Yerkir.am-ի հետ զրույցում նա ասաց, որ հանդիպել են ինստիտուտի կոլեկտիվի հետ, ուսումնասիրել կառավարության որոշումը, դրա իրավական կողմն ու տնտեսագիտական հիմնավորվածությունը: «Ըստ էության` կառավարության որոշումն իրականացվել է հապճեպ, այն խորապես չի ուսումնասիրվել, ինչի հետևանքով, ցավոք, տուժում են կոլեկտիվի շահերը: Կոլեկտիվը պայմանագրեր ունի տարբեր կազմակերպությունների հետ, որ կենտրոնի լաբորատորիաները կարող են օգտագործվել նրանց ծառայությունների համար, բայց կառավարությունը, այդ լաբորատորիաները հանձնելով մասնավոր ընկերության, արդեն իսկ կնքված պայմանագրերի իրականացումը կասկածի տակ է դնում»,- նշեց Պարսյանը:

Անդրադառնալով հարցի մյուս կողմին` տնտեսագետը նշեց, որ մասնավոր ընկերություններից ստացված շահույթը նախկինում կոլեկտիվին էր բաժին հասնում կամ դրանով ՊՈԱԿ-ի որոշակի ծախսեր էին հոգում: Այս որոշմամբ, ըստ Պարսյանի, գումարը գնալու է պետական բյուջե:

«Կոլեկտիվի պահանջն արդար է` թողնեն հանգիստ աշխատել: Նրանք հետաքրքիր մարդիկ են, հետաքրքիր գաղափարներ ունեն, որ կարող են կյանքի կոչել: Կառավարության այս որոշմամբ վնասվում է նաև պետության շահը` մեկ քառակուսի մետրի համար սահմանվել է 750 դրամ վճար: Բայց ներկայումս այդ տարածքը երկու անգամ ավելի թանկ գնով է վարձակալության հանձնված` 1500 դրամով: Բացի այդ` «ԱԶԱԴ ֆարմասյութիքլզ»-ից բացի, Հայաստանում մի շարք դեղագործական ընկերություններ կան, որ գուցե կցանկանային մասնակցել մրցույթին: Այս նախադեպը մրցակցային շուկայում լուրջ խնդիր կարող է առաջացնել: Եթե ուղղակի որոշվել է, որ այդ շենքը` երեք հարկով, տրամադրվում է «ԱԶԱԴ»-ին, հստակ է, որ կանխակալ տրամադրվածություն կա այդ ընկերության նկատմամբ»,- ներկայացրեց մեր զրուցակիցը` ավելացնելով, որ թեև վերոնշյալ ընկերությունը պարտավորվել է 300 մլն դրամի չափով գումար ներդնել, սակայն ներդրումային նախագիծ չի ներկայացրել, թե որտեղ է ծախսվելու այդ գումարը:

Սուրեն Պարսյանն ասաց նաև, որ կառավարությունում, չգիտես` ինչու, այնպիսի տրամադրվածություն ունեն, որ պետական սեկտորը միշտ անարդյունավետ է գործում, և ամեն ինչ պետք է վերցնել ու տալ մասնավոր հատվածին: «Այս կոլեկտիվը,- շեշտեց նա,- հակառակն է ապացուցում: Ինստիտուտի լաբորատորիաներով ունեն 400 հազար դոլարի պատվեր, կառավարության հույսին չեն: Նշեմ, որ «ԱԶԱԴ»-ը տարիներ շարունակ նույն հարցով դիմել է կառավարություն` թե՛ Հովիկ Աբրահամյանի, թե՛ Կարեն Կարապետյանի կառավարությունների ժամանակ, բայց միշտ մերժում է ստացել, որովհետև գործադիրը, նախևառաջ, առաջնորդվել է գիտական կոլեկտիվի շահերով: Ըստ իս` կառավարությունը միակողմանի որոշում է կայացրել, որում բացակայում են գիտահետազոտական ինստիտուտի ու կոլեկտիվի շահերը»:

Ինչո՞ւ է տարածքն արտոնյալ պայմաններով տրվում արտասահմանյան ՍՊԸ-ին

Կարծում եմ, որ կառավարության որոշումը պիտի չեղարկվի և հաշվի առնվեն կոլեկտիվի շահերը»,- այս մասին կառավարության դիմաց հայտարարեց տնտեսագետ Սուրեն Պարսյանը` անդրադառնալով Մնջոյանի անվան Օրգանական և դեղագործական քիմիայի գիտատեխնոլոգիական կենտրոնի աշխատակիցների բողոքի ակցիային:

Տնտեսագետի խոսքով` կենտրոնում ստեղծագործ կոլեկտիվ է աշխատում և նա կարող է պետությանը մեծ շահ բերել:
«Խնդիրն այն է, որ այս մարդկանց հնարավորություն տրվի, որպեսզի աշխատանքները կարողանան շարունակել իրենց կենտրոնում: Կառավարությունը չի բարեհաճել նաև ներկայացնել, թե կենտրոնը տեղափոխելու դեպքում ո՞վ է հոգալու ծախսերը, նրանց համար համապատասախան լաբորատորիա ո՞վ է կառուցելու, որպեսզի այս մարդիկ չկանգնեն փաստի առաջ»,- ասաց Սուրեն Պարսյանը:

Տնտեսագետի խոսքով` կենտրոնի տնօրենը բացասական դիրքորոշում է հայտնել մասնաշենքի առաջին և երկրորդ հարկերը ևս «Ազադ» ՍՊԸ-ին հանձնելու համար, սակայն նրա այդ դիրքորոշումը վերջնական եզրակացության մեջ տեղ չի գտել, նույնիսկ հատուկ կարծիքի ձևով:

Սուրեն Պարսյանը նշեց, որ իր կարծիքով, կենտրոնի տնօրենի կարծիքը պարզապես անտեսվել է, ինքն այս խնդիրը բարձրացրել է նաև կառավարության անդամների մոտ:

ԼՈւՐԵՐ.com-ի հարցին, թե ինչ արձագանք է ստացել, տնտեսագետը պատասխանեց.

«Առաջին անգամ, երբ հարցը բարձրացվել է, այն դուրս է բերվել օրակարգից: Այս անգամ, կառավարությունը կենտրոնի մասնաշենքը վարձակալության հանձնելու կետը ներառեց չզեկուցվող հարցերի մեջ և որոշումն անցկացրեց գաղտագողի»,-ասաց տնտեսագետը` հավելելով, որ «Ազադ» դեղագործական ՍՊԸ-ին, մասնաշենքի երրորդ հարկը տրամադրված է 800. 000 դրամով, բայց մյուս երկու հարկերի ավելացման դեպքում արդեն վճարելու են 1. 200.000 դրամ:

Տնտեսագետի պնդմամբ , այստեղ հարց է առաջանում, թե ինչո՞ւ է արտոնյալ պայմաններով տարածքը տրվում արտասահմանյան «Ազադ» ՍՊԸ-ին, եթե կան բազմաթիվ այլ դեղագործական ընկերություններ, որոնք տարածքների կարիք ունեն:

Սիլվի ՏԻԳՐԱՆՅԱՆ