Ապրիլի 24-ին Հրապարակ TV-ի Հինգշաբթի հաղորդաշարի հյուրն էր ՀՅԴ Հայաստանի ԳՄ անդամ, ՀՀ ԱԺ «Հայաստան» խմբակցության պատգամավոր Գեղամ Մանուկյանը: Անդրադարձ է կատարվել ՀՀ իշխանությունների՝ վերջին շրջանում դրսևորած ջղաձիգ պահվածքներին, որոնք, ըստ Գեղամ Մանուկյանի, հետևանք են թե արտաքին քաղաքականության մեջ և թե ներքաղաքական պայքարներում իշխանության բազմաշերտ, կայուն և փոխկապակցված պարտությունների: Նրա կարծիքով՝ շատ բան պայմանավորված է նաև իշխող ուժի ղեկավարի պահվածքով: «Երբ մարդն ինքը չի հավատում իր ասածին, նրա զենքը դառնում են միայն ջղագրգռությունը, ցինիկությունը և հայհոյանքը: Սա աննկատ չի մնում նաև իշխանությանը սատարող անհատների և շրջանակների կողմից, որոնք արդեն համոզվել են, որ այսօր գործ ունեն անհավասարակշիռ, ամենածայրահեղ ցնդաբանություններ դուրս տվող մի ղեկավարի հետ, բայց և պարտավորված են թութակի պես կրկնել այն, ինչ ասում է այդ ղեկավարը: Ու քանի որ դա հավատքով չի արվում, շատ հաճախ նաև իրենց սրտից չի բխում, նրանք ևս դառնում են դյուրագրգիռ»,- նշել է Գեղամ Մանուկյանը՝ ակնարկելով բոլորովին վերջերս Ազգային ժողովում հրահրված իշխանություն-ընդդիմություն միջադեպը:

Անդրադառնալով Գյումրու և Փարաքարի ՏԻՄ ընտրություններին՝ Գեղամ Մանուկյանը դրանք որակել է որպես իշխանության համար վառված «կարմիր լույս». «Ամբողջ պետական ռեսուրսը լցնես, ամբողջ վարչական ռեսուրսը լցնես, անբողջ պետական համակարգը երկու ամիս շարունակ ամեն օր Գյումրի ու Փարաքար տանել-բերել, էլ ֆինանսական ահռելի հոսքեր, էլ տեսակ-տեսակ խոստումներ, և երկու տեղում էլ պարտվե՞ս: Այդ ընտրություններն իրականում ցույց տվեցին իշխանությունների հանդեպ հասարակության մեջ կուտակված ատելությունը: Կարելի է թերևս ասել, որ այսօր նախահեղափոխական վիճակ է ամբողջ Հայաստանում: Օր չի անցնում, որ հանրային ինչ-որ շրջանակ, ինչ-որ հարցով բողոքի ձայն չբարձրացնի իշխանությունների վարած քաղաքականության դեմ»:

Գեղամ Մանուկյանն անդրադարձել է Հայաստանում հանգրվանած արցախահայության խնդիրներին, ինչպես նաև ՀՀ իշխանությունների վարած զիջողական արտաքին քաղաքականությանը և թուրք-ադրբեջանական նախապայմանների բավարարման վտանգավոր միտումներին, որոնք կարող են հանգեցնել Հայաստանի Հանրապետության և հայ ժողովրդի վերջին կռվաններից՝ Անկախության հռչակագրից և Հայոց ցեղասպանության ճանաչման գործընթացից, հրաժարվելուն: Նա խոսել է նաև ընդդիմության առաջարկած օրենսդրական փոփոխության մասին, որով նախատեսվում է Հայաստանում քրեականացնել Հայոց Ցեղասպանության ժխտումն ու ուրացումը:

Մանրամասները՝ տեսանյութում