ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ Յակոբ Բագրատունի երէկ «Մայատին» արբանեակային պատկերասփիւռի կայանին հետ ունեցաւ զրոյց մը, որուն ընթացքին անդրադարձաւ երեքշաբթի օր տեղի ունեցած «Փէյճըր»-ներու պայթեցման դէպքին:

«Այո՛, միաձայնութիւն գոյութիւն ունի դատապարտելու այս դէպքը, եւ ոճիրի ահաւորութեան դիմաց ազգային միասնականութիւն գոյութիւն ունի: Պիտի ուզէինք, որ այս միասնականութիւնը նաեւ այլ հարցերու նկատմամբ ալ ըլլար, ըլլայ այդ Կազայի մէջ մեր հարազատներուն կամ Պաղեստինէն ու Լիբանանէն բռնագրաւուած հողերու ազատագրման հարցերուն նկատմամբ:

«Այս ոճիրը մեզի համար ցեղասպանութիւն գործելու համազօր է. անիկա կանխամտածուած կերպով ծրագրուեցաւ առաւելագոյն թիւով քաղաքացիներ սպաննելու մտադրութեամբ: Քաղաքացիներ կ՛ըսեմ, որովհետեւ անոնք դիմադրութեան ոգի ունեցող քաղաքայիններ են: Այս ոճիրին դիմաց մենք բոլորս` մանուկներ, կիներ ու երիտասարդներ, մենք մեզ դիմադրողներ կը նկատենք:

«Ասիկա առաջին անգամը չէ, որ Իսրայէլ այսպիսի ոճիր մը կը գործէ: Ան շրջանցեց մարդկայնութեան բոլոր գիծերը, շրջանցեց ճակատումի բոլոր կանոնները: Ասիկա առաջին անգամը չէ, որ Իսրայէլ կ՛ոտնահարէ միջազգային օրէնքը կամ պատերազմի ընթացքին վարմունքի սկզբունքները: Բոլոր պետութիւնները, մասնաւորաբար անոնք, որոնք իրենք զիրենք յառաջադէմ կը նկատեն եւ ժողովրդավարութեան ու մարդու իրաւունքներու դրօշը կը պարզեն, փաստեցին, որ այդ սկզբունքները միայն փոքր պետութիւններու կամ փոքր ժողովուրդներու համար պարտադիր են, իսկ մեծ պետութիւնները, Իսրայէլն ու անոր ետին կանգնողները այդ սկզբունքներուն կամ կարգախօսներուն որեւէ կարեւորութիւն չեն ընծայեր»:

«Մենք Լիբանանի կամ արաբական աշխարհին մէջ դժբախտաբար կը կարծենք, որ Միացեալ Նահանգներն են, որոնք Իսրայէլին կ՛արգիլեն կամ կ՛արտօնեն այս ոճիրները գործել: Համեստ կարծիքովս, եւ թերեւս այս առնչութեամբ կարելի է տարակարծիք ըլլալ, Իսրայէլը, սիոնական լոպին ու համաշխարհային սիոնականութիւնն են, որոնք կ՛իշխեն այդ պետութիւններուն: Իսրայէլն է որ որոշումը կու տայ եւ զայն կը գործադրէ, իսկ մնացեալ պետութիւնները անոր կը հետեւին գաղափարական, քաղաքական, տնտեսական, ելեւմտական եւ թերեւս կրօնական պատճառներով:

«Այսօր իրողութիւնը այն է, որ դատապարտման խօսքերէն աւելին չենք տեսներ, ՄԱԿ-ի Ապահովութեան խորհուրդին մէջ յայտարարութիւններէ աւելին չենք տեսներ: Ապահովութեան խորհուրդին մէջ ժողովներ, ժողովներու յետաձգումներ եւ անոնց միջեւ Կազայի ու այլ ճակատներու վրայ մեր աւելի մեծ թիւով եղբայրներու սպանութիւնն է, որ կը տեսնենք, եւ մենք տակաւին այդ պետութիւններէն արդարութիւն կը սպասենք», յայտնեց Բագրատունի: