ԿԼԵՆՏԷՅԼ.- ՀՅԴ Արեւմտեան Ամերիկայի Կեդրոնական կոմիտէի յառաջացուցած «Մենք ենք Գիւմրին» յանձնախումբը կը տեղեկացնէ, թէ 11 Յուլիսին նշուեցաւ Գիւմրիի «Շիրվանեան» Երիտասարդական կեդրոնի հիմնադրութեան 8րդ տարեդարձը, վերանորոգելով շրջանի երիտասարդութեան յաւելեալ առիթներ ընծայելու առաքելութիւնը։

Կեդրոնի վարիչ Սուզանա Խոստանեանի առաջնորդութեամբ, տօնակատարութեան ընթացքին ելոյթ ունեցողները լուսարձակի տակ առին կեդրոնին իրագործումները եւ ապագայ քայլերը։

«Շիրվանեան» Երիտասարդական կեդրոնը կարելի եղած էր մէջտեղ բերել հանգուցեալ տէր եւ տիկին Յակոբ եւ Մինա Շիրվանեաններուն աջակցութեան շնորհիւ, 1988ի երկրաշարժէն վնասուած այդ կառոյցին մէջ իրականացուած նորոգութեան աշխատանքներուն ամբողջացումէն ետք: Այդ թուականէն ի վեր, «Մենք ենք Գիւմրին» յանձնախումբը կեդրոնը վերածած է այդ շրջանի պատանիներուն եւ երիտասարդներուն համար աշխոյժ գործունէութեան վայրի մը՝ կազմակերպելով անգլերէնի, ռուսերէնի, համակարգչային գիտելիքներու, երաժշտութեան, ճատրակի եւ պարի դասընթացքներ. անիկա դարձած է մշակութային, կրթական եւ ընկերային վայր մը, նպաստելով Հայաստան-Սփիւռք յարաբերութեան սերտացման:

Կեդրոնին յաջողութեան կարեւոր մասնիկը կը հանդիսանայ Մինա Շիրվանեանի անուան կրթանպաստներու հիմնադրամը, որ առիթ կը ստեղծէ Գիւմրիի երիտասարդներուն իրենց բարձրագոյն ուսումը շարունակելու հայրենիքի մէջ, որպէսզի անոնք ապագային գործնականապէս մասնակցին Գիւմրիի վերականգնման աշխատանքին: Կրթանպաստ ստացող ուսանողները սովորաբար կամաւոր սպասարկութիւններ կը մատուցեն «Շիրվանեան» Երիտասարդական կեդրոնին:

Տօնակատարութեան զուգահեռ, կեդրոնը նաեւ 16 Յուլիսէն 10 Օգոստոս կը հիւրընկալէ աւանդական դարձած ամառնային ճամբարներ, 6էն 16 տարեկան պատանիներու համար, որոնք այս տարի կը կրեն «Ամարաս» ընդհանուր խորագիրը։ Ճամբարին մասնակցողները մօտէն կը ծանօթանան հայկական մշակոյթին եւ հայոց պատմութեան։

Այս առիթով, «Մենք ենք Գիւմրին» յանձնախումբը համայնքին կոչ կ՛ընէ աջակցելու իր գործունէութեան, նուիրատուութիւններ կատարելով gofundme dot com/f/support-we-are-gyumris-amaras-summer-camp-2024 կայքին միջոցաւ։ Յաւելեալ տեղեկութիւններու համար այցելել facebook dot com/GyumriYouthCenter կայքէջը։