«Հայաստանի անկախության շրջանում չի եղել աղբահանության այսպիսի վատ վիճակ, սա ոչ միայն աղբի հարցն է, այլ համաճարակների, որի մասին չի խոսվում ընդհանրապես: Տրանսպորտի հետ կապված հարցը ևս նախընտրական քարոզարշավի ժամանակ ներկայացվեց՝ երկու տարում կլուծվի, սակայն անցել է 10 ամիս և տեսնում ենք, որ դարձյալ ասում են երկու տարի: Մի գուցե մեկ տարի հետո դարձյալ ասեն՝ երկու տարի համբերեք: Բազմաթիվ խնդիրներ կան: Ինչ-որ հարցի լուծման ուղղությամբ տարվող աշխատանք չենք տեսնում և չենք տեսնում ոչ միայն որպես քաղաքական ուժ, այլ նաև որպես երևանցի»,- ասաց նա:

Արա Ռոստոմյանի խոսքով՝ օգոստոսի 31-ին քաղաքապետարանի դիմաց իրականացված ակցիան զգոնության կոչ էր քաղաքային իշխանություններին. «Մենք ցանկանում ենք, որ իրենք զգան, որ քաղաքի մի ստվար խումբ չի ցանկանում այլևս նման կերպ շարունակել, մենք կոչ ենք անում զգաստանան ու այսուհետև ավելի լավ աշխատեն»:

Ռոստոմյանի խոսքով՝ ՀՅԴ Երևանի քաղաքային կոմիտեի մասնագետները դիմել են Երևանի քաղաքապետարան՝ ստանալու «Սանիթեք» ընկերության հետ կնքված պայմանագրի օրինակը՝ այն ուսումնասիրելու և ավելի առարկայական առաջարկներ ներկայացնելու համար, սակայն անցել է 20 օրից ավելի, բայց որևէ պատասխան չեն տվել քաղաքապետարանից:

Արա Ռոստոմյանը հիշեցրեց, որ դեռևս Տարոն Մարգարյանի պաշտոնավարման ժամանակ նշվում էր, որ բրիտանական ընկերության հետ բանակցություններ էին վարվում տրանսպորտային նոր ցանց ներդնելու վերաբերյալ: Նախընտրական շրջանում Հայկ Մարությանն իր հերթին խոսում էր մի քանի ամսում տրանսպորտի խնդիրը լուծելու մասին, և պարզվեց, որ քաղաքային նոր իշխանությունն ավարտել է 2016-ի բանակցությունները։ Արա Ռոստոմյանն ասաց, որ իր տեղեկությամբ՝ դեռ Տարոն Մարգարյանի պաշտոնավարման վերջին շրջանում էին ավարտվել բանակցությունները և տրանսպորտային նոր ցանց ներդնելու փաթեթը պատրաստ էր վաղուց։

«Երբ եկան քաղաքային նոր իշխանությունները, իրենք ասացին, որ նախորդները կոռումպացված են և իրենց որևէ պայմանավորվածությունը հաշվի չի առնվելու: Եվ այդ փաստաթուղթը մի կողմ դրվեց: Անցավ 6 ամիս, անդրադարձան այդ փաստաթղթին, նկատեցին, որ այնտեղ բավականին պրոֆեսիոնալ աշխատանք է կատարված և կոսմետիկ փոփոխություններով ներկայացրին այն փաստաթուղթը, որը կարող էին ներկայացնել սրանից 6 ամիս առաջ: Նման կառավարումով, չեմ կարծում, նոր իշխանությունները կարողանան հաջողել»:

Մանրամասները՝ տեսանյութում:

https://youtu.be/fJTzTaPzjmM