29 օգոստոս, երեկոյեան խումբ մը դաշնակցական երիտասարդներ ինքնաբուխ կերպով մեկնեցան Լիբանանի մէջ Ազրպէյճանի դեսպանատուն եւ այնտեղ կարգախօսներով, ցուցապաստառներով եւ վանկարկումներով բողոքեցին Արցախի նկատմամբ Ազրպէյճանի վարած ցեղասպանական քաղաքականութեան դէմ:

Անոնք յայտարարեցին, որ մարդասիրական աղէտ ստեղծելով եւ ամբողջ ժողովուրդ մը սովամահ դարձնելով Ազրպէյճան կը փորձէ ցեղասպանութեան ենթարկել Արցախի 120.000 ժողովուրդը:

Անոնք միաժամանակ կարմիր գոյնով ներկեցին դեսպանատան մայր մուտքի պատը` իբրեւ խորհրդանիշ Ազրպէյճանի վարած ցեղասպանական քաղաքականութեան:

Երիտասարդները վերահաստատեցին իրենց յանձնառութիւնը ամէն ձեւով զօրակցելու Արցախի ժողովուրդին եւ դէմ դնելու Ազրպէյճանի ոճրային քաղաքականութեան: