Արցախի հարցը միայն արցախցիների որոշելիքը չէ
27 Նոյեմբեր 2018
Հարցազրույց ՀՅԴ ԳՄ ներկայացուցիչ Արսեն Համբարձումյանի հետ
-Պարոն Համբարձումյան, ընդունված է կարծել, որ ՀՅԴ-ն ունի կայուն ընտրազանգված և իր 5 տոկոսն, այսպես թե այնպես, կստանա։ Սակայն վերջին երկու հրապարակված սոցիոլոգիական հարցումները այս ընտրություններում մի քիչ այլ բան են վկայում՝ ՀՅԴ-ին 2 տոկոսից ավելին չեն տալիս։
-Իսկ դուք հիշու՞մ եք նախընտրական քարոզարշավի ժամանակ հրապարակված որևէ սոցիոլոգիական հարցում, որի ժամանակ Դաշնակցությանը անցողիկ շեմը հաղթահարելու հնարավորություն էր տրվում։ Ես, կարծես թե, չեմ հիշում, մշտապես բոլոր ընտրությունների ժամանակ տարբեր սոցիոլոգիական հարցումներով Դաշնակցությանը միշտ ավելի ցածր ցուցանիշներ են վերագրվում, քան ունենում ենք ընտրությունների ժամանակ։ Ես ձեզ վստահեցնում եմ, որ հերթական անգամ էդ նույն կազմակերպությունները պիտի արձանագրեն, որ իրենց տրված տոկոսները ՀՅԴ-ին իրականության հետ կապ չունեն։ Վստահեցնում եմ, որ մենք էդ ցուցանիշներից շատ ավելի բարձր ցուցանիշներ կունենանք և կարծում եմ, որ ընտրություններից հետո առիթ պիտի ունենանք էդ նույն կազմակերպություններին հարց ուղղելու, թե սխալ կանխատեսումներն ինչո՞վ էին պայմանավորված՝ միտումնավո՞ր, հասարակական կարծիքը մանիպուլացիայի ենթարկելու՞, թե՞ մասնագիտական կարողությունների հետ կապված խնդրի պատճառով։
–Արցախի հարցում կա՞ որևէ տարբերություն ձեր և Փաշինյանի հայացքների միջև։
-Անցնող ամիսների ընթացքում մենք արձանագրել ենք, որ ո՛չ վարչապետ Նիկոլ Փաշինյանը, ո՛չ էլ առավելևս Փաշինյանի թիմի համապատասխան պաշտոնյաները չեն անդրադառնում ազատագրված տարածքների խնդրին։ Էս հարցի պատասխանը մենք կուզեինք ունենալ՝ հասկանալու համար, թե ի վերջո կեցվածքը, մոտեցումը, դիրքորոշումն ինչպիսի՞ն է լինելու ազատագրված տարածքների հետ կապված հարցին, որովհետև սա այն խնդիրն է, որն ուղղակիորեն կապված է արցախյան հարցի հետ, և այս հարցի հետ կապված քաղաքական գործչի տեսակետը շատ կարևոր է, որպեսզի հասկանանք Արցախի հարցում ինչ ընթացք սպասել։
-Բայց համաձա՞յն եք, որ ինչպես ժամանակին Սերժ Սարգսյանն էր պնդում, ինչպես նախորդ առաջնորդներն են ասել, առանց տարածքներ զիջելու լուծում հնարավոր չէ։
-Մենք կարծում ենք, համոզված ենք, որ, անշուշտ Արցախը ցանկալի է լինի բանակցային կողմ տակտիկական տեսանկյունից, բայց ամենևին չի նշանակում, որ Հայաստանը որևէ ձևով, որևէ պարագայում պիտի խուսափի պատասխանատվությունից։ Հայաստանն ունի իր բաժին պատասխանատվությունը և Հայաստանը չի կարող կեցվածք ընդունել, որ ցանկացած լուծում, որ ընդունելի է Արցախի համար, ընդունելի է նաև մեր համար։ Մենք էս մոտեցումը չենք կիսում։
Մհեր Արշակյան
Հարցազրույցն ամբողջությամբ՝ տեսանյութում:
