Կազմակերպութեամբ ՀՅԴ Լիբանանի պատանեկան միութիւններու Ընդհանուր վարիչ մարմինին, ուրբաթ, 19 յուլիս 2024-ին, երեկոյեան ժամը 8:00-ին «Յակոբ Տէր Մելքոնեան» թատերասրահին մէջ տեղի ունեցաւ «Պատանիի օր» հանդիսութիւնը` ներկայութեամբ ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ Յակոբ Բագրատունիի, ՀՅԴ Լիբանանի Կեդրոնական կոմիտէի կազմակերպական ներկայացուցիչ Ալպեր Պալապանեանի, նախկին նախարարներ Վարդինէ Օհանեան-Գէորգեանի եւ Վրէժ Սապունճեանի, Լիբանանի Կեդրոնական դրամատան փոխկառավարիչ Ալեք Մուրատեանի, Համազգայինի, ՀՄԸՄ-ի եւ ԼՕԽ-ի շրջանային վարչութիւններու եւ կոմիտէներու ու միութիւններու ներկայացուցիչներուն, պատանեկան միութիւններու նախկին վարիչներու, ծնողներու եւ պատանիներու:

Լիբանանի, Հայաստանի, Արցախի եւ Հայ յեղափոխական դաշնակցութեան քայլերգներէն ետք, ՀՅԴ Լիբանանի պատանեկան միութիւններուն անունով բարի գալուստի խօսքը արտասանեցին պատանիներ Յովիկ Չերչեան եւ Աննա Մարիա Սինանեան: Բացման խօսքին մէջ պատանիները նշեցին, որ Խանասորի արշաւանքի շունչով, ՀՅԴ Լիբանանի պատանեկան միութիւնները անցեալին աւանդութիւն ունէին յուլիսին կազմակերպել «Պատանիի օր»-ը, եւ այսօրուան այս հաւաքը կը միտի վերականգնել նշեալ աւանդութիւնը` արժեւորելով արշաւանքին դերը եւ դաշնակցական պատանիներուն օր յատկացնելու կարեւորութիւնը: Անոնք աւելցուցին. «Տարիներ շարունակ այս տօնակատարութիւնը ահազանգ է իւրաքանչիւր դաշնակցական ընկերոջ` հաւատարիմ մնալու դաշնակցական իր ուխտին եւ հաւատամքին»:

«Մենք պէտք է ըլլանք պատասխանատուութեան բարձր գիտակցութեան վրայ, ըլլանք համեստ եւ մեզի վստահուած նոյնիսկ փոքր պարտականութիւնները լռութեամբ իրենց աւարտին հասցնենք ու ըլլանք ծառայասէր, պատրաստ` բոլորին օգնութեան ձեռք երկարելու, առանց որեւէ խտրութեան: Մենք ըլլանք ազնիւ նկարագրի տէր դաշնակցականներ, ըլլանք հայրենասէր ու պայքարող, եւ ի՛նչ ալ ըլլան դժուարութիւնները, չյանձնուինք ու չհրաժարինք պայքարէն, հեռու մնանք բամբասանքէ եւ անտեղի վէճերէ, յարգենք երէց եւ պատասխանատու ընկերները եւ, վերջապէս, ըլլանք ընկերասէր, խիզախ ու վստահելի», հաստատեցին պատանիները:

Ապա ներկաները դիտեցին հանդիսութեան առաջին տեսերիզը, որ կը կրէր «Անցեալէն ներկայ» անունը: Տեսերիզին մէջ ներկայացուած էր ՀՅԴ Լիբանանի պատանեկան միութիւններու ստեղծումը, պայմանները եւ առաջին տասնամեակներու պայմանները եւ իրագործումները: Գեղարուեստական յայտագիրի առաջին բաժինով ՀՅԴ Լիբանանի պատանեկան միութիւններէն խումբ մը պատանիներ ասմունքեցին Գէորգ Էմինի «Սասունցիների պարը», ապա պատանիներ երգեցին պատանիներու նուիրուած երգը:

Հանդիսութեան պատգամախօսն էր ՀՅԴ Լիբանանի Կեդրոնական կոմիտէի անդամ Լուիզա Պապոյեան-Ազէզեան, որ նշեց, թէ «Պատանիի օր»-ը կապուած է մեր յեղափոխական պատմութեան մէջ նշանակալից խորհուրդ կրող մէկ արշաւանքին` Խանասորի արշաւանքին հետ, որ ներշնչման աղբիւր մը հանդիսացած է հայութեան համար. անկիւնադարձ մը` մեր յեղափոխական պատմութեան մէջ հայ մարդու պատմական տիպարը վերականգնելու իմաստով: Պապոյեան-Ազէզեան ըսաւ, որ ՀՅԴ Լիբանանի պատանեկան միութիւնը մարդուժի պատրաստութեան ա՛յն միջավայրն է, ուր պատանիները ո՛չ միայն մարդկային ու ազգային արժէքներով պիտի կազմաւորուին, այլ նաեւ առիթ պիտի ունենան հետեւելու տարբեր տեսակի վարժողական այժմէական ծրագիրներու` զարգացնելով իրենց ընկերային հմտութիւններն ու քննական միտքն ու ինքնավստահութեամբ դիմագրաւելու համաշխարհային նոր հրամայականները: Խօսքը ուղղելով պատանիներուն` ան ըսաւ. «Արթո՛ւն պահեցէք ձեր քննական միտքը` զանազանելու ճիշդը սխալէն, օգտակարը վնասակարէն, թշնամին բարեկամէն, բայց նաեւ` հասկնալով, որ քաղաքական, միութենական, անձնական եւ ընդհանրապէս կեանքի մէջ միայն երկու գոյն չկայ` այլ կան հազարաւոր կարելիութիւններ. իսկ ծայրայեղութիւններով կարելի չէ զարգանալ, ոչ ալ յարատեւել: Նախանձախնդիր եղէք պահելու` հայ ընտանիքը, եկեղեցին, դպրոցը, ակումբը. պաշտպանեցէք ազգն ու հայրենիքը` գործնական հայրենասիրութեամբ (Լուիզա Պապոյեան-Ազէզեանի խօսքը ամբողջութեամբ կը հրատարակենք հետագային):

Գեղարուեստական յայտագիրի Բ. մասով ելոյթ ունեցաւ պատանիներէ կազմուած նուագախումբ մը, որ ներկայացուց «Զարթի՛ր, լաօ՛»-ն եւ «Ղարաբաղցին»: Նուագախումբի կատարումէն ետք ներկաները դիտեցին ձեռնարկին երկրորդ տեսերիզը, որուն անունն էր «Ներկայէն ապագայ»: Տեսերիզը կ՛անդրադառնար 101-ամեայ պատանեկան միութիւններու կարեւորութեան, այսօրուան իրավիճակին եւ գալիք մարտահրաւէրներուն:

Ապա խումբ մը պարմանուհիներ կատարեցին հայկական պար մը` «Colors of Artsakh» երաժշտութեան ընկերակցութեամբ: Պատանիի օրուան նուիրուած հանդիսութիւնը փակուեցաւ պատանեկան միութիւններու միացեալ երգչախումբին կատարումներով, որ ներկայացուց ազգային յեղափոխական երգաշար մը: