինասյանը:

Որպես օրինակ` նա նշել է Չինաստանը, որտեղ չեն հրաժարվել սերունդների համերաշխության համակարգից, թեև բնակչության թիվը շատ մեծ է:

«Չէ՞ որ մեր կենսաթոշակառուներին պետք է ապահովենք բարձր կամ նորմալ թոշակով, որպեսզի նրանք ունենան բարեկեցիկ ապրելու հնարավորություն: Եվ եթե այսօր մենք չենք կարողանում երաշխիքներ տալ մեր թոշակառուներին, կամ մեր տնտեսությունը չենք կարողանում զարգացնել, որովհետև այդ գումարների զգալի մասը դուրս է գալիս մեր տնտեսությունից, ինչպե՞ս կարող է 30 տարի հետո երկրում, որը վատ վիճակում է, մի խումբ հանկարծակի լավ ապրել: Դա անհնար է, և միջազգային փորձն էլ դա ապացուցել է»,- նշել է Մինասյանը:

Ինչ վերաբերում է Նիկոլ Փաշինյանի կառավարության կողմից այս հարցի քննարկմանը` նա ասել է. «Ես ուզում եմ արձանագրել, որ առաջին անգամ էր, որ Հայաստանի կառավարությունն ընդունեց` այս հարցը քննարկման ենթակա է: Որևէ մեկը չի զիջել իր դիրքերը, մենք ընդամենը կարողացանք հասնել նրան, որ կառավարությունը, ի դեմս` վարչապետի, հրապարակավ հայտարարեց, որ սա քննարկման ենթակա հարց է, և մինչև վերջնական որոշում կայացնելը մենք պետք է փորձենք մեղմել վճարում կատարողների բեռը: Սակայն ուզում եմ նաև տեղեկացնել, որ մինչև իմ` կառավարության անդամի կարգավիճակի դադարեցնելը աշխատանքային բազմաթիվ քննարկումներ են եղել, նաև հայեցակարգ է դրվել, որում մենք ցույց էինք տալիս պարտադիր կուտակայինի թերի, սխալ կողմերը, դրա սոցիալական, իրավական բացասական կողմերը: Առաջարկում էինք, որպեսզի այս հայեցակարգն ընդունվի, որովհետև ծայրահեղ դեպքում , եթե անգամ կառավարությունն ի վիճակի չէ գնահատել դրա վատ լինելը ( չնայած նախարարների մի մասը համոզված էր` սա վատ է), հանենք հանրաքվեի` թող հասարակությունը որոշի»:

Մինասյանը նաև հույս է հայտնել, որ ներկայիս կառավարությունն այս գաղափարից չի հրաժարվել` նկատի ունենալով, որ վարչապետ Փաշինյանն ինքն այն ժամանակ դիմումի տակ ստորագրել է:

«Վստահ եմ` Դաշնակցությունը խորհրդարանում նաև հետապնդելու է նպատակ, որ այս արատավոր համակարգը հեռանա, և մենք ունենանք կենսաթոշակային մի այնպիսի համակարգ, որ յուրաքանչյուր կենսաթոշակառու կարողանա վստահ լինել, որ պետությունն իր ուսերին է վերցրել ապագայում իր` բարեկեցիկ ապրելու հոգսը»,- նշել է նա:

Արծվիկ Մինասյանին քաղաքացիներից մեկը «Նաիրիտ»-ի մասին հարց է հնչեցրել:

«Ի՞նչ եղավ գործարանին: Ներդրող կա՞: Գործարանում թալան է…» հարցին ի պատասխան` Մինասյանը նշել է, որ և’ կառավարությունում, և’ խորհրդարանում եղած ժամանակներից «Նաիրիտ»-ի հարցը մշտապես եղել է իրենց ուշադրության կենտրոնում:

«Կառավարությունում` արդեն որպես գործադիր որոշակի ֆունկցիաներ ունեցող, մենք փորձեցինք այս հարցը տեղափոխել կառավարության կարգավորման դաշտ: Ասեմ, որ «Նաիրիտ»-ի հարցում բավական մեծ տարակարծություններ կան, ընդ որում` ես չեմ էլ բացառում, որ կան անհատներ, որոնք իսկապես շահագրգռված են «Նաիրիտ»-ի վերջնական փլուզման հարցով, բայց կան նաև պետական այրեր, գործիչներ, որոնք իսկապես մտահոգ են այդ հարցով»,-ասել է նա:

Մինասյանը նաև տեղեկացրել է, որ վարչապետ Փաշինյանի հետ իր առանձին հանդիպման ժամանակ այս թեմայով խոսել են և ստեղծել ճանապարհային քարտեզ: «Նախ և առաջ տեխնիկական աուդիտի միջոցով պետք է պարզել` «Նաիրիտ»-ը հնարավո՞ր է վերագործարկել, թե՞ ոչ: Եթե` այո, ապա ի՞նչ սխեմա պետք է գործադրվի այստեղ, ֆինանսավորման ի՞նչ ծավալների մասին է խոսք գնում, և նախկինում ստանձնած բեռը, պարտավորությունները ինչպե՞ս ենք հանում ապագա գործողություններ կամ ծրագրեր իրականացնող գործարանի վրայից: Ցավոք, պետք է արձանագրեմ նաև, որ այս ընթացքում բազմաթիվ խեղաթյուրումներ տեղի ունեցան: Եթե չեմ սխալվում, «Նաիրիտ»-ի ժամանակավոր կառավարիչը արտահայտություններ էր անում, թե մեկ նախարարի, նկատի ունենալով ինձ, ցուցումով չի կարող գործընթացը կասեցնել և այլն»,- նշել է Մինասյանը:

Նա նաև տեղեկացրել է, որ ոչ միայն ինքը, այլև կառավարության մի շարք անդամներ շահագրգռված են եղել, որպեսզի «Նաիրիտ»-ի վերաբերյալ տեղեկատվությունը, աշխատելու իրական կարողությունը փաստվեր կամ չփաստվեր:

«Եթե չէր փաստվում, փակում էինք այս թեման, եթե փաստվում էր, որ հնարավոր է վերագործարկել, ուրեմն պետք է ամեն ջանք գործադրեինք: Կային նաև օտարերկրյա ցանկություն հայտնողներ, դեռևս ներդրողներ չէին, որոնք պատրաստ կլինեին այս ընթացքում աշխատել այս ուղղությամբ: Կարծում եմ` բավական հետաքրքիր զարգացումներ են լինելու առաջիկայում, որովհետև այս հարցը մեր տնտեսության, արդյունաբերության ողնաշարերից մեկին է վերաբերում: «Նաիրիտը» ոչ միայն խոշոր գործարան է, այլև խոշոր քիմիական արտադրության սիրտն է, առանցքն է, և դրա գործարկումը, շրջակա միջավայրի բոլոր կանոնների պահպանմամբ, միայն ու միայն կարող է Հայաստանի տնտեսական հզորությունը մեծացնել և ապագայում էլ ավելի նոր մակարդակի բարձրացնել մեր տնտեսությունը»,- նշել է Արծվիկ Մինասյանը:

yerkir.am