2018 թվականը սկսվեց ցուցանիշների բարձր տեմպերով, որը նաև նախորդ տարվա ընթացքում կատարված որոշակի քայլերի դրսևորում է, իսկ հետո ցուցանիշները գնալով նվազեցին:

Այս մասին Tert.am-ի հետ զրույցում ասաց տնտեսական զարգացման և ներդրումների նախկին նախարար Արծվիկ Մինասյանը՝ ամփոփելով 2018 թվականի տնտեսական տարին:

Նա նկատեց, որ պետք է արձանագրել, որ ժողովրդական շարժումը և դրա հետևանքով մի շարք ծրագրերի դադարեցումը, նաև հանքարդյունաբերության ոլորտում արձանագրված խնդիրներն իրենց հետևանքներն ունեցան, և հատկապես տնտեսական աճի ցուցանիշում էական նվազում արձանագրվեց:

«Հաջորդ կարևոր արձանագրումն այն է, որ տարվա գյուղատնտեսական շրջանը ավելի վաղ սկսվեց, և արդյունքում առաջին վեց ամիսների կտրվածքով ցուցաբերվեց գյուղատնտեսական մթերքների արտադրության, արտահանման բարձր ցուցանիշ, բայց նաև գյուղատնտեսական շրջանը շուտ ավարտվեց»,- ասաց նա:

Խոսելով ներդրումներից՝ Արծվիկ Մինասյանը նշեց, որ քաղաքական մակարդակում փոփոխությունները բերեցին ներդրումներ կատարելու ցանկություն հայտնողների մեծ ծավալի, սակայն դրանք մեծ մասշտաբներով չարվեցին:

«Պետական հատվածի մի շարք գերատեսչություններում զրոյացվեցին կոռուպցիոն դրսևորումները, սակայն քանի որ դա համակարգային բնույթ չի կրել, և դեռևս լիարժեք ձևավորված չեն ներդրումների պաշտպանության համակարգերը, սրանով պայմանավորված նաև ներդրումների որոշակի բարձր հոսքի ակնկալիքները չարդարացվեցին: Եվ վերջապես պետք է դիտարկենք արտահանման ցուցանիշները, և չնայած արդյունաբերության մակարդակում շարունակում է արտահանման դրական դինամիկան, այնուամենայնիվ, արտահանման կառուցվածքում բարձր տեխնոլոգիական ապրանքների արտահանումը փոքր մակարդակի է մնում, ինչը տնտեսական աճի հիմնական բաղադրիչը պետք է լիներ»,- ասաց նա:

Տնտեսական զարգացման նախկին նախարարը նշեց, որ տնտեսական ցուցանիշներում արձանագրում ենք նաև աշխատավարձի աճի նվազում, ինչը նշանակում է, որ բնակչության եկամուտները անհրաժեշտ մակարդակի չեն;

Ինչ վերաբերում է 2019 թվականի նախադրյալներին, Արծվիկ Մինասյանը նախ կարևորեց ներդրումային օրենսդրության լիարժեք ընդունումը և գործադրումը, ինչը նշանակում է մեկ տասնյակի հասնող օրենքների ընդունում:

Ներդրումների հարցում Մինասյանը առաջնահերթ գործոն համարեց նաև դատական համակարգում նախատեսվող փոփոխությունները, որոնք է՛լ ավելի պետք է բարձրացնեն վստահությունը դատական համակարգի նկատմամբ, ինչպես նաև բիզնես օմբուդսմենի կամ բիզնես-հաշտարարի օրենսդրությունը:

Արծվիկ Մինասյանը կարևորեց նաև արտահանման աշխարհագրության ընդլայնումը և նոր աշխատատեղերի ստեղծման ուղղությամբ Կառավարության պարտավորությունների ամրագրումը օրենքում, ինչպես նաև մյուս կողմից տեղական ինքնակառավարման մարմինների օրենսդրության փոփոխությունը:

«Մեր տնտեսությունն իր մեջ կրում է իներցիոն մեծ պոտենցիալ․ դա նշանակում է, որ դեռևս երկար ժամանակ է պահանջվելու վերափոխման համար, սակայն կարևոր է, որ նոր կառավարությունը պասիվ դիտորդից վերածվի ակտիվ գործ ձեռնարկողի, ոչ թե միայն հետևի խաղի կանոնների պահպանմանը, ինքը պետք է դառնա ակտիվ խաղացող՝ նպաստելու համար միջավայրի բարելավմանը, գյուղատնտեսական աշխատատեղերի ստեղծմանը, եկամտաբեր գործունեության մեջ հնարավորությունների ստեղծմանը: Հակառակ դեպքում մենք կունենանք շարունակ տեղում դոփող տնտեսություն, որը չի կարող ապահովել առաջանցիկ զարգացումներ»,- ասաց նա:

Լիանա Առաքելյան