ՀՀ Ազգային Ժողովի գիտության, կրթության, մշակույթի, սպորտի, սփյուռքի և երիտասարդության հարցերի մշտական հանձնաժողովի նախագահ Մխիթար Հայրապետյանը նշել է, որ հուշագիրը չափազանց կարևոր քայլ է երկու խորհրդարանների համար` և քաղաքական, և խորհրդանշական առումով: «Մենք փաստորեն սերտ համագործակցության նոր մակարդակի ենք հասնում, որովհետև այս փաստաթուղթը ոչ միայն խորհրդանշական է և հռչակագրային, այլև բովանդակային: Հստակ առանձնացված են գործնական քայլեր, որոնք ենթադրում են, որ դեռևս 2012թ. հիմք դրված համագործակցությունը այս պահից սկսած նոր մակարդակի վրա է բարձրացվում»,- մասնավորապես ասել է Մխիթար Հայրապետյանը:

Հուշագրի կնքմանը ներկա էին ԱՀ գիտության, կրթության և սպորտի նախարար Նարինե Աղաբալյանը, ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը, ՀՀ և ԱՀ Ազգային Ժողովի պատգամավորներ, ԱՀ ՄԵՀԶ նախարարության աշխատակիցներ, լրագրողներ:

Նարինե Աղաբալյանն իր խոսքում կարևորել է հուշագրի կնքումը համագործակցության խորացման տեսանկյունից. «Մեծ ակնկալիքներ ունեմ կոնկրետ գիտության և կրթության ոլորտում համագործակցությունից` հատկապես օրենսդրական կարգավորման առումով»:

Լեռնիկ Հովհաննիսյանը նշել է, որ երկու հայկական հանրապետությունների օրենսդիր մարմինների համագործակցությունն ունի ռազմավարական նշանակություն: Նախարարն առանձնացրել է պատմամշակութային ժառանգության, նաև թատրոնի և կինոյի բնագավառում օրենսդրական կարգավորումների անհրաժեշտությունը. «Արցախում անհրաժեշտություն է առաջացել կինոյի մասին օրենքի ընդունումը և կարևորում եմ այդ բնագավառում երկու խորհրդարանական հանձնաժողովների աշխատանքը: Վերջին տարիներին Արցախը դարձել է կինոյի համար հետաքրքիր վայր, արտասահմանյան տարբեր կինոստուդիաներ են հետաքրքրություն ցուցաբերում»,- ասել է Լեռնիկ Հովհաննիսյանը` անդրադառնալով նաև մշակույթի համաչափ զարգացման խնդրին և երիտասարդության մասին օրենքի բացակայությանը: Հուշագրի ստորագրումից հետո կայացել է ՀՀ և ԱՀ ԱԺ համապատասխան հանձնաժողովների համատեղ նիստը:

Տաթևիկ Աղաջանյան
aparaj.am