Ինչ ալ ըլլան սակայն առարկութիւնները, խնդիրը քրէական գործի մեկնարկի ժամանակի քաղաքական բնոյթին առընթեր, իրաւական առումով խոցելիութիւններ կ՛ընդգծէ:

Համոզիչ բացատրութիւններ չկան, թէ դատախազութիւնը կամ համապատասխան մարմինները իրաւասութիւն ունի՞ն նախքան անձեռնմխելիութեան իրաւունքի վերացումը Ազգային ժողովին կողմէ պատգամաւորի բնակարանը խուզարկելու, հարցաքննելու, նախաքննութիւն կատարելու եւ ապա միայն դիմելու Ազգային ժողով` անձեռնմխելիութեան վերացման առաջարկով:

ԲՀԿ-ի առաջնորդին հասցէին կատարուող մեղադրանքներուն հաւաստիութիւնը կամ ճշմարտացիութիւնը դատական գործընթացը կրնայ հաստատել: Խնդիրը այստեղ եւս չի կեդրոնացներ հիմնական առանցքներ, եթէ աւելի համընդհանուր դիտարկումով առաջնային հարցը իրաւական պետութեան կայացման առաջադրանքն է եւ այդ շրջածիրին մէջ անկախ արդարադատութիւն ունենալը:

Համոզիչ չէ նաեւ դատախազին գործի մեկնարկին յետաձգումը, երբ ընտրական կաշառատուութեան օրինակները, ըստ մեղադրանքի կատարուած են 2017-ի ընտրութիւններուն` առարկելով, թէ փաստահաւաքի համապատասխան աշխատանքը չէր կատարուած: Ընտրախախտումներն ու ընտրակաշառքները երբեմն այնքան համատարած էին, որ յատկապէս այդ երեւոյթներուն հսկող մարմիններուն եւ կառոյցներուն համար փաստերու պակաս չէին կրնար ստեղծել:

Գործընթացները կը համոզեն, որ իրաւականութիւնը կը զիջի քաղաքական պատուէրին: Չի բացառուիր, որ այս գործին մէջ ընտրակաշառք կիրարկուած է կամ պետական պիւտճէ չեն մուծուած անհրաժեշտ հարկերը: Աւելի սկզբունքային իրաւադրոյթ գոյութիւն ունի, որ ո՛չ միայն ԲՀԿ-ի ղեկավարին կը վերաբերի:

Այսպէս. Սահմանադրութեան յօդուած 95-ը կը ճշդէ.

«Պատգամաւորական մանտադի անհամատեղելիութիւնը

Պատգամաւորը չի կարող զբաղեցնել իր կարգավիճակով չպայմանաւորուած պաշտօն պետական կամ տեղական ինքնակառավարման այլ մարմիններում, որեւէ պաշտօն` առեւտրային կազմակերպութիւններում, զբաղուել ձեռնարկատիրական գործունէութեամբ, կատարել վճարովի այլ աշխատանք, բացի գիտական, կրթական և ստեղծագործական աշխատանքից»:

Հիմա նկատենք, որ ո՛չ միայն Ծառուկեանը, այլեւ իրերայաջորդ խորհրդարանի բազմաթիւ անդամներ, սկսեալ առաջին նախագահի օրերուն ձեւաւորուած Ազգային ժողովներէն իրենց գործարարական կարգավիճակով որքանո՞վ համատեղելի են իրենց պաշտօններուն հետ:

Այս հարցումին անորոշ պատասխանը աւելիով կը համոզէ, որ իրաւականութիւնը կը զիջի քաղաքականին եւ այս պարագային կը կիրարկուի ընտրովի արդարադատութիւն: Իսկ իրաւական պետութեան կայացման համար անկախ արդարադատական համակարգի գոյութիւնը կարեւորագոյն նախապայման է:

Որքան ալ որ գործող Սահմանադրութիւնը փոխելու պահանջներ հնչեն քաղաքական տարբեր շրջանակներու կողմէ, պետական մտածողութիւնը կը շեշտէ, որ այնքան ատեն որ սահմանադրական որեւէ փոփոխութիւն չէ կատարուած, գործող սահմանադրութեան իւրաքանչիւր իրաւադրոյթ գերակայ է քաղաքական ամէն ճաշակէ:

95-րդ յօդուածը խախտած պատգամաւորներուն ուղղութեամբ փաստահաւաքի աշխատանքը ամբողջացնելու համար ո՞րքան ժամանակի կը կարօտի:

«Ա.»
aztagdaily.com