Ցանկացած իշխանութիւն՝ ներկայ թէ ապագայ, պետք է առաջնորդուի եւ համապատասխան բարեփոխումների առաջարկութիւններով հանդէս գայ՝ ելնելով տուեալ ժամանակահատուածում բնակչութեան կարգավիճակից բխող կարիքներից եւ պահանջներից: Այսօր ՀՀ կառավարութեան կողմից առաջարկուող եկամտային հարկի համահարթեցման նախագիծը ամբողջութեամբ հակասում է ՀՀ բնակչութեան մեծամասնութեան շահերին:

Աստիճանական (պրոգրեսիվ) հարկման համակարգը աշխարհի բազմաթիվ երկրներում՝ յատկապէս Հայաստանի նման աղքատութեան եւ գործազրկութեան ցուցանիշներ ունեցողներում, գործող ամենէն արդիւնաւետ հարկային համակարգն է, որի կիրառմամբ է միայն հնարավոր հաղթահարել հասարակութեան շերտերի միջեւ առկայ բեւեռուածութիւնը, արդար բաշխել պետական միջոցները եւ ստեղծել սոցիալական հիմքերի վրայ հիմնուած համերաշխ եւ երջանիկ հասարակութիւն:

Մենք համոզուած ենք, որ միայն արդար եւ առողջ եկամտային հարկի համակարգ ունենալով կարելի է կառուցել ուժեղ եւ երկրի շահերը սպասարկող տնտեսութիւն եւ ունենալ կայացած միջին խավ, որը հանդիսանում է իւրաքանչիւր երկրի տնտեսութեան զարգացման կարեւորագոյն բաղադրիչը:

Հաշուի առնելով վերոնշեալը՝ մեր մտահոգութիւնն ենք յայտնում առաջարկուող փոփոխութիւնների փաթեթի վերաբերեալ եւ կոչ ենք անում ՀՀ իշխանութիւններին ետ կանչել համահարթեցման նախագիծը:

Վերահաստատելով Հայաստանում սոցիալական արդարութեան կերտման մեր առաքելութիւնը, կոչ ենք անում բոլոր համախոհներին դեմ արտայայտուել կառավարութեան առաջ քաշած նախագծին եւ համախմբուել հասարակութեան մեծամասնության շահերի պաշտպանութեան շուրջ:

ՀՅԴ Բիւրոյի Երիտասարդական Գրասենեակ

#ԱհաԶանգ
#Ահա????
#Ոչ_համահարթեցմանը
#Համահարթեցում_չի_լինելու