ՀՅԴ Բիւրոյի անդամ, Միջին Արեւելքի պատասխանատու եւ Հայկական երեսփոխանական պլոքի ներկայացուցիչ Յակոբ Բագրատունի Զոքաք Պլաթի մէջ Պէյրութի քաղաքապետական եւ թաղապետական ընտրութիւն կատարելու նախօրեակին «Վանայ Ձայն»-ին հետ ունեցած զրոյցին ընթացքին գնահատեց այն քաղաքացիները, որոնք պատասխանատուութեամբ կատարեցին իրենց պարտականութիւնը:

Անդրադառնալով Պէյրութի կարեւորութեան` ան դիտել տուաւ, որ անիկա համախոհութեան, բոլորին մասնակցութեան քաղաքն է, բոլոր լիբանանցիներուն մայրաքաղաքն է, ո՛ւր ալ բնակին անոնք, ուստի պէտք է բոլոր լիբանանցիները զգան, որ Պէյրութը իրենցն է:

«Դաշնակցութեան մէջ, ընտրութենէն կարճ ժամանակ ետք նախաձեռնեցինք ստեղծման համախոհական ցանկի մը, ուր առաւելագոյն չափով ներկայացուած ըլլան մայրաքաղաքին մէջ գոյութիւն ունեցող քաղաքական ուժերը, որոնք զօրակցին այնպիսի ցանկի մը, որ ապահովէ մայրաքաղաքի բաժնեկցութիւնը բոլոր համայնքներուն եւ քաղաքական կողմերու միջեւ: Աշխատանք տարինք ունենալու ցանկ մը, որ աշխատանք տանի Պէյրութի զարգացման, բարգաւաճման եւ բոլոր լիբանանցիներու կարիքներուն Պէյրութի մէջ բաւարարման: Չմոռնանք, որ նոյնիսկ եթէ մարդիկ Պէյրութի մէջ չեն բնակիր, սակայն անոնք ամէնօրեայ գործեր ունին մայրաքաղաքին մէջ: Հետեւաբար մենք այս մայրաքաղաքը պէտք է պահենք մէկ, ամբողջական, բոլորին համար, բոլորին կողմէ բաժնեկցելով, եւ ունենանք արժանաւոր քաղաքապետական խորհուրդ մը, որուն մէջ մենք ունինք երեք հայ թեկնածուներ, անկախ թաղապետներէն, որոնք տարբեր տարբեր շրջաններու մէջ են», ըսաւ Բագրատունի: Ան յոյս յայտնեց, որ Պէյրութի քաղաքացիներուն գիտակցութիւնը շատ աւելի գերակշիռ կը դառնայ, քան համայնքային ու յարանուանական պատկանելիութիւնը:

Անդրադառնալով լիբանանեան լրատուամիջոցներուն կողմէ Դաշնակցութեան ընտրական մեքենայի տիրական ներկայութեան եւ անոր տրուած բնութագրումին` զայն նկարագրելով իբրեւ «մեղուի փեթակ», Յակոբ Բագրատունի ըսաւ, թէ բոլորին ծանօթ է Դաշնակցութեան ընտրական մեքենան, որ միշտ ալ այդպէս եղած է, որովհետեւ մեր այդ մեքենային ջախջախիչ մեծամասնութիւնը կամաւոր բանակ է, նաեւ մեր քուէարկողները կը հաւատան Հայ յեղափոխական դաշնակցութեան, կը հաւատան հայկական կուսակցութիւններու որոշումներուն: Ան նշեց, որ չէ պատահած, որ մեր ժողովուրդի ընտրազանգուածը դաւաճանած է մեզի, երբեմն կը պատահի, որ այլընտրանքներ ունենան, սակայն կարեւոր է, որ իբրեւ համայնք մեր ներկայութիւնը արժեւորենք:

Երեսփոխան Բագրատունի հաստատեց, որ Դաշնակցութեան ընտրական մեքենան միշտ ալ իր վրայ հրաւիրած է ուշադրութիւնը, գնահատուած է միշտ, որովհետեւ անոր մէջ ներգրաւուածներն ու գետնի վրայ գործողները նուիրեալ տղաք ու աղջիկներ են, նուիրեալ քաղաքացիներ են, որոնք ոչ միայն կը հաւատան Դաշնակցութեան եւ հայ կուսակցութիւններու ընտրանքին, այլ նաեւ կը հաւատան, որ այս երկիրը` Լիբանանը, իր Պէյրութ մայրաքաղաքով, արժէք է ոչ միայն զուտ լիբանանեան իմաստով, այլեւ համահայկական մակարդակով: