Արվել են արտահայտություններ, որոնք կարող ենք համարել քարոզ. այսօր խորհրդարանում լրագրողներին ասաց ԱԺ ՀՅԴ խմբակցության ղեկավար Արմեն Ռուստամյանը` անդրադառնալով հարցին` արդյո՞ք Փաշինյանի` Գեղարքունիք կատարած այցը կարող ենք քարոզարշավ համարել:

«Այո, այդ այցելության ընթացքում եղել են, հնչել են արտահայտություններ, որոնք քարոզ են նշանակում, մասնավորապես` այս պահը` ձայն պետք է տաք մեզ, որպեսզի մենք շարունակենք այն, ինչ սկսել ենք, ավարտին հասցնենք Ազգային ժողովի ձևավորման գործընթացը։ Ի՞նչ է դա նշանակում: Դա նշանակում է, որ ձայն պետք է տան Նիկոլ Փաշինյանի ուժին։ Քարոզչությունն էլ ո՞նց է լինում»,- ասաց պատգամավորը:

Ռուստամյանի խոսքով` ԿԸՀ-ն պարտավոր է արձագանքել այդ ամենին։

Դիտարկմանը` իշխանությունն ասում է, որ աշխատանքային ժամին մարզային այցելություն է կատարել, նա արձագանքեց. «Երբ Փաշինյանն ընդդիմություն էր, նույն բանն ասում էր մյուս վարչապետերի մասին, որոնք այցելում էին մարզեր, ու նրանք էլ նույն ձևով պատասխանում էին։ Այս ամենը դեժավյու է դառնում ինձ համար. գալիս են իշխանության ու սկսում նույն բառապաշարն օգտագործել, ինչ նախկին իշխանություններն էին օգտագործում։ Մի քիչ գոնե դրանից զգուշանան, որովհետև այդ նույն պարզաբանումները լսել ենք նախորդ վարչապետերից»։

Արմեն Ռուստամյանը չի բացառում, որ մոտ ապագայում Ղարաբաղի հարցի հետ կապված նոր առաջարկներ դրվեն սեղանին:

«Չեմ բացառում, որ արտաքին քաղաքականության հետ կապված խնդիրներ ունենանք, որի առաջին արձագանքը և նշանը տվեց պարոն Բոլթոնը, երբ ասաց, որ Արցախյան հարցը պետք է լուծվի այն ժամանակ, երբ իշխանություններն ունեն ամենամեծ վստահությունը: Այս վստահությունը պետք է նպաստի նրան, որ գնանք կոմպրոմիսների և լուծենք Ղարաբաղյան հարցը: Ես չեմ բացառում, որ մոտ ապագայում Ղարաբաղի հարցի հետ կապված նոր առաջարկներ դրվեն սեղանին: 90-ական թվականներն են աչքիս առաջ գալիս. այն ժամանակ էլ ունեցանք 83 տոկոսով ընտրված նախագահ, որից հետո առաջին քայլերը, որ կատարվեցին, շեղումն էր այն տրամաբանությունից, որով նրանք եկել էին իշխանության. եկել էին միացման տրամաբանությամբ, բայց հետո բերվեց մի առաջարկ, որը չընդունվեց իրենց իսկ թիմի կողմից: Տարբերությունն այն է, որ այն ժամանակ թիմը ձևավորվել էր Ղարաբաղի հարցի վրա, այս թիմը չի ձևավորվել Ղարաբաղի հարցի վրա»,- խորհրդարանում լրագրողներին ասաց պատգամավորը և հավելեց` հիմնական մտահոգությունը դա է` ո՞վ է ներսից պաշտպանելու Ղարաբաղի հարցը:

Ըստ Ռուստամյանի` Բոլթոնի հայտարարությունում կա տրամաբանություն, որ, այո, այս հարցը պետք է լուծի այն իշխանությունը, որի ասածը ժողովուրդը հալած յուղի պես ընդունում է: «Այս վիճակը կարող են օգտագործել արտաքին ուժերը, որովհետև նրանց համար կարևոր չէ` այսօր մեր ժողովուրդն աղքա՞տ է ապրում, սովա՞ծ է: Նրանց խնդիրներն աշխարհաքաղաքական են, և այդ աշխարհաքաղաքական խաղի մեջ Հայաստանը կարող է դառնալ մանրադրամ: Ամենակարևոր լուծումը տեղի է ունենում այն ժամանակ, երբ իշխանություններն ունենում են այդ լեգիտմությունը, որ այսօրվա գործող ստատուս քվոն փոխեն: Սրանք առաջիկա մարտահրավերներ են»,- եզրափակեց նա:

Պետք է ժողովուրդը գնահատի` կառավարությունն իր առջև դրված խնդիրները 100%-ով կատարել է, թե՞ ոչ. ասաց Արմեն Ռուստամյանը` անդրադառնալով վարչապետի պաշտոնակատար Նիկոլ Փաշինյանի հայտարարությանը, թե 100 տոկոսով կատարել են իրենց բոլոր պարտավորությունները:

«Եթե 100%-ով կատարված արդյունքները սրանք են, բա իրական 100 տոկո՞սը որը պետք է լինի: Ես չեմ համարում, որ այն ակնկալիքները, որ ժողովուրդն ուներ, կատարված են: Չգիտեմ` ինչ չափանիշներով է այդ գնահատականը տրվում, բայց ես կարծում եմ, որ կատարված է այն, որ նախորդին վերադարձ չկա: Նախորդ ռեժիմն արդեն հեռացավ, այո, «Մերժիր Սերժին» մասով պարտավորությունները կատարված են: Բայց մերժումը, որը պետք է ժողովրդին բերեր ավելի բարեկեցիկ կյանք, արդյո՞ք ամբողջությամբ կատարվել է: Ես շատ զգույշ կլինեի այդպիսի արտահայտություն անելիս»,- ասաց պատգամավորը և հավելեց. «Բայց մերժենք Սերժին դեպի ո՞ր ապագան գնալու համար և ինչպիսի՞ ծրագրով ենք մենք նոր ապագային գնալու ու հասնելու: Երբ դրա մասին ենք խոսում, մեկ էլ պարզվում է, որ այդպիսի հայեցակարգված, հստակ ու հասկանալի ծրագիր առայժմ չի հնչեցվել, որ ես կարողանամ գնահատել՝ այդ ծրագիրը կատարվե՞լ է 100 տոկոսով, թե՞ որ տոկոսով է կատարվել: Ունենք միակ հրապարակային համաձայնեցված փաստաթուղթ՝ կառավարության ծրագիրն է: Այսինքն՝ որ նայենք, թե այդ ծրագրից որ գլուխներն են ամբողջությամբ իրացված, ես չեմ կարծում, որ կհանգենք այն եզրակացության, որ 100 տոկոսով ամբողջ ծրագիրն իրականացված է, իսկ ծրագրից շատ քիչ բաներ են կատարվել»,- ասաց Ռուստամյանը:

Դիտարկմանը` մենաշնորհներն են վերացվել, պատգամավորը պատասխանեց. «Բայց գործող անձինք, որոնք մենաշնորհային դաշտ էին ստեղծել, դաշտում պահպանվել են, իսկ մենաշնորհները վերացե՞լ են»:

Ինչ վերաբերում է քաղաքական մենաշնորհին, Ռուստամյանը նշեց, որ այն գնալով ամրապնդվում է: «Հենց դա է մեր հիմնական խնդիրը. հիմա մենաշնորհային իրավիճակ է, կառավարությունը փոխարինված է վարչապետով, և եթե այսպես շարունակվի, մենք կունենանք մի Ազգային ժողով, որը կլինի ամբողջությամբ կառավարության պատկերը` մեկ ուժի արտացոլում: Մինչև հիմա ասում էին, թե ԱԺ-ն դակիչ է, նույն վիճակը կարող է պահպանվել հաջորդ ԱԺ-ում: Տեսանք հոկտեմբերի 2-ին, թե ինչպես էր կառավարությունը ճնշում գործադրում իր իսկ կոալիցիոն ընկերների վրա` ասելով, թե ինչպես նրանք պետք է իրենց պահեն ԱԺ-ում: Դա ենթադրում է, որ նույն տրամաբանությունը կարող է գործել, երբ նրանք մեծամասնություն ունենան և, առանց հաշվի առնելու, որ գործադիրն օրենսդիրից տարանջատված է, էլի շատ վատ իրենց զգան, երբ կառավարության մոտեցումները ԱԺ-ն չպաշտպանի: Այդպիսով` մենք գնալու ենք նույն միահեծան իշխանության»,- հայտարարեց նա:

Ըստ պատգամավորի` քաղաքական մենաշնորհի մեղավորները քաղաքական մենաշնորհ ստեղծողներն են, և պետք է ներկայով խոսել դրա մասին, այլ ոչ թե` անընդհատ անցյալին հղումներ կատարելով: