Այս ազգադավ իշխանությունը փորձում է ամեն կերպ «Դիմադրություն» շարժումը կոտրել, հատկապես շարժման այն հատվածը, որոնք կայուն ու պինդ են, եւ վստահ են, որ առաջիկայում մենք կունենանք նոր ազգային իշխանություններ եւ երկիրն այս վիճակից դուրս կբերենք։ Այս մասին այսօր՝ հունիսի 11–ին, լրագրողների հետ զրույցում ասաց ՀՅԴ ԳՄ անդամ, ԱԺ «Հայաստան» խմբակցության քարտուղար Արծվիկ Մինասյանը։

«Հետեւաբար այս իշխանությունները ամեն գնով ու ամեն պահի չարաշահելով իրավական լծակները՝ փորձում են քաղաքական ակտիվ գործունեություն իրականացնող, հանրային հեղինակություն ունեցող անձանց նկատմամբ իրականացնել նման այլանդակ գործողություններ։ Բագրատ Եսայանի պարագան առավել ցայտուն է, որովհետեւ նա լինելով հեռուստաընկերության տնօրեն, իրականացնելով հստակ ազգային ուղեգծին ուղղված գործողություններ, մի մեծ ոսկոր էր, որ մնալու էր իշխանության կոկորդին»,– ասաց Արծվիկ Մինասյանը։

Նշենք, որ երեկ՝ հունիսի 10–ին, ԱԱԾ 4 աշխատակիցներ ներխուժել էին «Երկիր մեդիա» հեռուստաընկերության տնօրեն Բագրատ Եսայանի աշխատասենյակ ու բերման ենթարկել նրան։ Եսայանին ձերբակալել էին, ապա կալանավորելու միջնորդություն ներկայացրել դատարան, ինչը, սակայն, մերժվել է։

Արծվիկ Մինասյանի խոսքով՝ ՀՅԴ–ի նկատմամբ արշավ է իրականացվում։

«100–ից ավելի խուզարկություններ են կատարվել դաշնակցության տարբեր գրասենյակներում եւ կուսակցականների տներում։ Չհայտնաբերելով որեւէ հանցավոր արարքին բնորոշ իր կամ ապացույց, իշխանությունը նյարդայնացել է, առանց հասկանալու մարդկանց ապօրինի զրկում են ազատությունից։ Սա էլ այդ դեպքերից մեկն էր։ Ապօրինի կալանավորված դաշնակցականների թիվը երեք տասնյակից ավելին է»,– ասաց Արծվիկ Մինասյանը։

Նշենք, որ Դատարանը մերժեց ՀՅԴ ՆԱՈւՄ անդամ Գառնիկ Մելքումյանի նկատմամբ քննիչի կողմից ներկայացված կալանքի միջնորդությունը. Այս մասին հայտարարություն է տարածել ՀՅԴ «Նիկոլ Աղբալյան» ուսանողական միությունը:

Դատարանն արձանագրեց, որ Գառնիկ Մելքումյանն առնչություն չունի իրեն մեղսագրվող արարքին և ներկայացված նյութերը, ըստ էության, բավարար չեն հիմնավորելու մեղադրանքը։