Այսօր, հուլիսի 15-ին Երեւանում, Նեմեսիսի հուշարձանի մոտ տեղի ունեցավ ՀՅԴ Երիտասարդական եւ ՈՒսանողական 12-րդ համահայկական բանակումի պաշտոնական բացման արարողությունը, որին մասնակցում էին 400 երիտասարդ՝ 17 երկրներից: 12-րդ Համահայկական բանակումի կարգախոսն է՝ «Պիտի՛ վերադառնանք»։

Բացման արարողությանը ներկա էին ՀՅԴ Բյուրոյի, ՀՅԴ Հայաստանի Գերագույն մարմնի անդամներ և ՀՀ ԱԺ պատգամավորներ։

Միջոցառումը մեկնարկեց Հայաստանի Հանրապետության, Արցախի Հանրապետության և ՀՅԴ օրհներգերով։

Ելույթներով հանդես եկան ՀՅԴ Բյուրոյի անդամ Հովսեփ Տեր-Գևորգյանը, ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը, Համահայկական բանակման պատասխանատու Մհեր Գարագաշյանը, ՀՅԴ Հայաստանի Երիտասարդական միության ներկայացուցիչ Ժոր Ավդալյանը։

Չնայած այն հանգամանքին, որ միջազգային հանրությունը, մեր թշնամիները և Հայաստանի իշխանությունները ցանկանում են փակել Լեռնային Ղարաբաղի էջը, մենք չպետք է հրաժարվենք ազատագրական պայքարից. բացման խոսքում ասաց ՀՅԴ Բյուրոյի անդամ Հովսեփ Տեր-Գևորգյանը։

Ըստ Հովսեփ Տեր-Գևորգյանի՝ արարողությունը տեղի է ունենում տարածաշրջանային և համաշխարհային բախումների, ինչպես նաև Լեռնային Ղարաբաղի ժամանակավոր կորստի ու Հայաստանի իշխանությունների կողմից Հայ առաքելական եկեղեցու և ընդդիմության, մասնավորապես՝ ՀՅԴ-ի վրա հարձակումների պայմաններում։

«Այս հավաքը միավորում է ՀՅԴ քաջարի երիտասարդությանը։ Չնայած ՀՅԴ Երիտասարդական թևը որպես ահաբեկչական կազմակերպություն ներկայացնելու փորձերին՝ այն իր գաղափարներն իրականացնում է նորարարական մեթոդների ներդրման միջոցով։ Խնդիրների լուծման համար անհրաժեշտ է հասարակության համախմբում։ Սա է կուտակված մարտահրավերները հաղթահարելու կարևոր պայմանը»,- ընդգծեց ՀՅԴ Բյուրոյի անդամը:

«Հայ Յեղափոխական Դաշնակցության Հայաստանի կազմակերպության անունից շնորհավորում եմ բոլորիս Դաշնակցության Ուսանողական, Երիտասարդական միությունների համահայկական բանակումը մայր հայրենիքում գումարելու առթիվ: Շատ կարևոր ու խորհրդանշական է, որ մեր ժողովրդի և պետության այս ծանր օրերին աշխարհի 17 երկրներից շուրջ 400 երիտասարդ իրենց հավաքն են կազմակերպում մայր հայրենիքում: Սա պատասխան է բոլոր նրանց, ովքեր անցնող բոլոր տարիների ընթացքում ամեն ինչ արել են Հայաստան-Սփյուռք կապը խաթարելու համար՝ արգելելով նաև մեր սփյուռքահայ երիտասարդների մուտքը ՀՀ: Սա պատասխան է բոլոր նրանց, ում թվում է դաշնակցական երիտասարդներին ապօրինի կալանավորելով կարող են զերծ պահել հայ ժողովրդի հավաքական իրավունքների համար պայքարելուց: Ամեն հարվածից հետո Դաշնակցությունը ավելի է ուժեղանում, ամրանում և ազգային նպատակներին հասնելու համար ավելի հետևողական պայքար մղում»,-իր ելույթում ասաց Իշխան Սաղաթելյանը:

Ըստ Իշխան Սաղաթելյանի՝ բանակումները ժամանցային ճամբարներ չեն կամ տուրիստական այցեր, այլ Դաշնակցության գաղափարների դարբնոցներ են։ Քանի որ դաշնակցական երիտասարդությունը մեր ժողովրդի ճակատագրական պահերին իր դերակատարումն է ստանձնել եւ պատվով տարել, նա վստահ է՝ «Վերադառնալու ենք» կարգախոսով այս բանակումն էլ իր դրական արդյունքները տալու է։

«Մենք հայրենիքի կողքին ենք՝ առանց ետ կանգնելու, առանց սահմաններ եւ հեռավորություն ճանաչելու, անկախ նրանից, թե այսօր ովքեր են ղեկավարում մեր երկիրը կամ ինչպիսի բռնաճնշումներով են փորձում մեզ լռեցնել»,- ասաց Ժոր Ավդալյանը՝ շեշտելով, որ դաշնակցական երիտասարդների համար ամեն ինչից վեր են հայ ժողովրդին եւ հայրենիքին ծառայելը, իսկ մնացյալ ամեն բան՝ դրան ծառայելու միջոց։ Ներկայիս բոլոր դժվարություններին դաշնակցական երիտասարդների պատասխանն, ըստ նրա՝ դաշնակցական կազմակերպված երիտասարդությունն է՝ հստակ գաղափարով, գիտակցված նպատակով եւ անվերապահ նվիրվածությամբ։

Իր եզրափակիչ խոսքում Մհեր Գարագաշյանն ասաց. «Լեռնային Ղարաբաղի վերադարձը կլինի, ռազմագերիների վերադարձը կլինի, մենք ժողովրդին կվերադարձնենք հույսն ու հավատը, դա պետք է անի ՀՅԴ երիտասարդությունը:

Ըստ նրա՝ միջոցառումը կոչված է Հայաստանը, Լեռնային Ղարաբաղը և սփյուռքը միավորելուն, ինչպես նաև անցյալի, ներկայի և ապագայի միջև կապ հաստատելուն»։

«ՀՅԴ-ն իր 135-ամյա պատմության ընթացքում չի կորցնում վճռականությունը, ինչը նրան հայ ժողովրդի իրավունքների համար պայքարում առաջատար ուժ է դարձնում։ Մենք պետք է իրականացնենք իսկական Հայաստանի հայեցակարգը, շեշտում եմ՝ իսկական Հայաստանի, իրական, այլ ոչ թե այլասերված ժողովրդավարության գաղափարը», – ընդգծեց Մհեր Գարագաշյանը։

Բացման արարողությունից հետո մասնակիցները երթով շարժվեցին դեպի Հայաստանի առաջին Հանրապետության հիմնադիր Արամ Մանուկյանի արձան, որտեղ տեղի ունեցավ ծաղկեդրման արարողություն:

ՀՅԴ երիտասարդական-ուսանողական 12-րդ Համահայկական բանակումի մասնակիցներն այցելեցին նաև Ծիծեռնակաբերդի հուշահամալիր:

տեսանյութն՝ այստեղ